Dandamen Kutaninamu mu Kumwov Nzamb Wom

1-2. Mud Lot, chikokujol ik chirishinau nich in Kristu nlel?

PANTALIKEN ni milong yitadina kwishitul mu mangand minam, tukat kwiyov mud mwiyovay ikundj utentamina Lot. “Wanenganananga mulong wa usund wa antu ayimp.” (2 Pita 2:7, 8) Wom ni rukat mulong wa Nzamb yamubachika Lot kwipuk yisal yijondila ya antu ading amunyingumukina. Niyetu atunyingumukin kud antu akad kulimish yijil yishitwila ya Yehova. Chikalap nchik mwamu, tukutwish kushal ishitwila anch twadandamen kulam rukat ni wom wakin mulong wa Nzamb.​—Jnsw. 14:2.

² Mulong wa kutukwash, Yehova ukat kutukasikesh ni kutwinkish usu wa kusal mwamu kusutin buku wa Jinswir. In Kristu in awonsu, amakundj nau amband, ansand nau amapal, akutwish kutaninamu anch ashinshikin chiyul cha manangu tutaninamu.

KUMWOV NZAMB WOM KUKAT KUTUCHIDIJ

3. Kukwatijan ni Jinswir 17:3, diyingishin ik dia usey tukweta dia kuchidijin muchim wetu? (Tal kand chipich.)

³ Diyingishin dia usey ditubachikina kuchidij muchim wetu wa chifanakesh did anch Yehova ukat kuushinshikinang. Chinech chirumburikin anch ukat kuman yom yakadiau antu akwau kuman ni wij wuntu wetu wa mukach. (Tang Jinswir 17:3.) Ukutukat anch twadandamen kutongijokin pa yiyul yend yiletina mwom. (Yoh. 4:14) Chawiy mwamu tukwichidij ku kwijond ni makasu ma Satan ni ma antu ayimp. (1 Yoh. 5:18, 19) Pitudandamedina kumusejin Yehova piswimp, rukat ni kalimish ketu mulong wendendiy yikupam. Mulong tusotinap kumunenganesh Tatukwetu, tukusal usu wa kukis chitongijok chawonsu chikutwisha kutushikij ku kusal chitil. Anch atupak kusal yom yiyimp, tufanyidin kwiyipul anch: ‘Mutapu ik nikutwisha kumunenganesh kwa kwisotin muntu wamekeshina rukat rijim mud riner?’​—1 Yoh. 4:9, 10.

4. Wom wa Yehova wamuchidija mutapu ik nambaz umwing chisu chamupakau?

⁴ Marta, nambaz wa mu Krowasi wapakau mulong wa kusal masandj wafunda anch: “Chankasikena kutong nawamp ni kwipuk kwisangaresh mu kachisu kakemp maku mam ma chitil. Pakwez wom wa Yehova wanchidija.”b Mutapu ik? Marta ulondin anch watongijokina pa yibudikin yafanyina kudiokal ku mupak uyimp. Niyetu tukutwish kusal mwamu. Ubaj ujim ud anch tukumunenganesh Yehova ni kushadish dilau dia kumwifukwil chikupu.​—Dis. 6:5, 6.

5. Yom ik ukutwisha kwilejin ku yom yamushikena Leo?

⁵ Anch twamwov Yehova wom, tukat kusal usu wakulik kusal yom yidia yiyimp. Leo, ushicha mu Congo Kinshasa, ukwet kashinsh ka yom yiney. Mivu yinying kupwa kwa kumubatish, wasambisha kwend ni arund ayimp. Watonga anch kwadingap kwau chom chiyimp mulong kadingap kwend kiyandjikinap mwi njil yiyimp, ni kakumurumbukinap kwend Yehova. Pakat kulab, arund inay ayimp amwandjika mwi njil ya maar ni ya masandj. Wasambisha kutongijokin pa yom yamufundishau kud anvajend in Kristu ni piur pa musangar washadishay wa kumusadin Yehova. Chibudikin ik chikalaku? Wachirisha manangu. Nich ukwasha wa amakurump, wamuchirikina kand Yehova. Nlel usadin nich musangar mud mukurump wa chikumangen ni mud chibol wa pakampwil.

