Yehova Ukat Kutesh Kudil Kwey

1-2. Yom ik yikutwisha kutudidish?

YISU yimwing etu awonsu tukat kubudish mansoj. Anch yom yiwamp yatushiken tukat kudil mulong wa musangar. Chilakej, pamwing ap wadila mulong chom cha pakampwil nakash chakushikena, mud chisu chavadikay mwaney. Ap pamwing ap wadila chisu wavurika chom chakusangaresha nakash ap chisu wamumana muruney kupwa kwa mivu yivud.

² Pakwez yisu yivud tukat kudil mulong wa ushon ni mulong wa mar. Chilakej anch muntu tuchingejidina waturumbukin. Tukutwish kand kudil chisu tuyedina nakash ap anch twafish mukatish netu. Pa yisu mud yiney, tukutwish kwiyov mud mutapu wiyovay muprofet Yeremiy pasheshau musumb wa Yerusalem kud in Babilon. Yeremiy walonda anch: “Mu mes mam mukat kuurumuk mansoj . . . Mes mam [makat] kupwek mansoj.”​—Mad. 3:48, 49.

3. Mutapu ik ukatay Yehova kwiyov anch atushalapol end amen mar? (Isay 63:9)

³ Yehova wij kamu nawamp yisu yawonsu tukata kudil mu mwom wetu mulong wa yikokujol. Bibil ulondin anch wij chisu chawonsu chikatay kashalapol wend win mwawonsu kuman mar, ni ukat kututesh chisu tukata kumwit ukwash mu malembil. (Kus. 34:16) Pakwez Yehova ukat kutusadin yom yivud kusutamu kwau kutuman ap kututesh. Ud kamu Tatukwetu ni utukatin nakash. Chawiy anch watuman tukat kudil, ukat kwov ushon nakash ni kutukwash pakad kulab.​—Tang Isay 63:9.

4. Yilakej ik ya mu Bibil tukushinshikina, ni yom ik tukwileja piur pa Yehova?

⁴ Mu Dizu dend, Yehova utulejin mutapu wiyovay chisu chadilau atushalapol end ni mutapu wayikwashay. Tukutwish kuman yom yiney kusutin kushinshikin chilakej cha Ana, David ni Mwant Ezekias. Yom ik yayididisha? Yom ik yasalay Yehova mulong wa kuyikwash? Ni mutapu ik ukutwisha chilakej chau kutukwash anch twovil ushon, anch aturumbukin ni anch tukwetap ruchingej?

KUDIL KUDOKILA KU USHON

5. Mutapu ik wiyovay Ana mulong wa chikokujol chading chirishinay nich?

⁵ Ana warisha ni milong kushalijan yamuletina runeng nakash ni yamudidisha. Wading ku uruw wa rupad ni mukajinend Penina wading umukisin nakash ni wamuzengolang. Chikwau kand Ana wading mumb, pakwez Penina wavala an avud. (1 Sam. 1:1, 2) Penina wamusipang Ana mulong wading mumb. Anch yeya, mutapu ik wafanyina kwiyov? Mulong Ana wading ni ushon “wadilanga walik kudia” ni “wanenganana nakash mu muchim wend.”​—1 Sam. 1:6, 7, 10.

6. Yom ik yasalay Ana mulong wa kwikal ni usu?

⁶ Yom ik yasalay Ana mulong wa kwikal ni usu? Waya ku dizang, ndond yamwifukwilangau Yehova. Pashikay kwinikwa, pamwing ap piswimp ni dibur da dizang, “walembila kud [Yehova] ni kudil mansoj.” Wamwilembina Yehova anch: “Ez utal pa ushon wamam, mwilomb wey, ni kwinvurik.” (1 Sam. 1:10b, 11) Ana wamuleja Yehova mutapu wading wiyovilay. Yehova wova kamu ushon nakash pamumanay mwanend changadim ukat kudil.

