Mutapu wa Kuyikwash Antu Akweta Milong ya Ukash wa mu Manangu

Chirumburikina Mazu Minam

Tukutwish kwiyov kamu nayimp anch murund netu umen mar mulong wa mayej ma mu manangu. Pakwez tukutwish kumekesh anch tumubangidin murund netu kusutil kumukwash kurish ni milong ya ukash wa mu manangu. Mutapu ik tukutwisha kusal mwamu?

Mutapu Ukutwisha Ukwash Winou Kwikal wa Usey

“Ufanyidin kuswakal kutesh.”​—JAKOBU 1:19.

Mutapu umwing wa usey ukutwisha kumukwash murund ney ud wa kumutesh chisu chilondinay. Kangal watong anch ufanyidin kwakul ku yom yawonsu yikulejinay. Sal usu chakwel ijik anch umuteshin ni anch umubangidin. Sal usu wa kwitek pa ndond yend ni kangal kumurumburish. Vurik anch ukutwish kulond yom yimwing yimekena anch yidiap ya usey ni ukutwish kunenganan piur pa yom yalondangay.​—Job 6:2, 3.

“Yikwashany aziyila.”​—1 TESALONIK 5:14.

Murund ney ukutwish kwikal ni yakamish ni ukutwish kurish ni yovil ya kwiman mud kakwetap usey. Anch wamwinkish kashinsh anch umubangidin, ukutwish kumwongoj ni kumukasikesh ap anch wijap kamu yom ufanyidina kulond.

“Murund [wakin] ukat kumekesh rukat machuku mawonsu.”​—JINSWIR 17:17.

Mwinkisha ukwash uswirikedinay. Pa ndond pa kutong anch wij mutapu ufanyidina kumukwash, mwipula yom ufanyidina kumusadin. Anch chimukasikedin murund ney kukulej yom yikwetay nich kuswir, sal usu wa kumulej yom ukutwisha kusalany nend pamwing mu kusutish nend chisu pamwing. Ap ukutwish kuya kumulandin yom, kumututin ap kumukwash kand kusal yom kanang.—Galatia 6:2.

‘Shimpish muchim.’​—1 TESALONIK 5:14.

Murund ney kakutwishap chisu chawonsu kukulej yom kapamp kamwing. Mukasikesha anch ukusanger kutesh yom yikukulejay pa chisu chikukatay kulond. Mulong murund ney uyedin, ukutwish kulond ap kusal yom yikutwisha kukujimesh. Ukutwish pamwing ap kuswimp yom watenchikang kusal nend pamwing ap kukujimen. Shimpish muchim ni mutesha chisu umukwashina.​—Jinswir 18:24.

Kumukwash Murund Ney Kud Kamu Kwa Usey

“Nikwet kashinsh anch nikwet murund nikutwisha kwambamb nend chisu chawonsu. Ap anch nikutwishap kupwish milong yend, nisadining usu wa kutesh yom yinlejinay. Yisu yimwing ukweting kwend kuswir kwa kumutesh ni kupwa ukat kwiyov nawamp.”​—Farrah,a ukweta murund nend urishina ni yakamish ni ukweta mayej ma kuziy mu manangu mamukangeshina kudia.

“Nikweting murund nam umwing muwamp ni ukata kukasikeshan. Wantazuka kwol kwend mulong wa kudia nend yakudia yiwamp. Pa chisu chiwamp mud chinicha, chanswapela kumulej mutapu nading niyovila. Kusal mwamu kwankasikesha kamu!”​—Ha-eun, uyedina mayej matazukinau anch dépression clinique.

“Kushimpish muchimu kud kwa usey. Anch mukajam wasal chom kanang chikutwisha kwinjimesh, nivurikining anch mayej mawiy mamubachikina kusal mwamu. Chinech chinkwashining kulik kumujimen ni chikat kwimbachik kumubangin nakash.”​—Jacob, ukweta mukajend uyedina mayej matazukinau anch dépression clinique.

“Mukajam ukat kwinkwash ni kwingongoj. Chisu niyovila anch nikat kurij nich yakamish kakatap kwimbachik kusal yom nakad kukat kusal. Yisu yimwing chinech chirumburikin anch kakatap kusal chom chadia chikatinay kusal. Nimukatining nakash mulong ukweting muchim wa kupan, kakwetingap choy.”​—Enrico, uyedina mayej matazukinau anch trouble anxieux.