6. Amband ik aad a chifanakesh tukimbina kwisambin katat?

⁶ Tushinshikinany yom yilondinay Jinswir shapitre 9, mu tutangina piur pa manangu ni usup, yom yifanakeshinau nau amband aad. (Ilikej ni Rom 5:14; Galatia 4:24.) Patusadina mwamu, ijik anch mangand ma Satan mizwil ni yaku ya masandj ni ya kutal pornografi. (Efes 4:19) Chawiy, chid cha usey anch tudandamena kukudish wom wa Nzamb ni kwipuk kusal yom yiyimp. (Jnsw. 16:6) Etu awonsu, twikala amakundj ap amband, tukutwish kutaninamu mu yom yisambidinau mu shapitre winou. Umwing ni umwing wa amband inay amulejen anch ukat kutazuk antu akad manangu—antu “[akad] yitongijok.” Chid mud akat kulond anch: ‘Ez mu chikumbu cham, ni diangap ya kudia.’ (Jnsw. 9:1, 5, 6, 13, 16, 17) Pakwez kud kushalijan kujim piur pa yibudikin ya antu itiyina ku kutazuk kwinoku.

IPUK NJIL YA USUP

7. Kukwatijan ni Jinswir 9:13-18, kwisu kukata kushikij kutazuk kwa amband inay ayisup? (Tal kand chipich.)

⁷ Shinshikin kutazuk kudiokila kud “mband chisup.” (Tang Jinswir 9:13-18.) Ukat kuyitazuk nich kutakaman antu aburedina manangu anch: “[Sutilany] kunoku” ni tusalany musambu. Yom ik yikuyishikena kwinsudien? “Mu chikumbu mwinimwa mudi afu.” Ukutwish kuvurik mazu ma chifanakesh mafanijadina ni minam madia kwisambishil kwa Jinswir. Atubabeshin piur pa “mband wa kusochik” ni “wa usund.” Atulejin anch: “Chikumbu chend chiyil ku rufu.” (Jnsw. 2:11-19) Jinswir 5:3-10 ukwet kubabesh kukwau piur pa “mband wa kusochik” mukwau ulejenau anch “mend yend yikurumukin kuya ku rufu.”

8. Mupak ik tufanyidina kukwat?

⁸ Antu akat kumutesh “mband chisup” afanyidin kutond anch akwitiy kutazuk kwend ap bwat. Niyetu chikutwish kutushiken kukwat mupak mud winou. Chisu turishina ni milong ya masandj ap pornografi, mud muyivulijadina mu jinsangu ap pa internet, mupak ik tukukwata?

9-10. Mayingishin ik mafanyidina kutubachik kwipuk chisal cha masandj?

⁹ Kud mayingishin ma usey makutwisha kutukwash kwipuk yisal ya masandj. “mband chisup” amulejen mud ukat kulond anch: “Mem ma wij matadil.” “mem ma wij” Yom ik? Bibil ufanakeshin kumanijan kwa ikundj ni mband adia mu uruw nich mem matadila. (Jnsw. 5:15-18) Ambay a uruw atijadina kal kukwatijan ni mbil ya ngand akutwish kusanger kumanijan mu mutapu uwanyidina. Pakwez chishalijadin kamu ni “mem ma wij.” Chinech chimekeshin chisal cha masandj chikangeshinau. Chisal chinech chisadikidining ku ujindj, mud mukatay mwij kwiy ku ujindj. “Mem ma wij” makutwish kumekan pakampwil mud matadil anch antu ipanina mu chisal chinech atong anch kwikil muntu uyimena. Cha ushon nakash! Mulong Yehova umen yawonsu. Kushadish dilau dia Yehova chawiy chom chipandakena kuyip mu mwom, chawiy kwikil chom chikutwisha ‘kutaal’ anch chom chinech chikutushikij ku kushadish dilau dined. (1 Kor. 6:9, 10) Pakwez kud yom yikwau yivud.