7. Mutapu ik wiyovay Ana kupwa kwa kumulembil Yehova?

⁷ Mutapu ik wiyovay Ana kupwa kwa kumulembil Yehova ni kumwinkish kashinsh kud Mwin Kupesh Mujim Eli? Bibil ulondin anch: “Ndiy waya kwol kwend ni kudia, chawiy ushon wapwa mu muchim wend.” (1 Sam. 1:17, 18) Ap anch chikokujol chend chading kand kal chipwa, Ana wiyova kamu pee! Wapana chisend chend chading chimulimidina kud Yehova. Ni Yehova wamana yakamish yend, watesha malembil mend ni mu kusut kwa chisu wapwisha chikokujol chend.​—1 Sam. 1:19, 20; 2:21.

8-9. Kukwatijan ni Hebereu 10:24, 25, mulong wak chid cha usey kuya ku yikumangan? (Tal kand chipich.)

⁸ Yom twilejidinaku. Ov, urishin ni chikokujol chikash chisadina anch ubudish mansoj? Pamwing ap wovil ushon mulong wafishin mwanamakwey ap muruney. Mu yisu mud yiney, chiyipinap kwau kwov ja kwikal amwiney. Pakwez vurik chilakej cha Ana. Waya ku dizang ni kwinikwa Yehova wamukasikesha. Chilik chimwing, Yehova ukutwish kukukwash ni kukukasikesh anch waya ku yikumangan, ap anch wovil kuziy ni unenganen. (Tang Hebereu 10:24, 25.) Anch twatesh maverse makasikeshina ku yikumangan, Yehova ukutwish kutukwash kuswimp yitongijok yiyimp nich yiwamp. Mwamu tukutwish kwiyov kamu pee ap anch chikokujol chetu kand kal chipwa.

⁹ Ku yikumangan yetu, tukat kusanger kand urund uwamp nau ambay netu in Kristu, akata kutukasikesh ni kutumekeshin rukat rakin. (1 Tes. 5:11, 14) Shinshikin chilakej cha mukadivar umwing uda chibol wa pakampwil wafisha mukajend. Walonda anch: “Nikat kudil kamu ni katat. Yisu yimwing, nikat kushakam mu dikonk ni nasambish kwam kudil. Pakwez yikumangan yikat kwinkasikesh kamu nakash. Mazu ma rukat makatau kwinlej kud akadivar nau anambaz, ni yakul yau ku yikumangan yikat kwinkasikesh nakash. Chikalap nchik ushon ni runeng nikweting kurutu kwa kuya ku yikumangan, nikat kwiyov kamu pee chisu chawonsu nikata kuya.” Chisu tuda ku yikumangan, Yehova ukutwish kutukwash kusutin akadivar nau anambaz netu.

10. Mutapu ik tukutwisha kwimburij chilakej cha Ana anch turishin ni yakamish?

¹⁰ Ana wiyova nawamp kupwa kwa kumulembil Yehova ni kumulej mutapu wading wiyovilay. Niyey ukutwish ‘kudjubwil yakamish yey yawonsu kud Yehova,’ ni kwikal ni kashinsh anch ukukutesh. (1 Pita 5:7) Nambaz umwing wading ni nfumwend wajipau kud ij, walonda anch: “Nova mud muchim wam aupuchol kal wawonsu ni kwikil kand mutapu wa kuwok. Pakwez chisu chawonsu namulembilang Tatukwam wa rukat, Yehova, niyovang kamu pee! Yisu yimwing, natwishangap kulond mutapu niyovila, pakwez ndiy wanteshang. Chisu nading novila ushon nakash, namulembilang chakwel angikish chisambu. Kapamp kamwing novang kamu zoong ni natwishang kusal yom nading nikweta kuswir kwa kusal dichuku dinida.” Anch wamulej Yehova yakamish yey, niyend ukat kwov ushon ni kutesh kamu nawamp mutapu wiyovila. Ap anch mulong wey upwilap kapamp kamwing, Yehova ukutwish kukwongoj ni kukukwash kwiyov zoong. (Kus. 94:19; Fil. 4:6, 7) Ni ukuyukish usu usadina mulong wa kushal ushinshamena kud ndiy.​—Heb. 11:6.