¹⁰ Masandj makutwish kutuletin usany, kwiyov anch tukwetap usey, madikaj makad kuchingejin, ni kujip majuku. Chakin kamu, chid cha manangu kwipuk kuya ku “chikumbu” cha mband chisup ni kudia ya yakudia yend. Antu akata kusal masandj akat kufa mu spiritu, ni akutwish kukwachik mayej makutwisha kuyijip. (Jnsw. 7:23, 26) Shapitre 9, verse 18 upwishin ni mazu malondina anch: “Atazukay ad mwi ndond ya afu.” Chawiy mulong wak ukatau antu avud kwitiy kutazuk kukweta yibudikin yiyimp mwamu?​—Jnsw. 9:13-18.

11. Mulong wak chid cha ubaj nakash kutal pornografi?

¹¹ Mupit ujim tufanyidina kwipuk ud pornografi. Antu amwing atongining anch kutal pornografi kuyipinap kwau. Pakwez pornografi ukutwish kuyisal antu nayimp, kuyipwishikish kalimish, ni kuyikadish aswik. Anch muntu watal yipich yijondila, chikasikening kuyivuramen mu manangu. Cha ubaj kupandakan chid anch pornografi kakata kuyikwash antu kulik maku mayimp, pakwez ukat kumapandakesh. (Kol. 3:5; Jak. 1:14, 15) Chakin kamu,antu avud akata kutal pornografi akat kushiken ku yisal ya masandj.

12. Pantaliken ni yipich, mutapu ik tukutwisha kumekesh anch tusadin usu wa kwipuk masandj?

¹² Yom ik tufanyidina etu in Kristu kusal anch yipich ya pornografi yamekan pa telefon ap tablet wetu? Tufanyidin kudioshaku mes metu kapamp kamwing. Chikutwish kutuswapel kusal mwamu anch twavurik anch chom cha usey nakash tukweta ud urund wetu ni Yehova. Ap yipich yakad kwikal ya pornografi yikutwish kutulangwish maku ma kusal masandj. Mulong wak tufanyidina kuyipuk? Mulong tukatinap kusal kachom ap kakemp kakutwisha kutushikij kwikal ni yitongijok ya kusal masandj mu muchim wetu. (Mat. 5:28, 29) David udia mukurump wa chikumangen mu Tayiland ulondin anch: “Nikat kwiyipul amwinam anch: ‘Ap anch yipich yimeken anch yidiap ya pornografi, ov, Yehova ukat kusangar chisu niyitadina?’ Kutong mutapu winou kukat kwinkwash kusal yom nich manangu.”

13. Yom ik yikutukwasha kusal yom nich manangu?

¹³ Chom chikutwisha kutukwash kusal yom nich manangu kud kukudish wom wakin wa kulik kumunenganesh Yehova. Wom wa Nzamb diawiy “disambishil dia manangu.” (Jnsw. 9:10) Chom chinech achovakeshin mu mazu ma kusambish ma Jinswir shapitre 9, mumufanakeshinau mband mukwau nich “manangu [makin].”

ITIY KUTAZUK KWA “MANANGU [MAKIN]”

14. Kutazuk ik tunanina mu Jinswir 9:1-6?

¹⁴ Jinswir 9:1-6. Mwinomu tutaninamu kutazuk kudiokila ku Musul ni Mufulandal wa manangu makin, Sakatang wa manangu min mawonsu. (Jnsw. 2:6; Rom 16:27) Kufanakesh kusadinau pinap kud kwa chikumbu chijim chikweta manguj sambwad. Chinech chimekeshin anch Yehova ud mwin kupan ni kuyak antu awonsu akatina kusadin manangu mend mu mwom wau wawonsu.

15. Yom ik yitwitinay Nzamb kusal?

¹⁵ Yehova ud mwin kupan ukata kuwanyish maswir mu chilik chipandakena. Mikadil yend yiney yikat kumeken mu “manangu [makin],” mu Jinswir shapitre 9 majimbwilau mud mband. Rusangu rimekeshin anch mband wa chifanakesh winou wisuka mbij, wabomb maar ma nviny, ni warijeka mes mu chikumbu chend. (Jnsw. 9:2) Chikwau kand, kukwatijan ni verse wa 4 ni wa 5: “Manangu [makin] makat kumwel muntu wakad yitongijok yakin anch: ‘Ezany udianyap yakudia yam.’” Mulong wak tufanyidina kuya ku chikumbu cha manangu makin ni kudia yakudia yimapanina? Yehova ukatin anch anend ikala in manangu ni in kwilam. Kakatinap anch twileja malejan ma usey mu mutapu uyimp, charumburik anch kusutin yibudikin yiyimp yikutwisha kutusal nayimp. Chawiy chisadina anch “ndiy ukat kuyilamin in kutentam manangu makin.” (Jnsw. 2:7) Anch twakudish wom wakin mulong wa Yehova, tukukat kumusangaresh chisu chawonsu. Tukutesh yiyul yend ya manangu, ni tukwikal ni musangar wa kuyisadin.​—Jak. 1:25.

16. Wom wa Nzamb wamukwasha Alain mutapu ik kukwat mupak wa manangu, ni yibudikin ik yikalaku?

¹⁶ Shinshikin mutapu kwikal ni wom wa Nzamb kwamukwasha Alain kukwat mupak wa manangu. Mukurump winou mwin Kristu ni udia mulej ulondin anch: “Ambay nam a mudimu avud atalang ma pornografi, ni kud awiy, chadinga mulong wa kwilej mutapu wa kulalijan.” Pakwez Alain kitiyap. “Mulong wa wom wa Nzamb,” ulondin anch: “Nalika ni muchim umwing kutal mafilim minam. Ni nayirumburila ambay nam diyingishin nalikina.” Wasadina chiyul chidiokila ku “manangu [makin]” mulong wa kwend “salal mu jinjil ja ronganyin.” (Jnsw. 9:6) Pamanau kutakaman kwa Alain, ambay nend amwing asambisha kwilej Bibil ni kuya ku yikumangan.

17-18. Yiyukish ik yikusangerau antu itiyina kutazuk kwa “manangu [makin],” ni yom ik yikutwishau kuchingejin? (Tal kand chipich.)

¹⁷ Kusutin kusadin chilakej cha amband a chifanakesh, Yehova utulejin mutapu tukutwisha kwikal ni musangar wa machuku ma kurutu. Antu akat kwakul ku kutazuk kwa “mband chisup”, akat kushinshikin pa kwisangaresh nich chisal cha masandj. Pakwez akat kuvuramen anch yom yisadinau yikwikal ni yibudikin yiyimp pad awiy mu machuku ma kurutu. Disudien diau dikwikal “mwi ndond ya afu.”​—Jnsw. 9:13, 17, 18.

¹⁸ Pad kamu kushalijan kujim nau antu akata kwitiy kutazuk kwa “manangu [makin]”. Angendj end akat kusanger katat yakudia yisukinau nawamp ni yitungina mujimbu, ku musambu kupaninau yakudia ya mu spiritu. (Isay 65:13) Yehova walonda kusutin muprofet Isay anch: “Ziyilany, usalany mudi mudia dizu diam. Mwamu ukusangarany nich yakudia yipandakena kuwap.” (Isay 55:1, 2) Tukat kwilej kukat yom yikatinay Yehova ni kukis yom yikisinay. (Kus. 97:10) Ni tukat kutan musangar mu kuyitazuk antu akwau mulong wa kwez kutaninamu mu “manangu [makin].” Chid mud tukat “kubarokin pa yinanginang ya piur pa musumb anch: ‘Muntu mwawonsu wa mwamu chifanyidin asutin kunoku.’” Yiyukish tukutambula pamwing nau antu atuteshina yikwikalap ya ka chisu kakemp. Yikwikal ya chirung chilemp, ni yikutukwash “kushakam” chikupu pitudandamedina kwend “salal mu jinjil ja ronganyin.”​—Jnsw. 9:3, 4, 6.

19. Kukwatijan ni Mulej 12:13, 14, mupak ik tufanyidina kukwat? (Tal kand mushet ulondina anch: “Tukat kutaninamu mu Wom wa Nzamb.”)

¹⁹ Tang Mulej 12:13, 14. El wom wa Nzamb udandamen kuking michim yetu ni kutukwash kushal ishitwila mu manangu ni mu spiritu mu chirung chinech cha machuku ma nsudien makash. Wom wakin ukutubachik kudandamen kuyitazuk antu avud mulong wa kwez kukimb ni kutaninamu mu “manangu [makin].”