KUDIL KUDOKILA KU KUTURUMBUKIN

11. Mutapu ik wiyovay David parishay nich yikokujol yikash?

¹¹ Mu mwom wend, David wajijamena yikokujol yikash yivud yamudidisha. Kwading antu avud ading amukisina. Ap arunend amwing ni antu a mu dijuku dend kamushinshamenap ni apakisha kumusal nayimp. (1 Sam. 19:10, 11; 2 Sam. 15:10-14, 30) Pading parishinay nich chikokujol chikash mu mwom wend, wafunda anch: “Nikat kuziy nakash mulong wa kukimok. Nikat kukudidil ey uchuku ni uchuku, ni kutalesh ulal wam nich mansoj.” Mulong wak David wiyova mwamu? Walonda anch: “Mulong wa in kwinzengol.” (Kus. 6:7, 8) Chisu chamuzengolau David nakash kud antu, wova ushon ni wadila nakash.

12. David wading wiyovil mutapu ik piur pa Yehova?

¹² Chikalap nchik yikokujol yarishay nich, David wading ukwet kashinsh anch Yehova wading umukatin. Wafunda anch: ‘Yehova ukutesh kudil kwam.’ (Kus. 6:9) Chisu chikwau kand, David wafunda mazu makasikeshina nakash mada mu Kuseng 56:9. (Tang.) Anch watang mazu minam, ukuman anch Yehova utukatin nakash ni ukat kubangin yovil yetu. David walonda anch chid mud Yehova watekang mansoj mend mu mulond ap kumafund mu buku. David wading ukwet kashinsh anch Yehova wamushinshikinang ni wamanang mar mend. David wading kand ukwet kashinsh anch Tatukwend wa rukat uda mwiur wading wij milong yend yawonsu ni wading wij kand mutapu mwayading yimusadina.

13. Anch antu akurumbukin, yom ik ufanyidina kulam mu manang? (Tal kand chipich.)

¹³ Yom twilejidinaku. Ov, uziyin nakash mulong muntu wada uchingejidina wakusadidin mu mutapu uyimp? Pamwing ap unenganen nakash mulong akulikin kud muntu wada ukimbina kwatijan nend ap mulong mbay ney wa uruw wakutombukidin, ap kand mulong muntu ukatina nakash walikinap kumusadin Yehova. Mukadivar umwing wading ni mband wasala chitil cha makaj ni kumuchininap, walonda anch: “Natonginap anch chom chinech chikutwish kwinshiken. Niyova mud nid muntu wakad usey, nova ushon ni ujim.” Anch urishin ni yikokujol mud yiney, ikal ni kashinsh anch Yehova kakulikap bwat. Mukadivar winou ulondin kand anch: “Najingunina anch urund tukweta nau antu akwau ukutwish kuyip, pakwez Yehova ukudandamen kwikal netu. Chikalap nchik yom yikutwisha kushiken, ukutukwash. Kakuyilikap atushalapol end ashinshamena.” (Kus. 37:28) Vurik kand anch, Yehova ukukatin nakash kusutamu muntu win mwawonsu. Anch muntu ukatina nakash wakurumbukin, chisansening kamu nakash. Pakwez chinech chikuswimpap mutapu ukumenay Yehova, udandamedin kwikal wa usey kud ndiy. (Rom 8:38, 39) Uyakin ud anch, chikalap nchik yom yakusadidinau kud muntu, Tatukwey uda mwiur ukukatin.

14. Kuseng 34:19 utwinkishin kashinsh ik?

¹⁴ Anch muntu waturumbukin, tukutwish kand kutan dikasikesh mu mazu ma David mada mu Kuseng 34:19. (Tang.) Buku umwing ulondin anch antu “akweta michim yinenganena” akutwish kuyifanikesh ni “antu akad chom chiwamp mukach mwau.” Mutapu ik ukatay Yehova kuyikwash antu iyovila mwamu? Yehova “udi piswimp” niyetu. Ud mud tatuku ap maku umwongojina mwanend udidina. Anch tunenganen mulong muntu kanang watutombukidin ap watulikin, Yehova ukat kutesh mutapu twiyovila ni ukutukwash pakad kulab. Ud kwaku mulong wa kutukasikesh chisu tunenganena ap anch tutongin anch tukwetap kand usey. Ni utukanin yom yivud yikutwisha kutukwash kujijamen yikokujol turishina nich.​—Isay 65:17.

KUDIL KUDOKILA KU KUBUREN RUCHINGEJ

15. Chikokujol ik charishay nich Ezekias chamunenganesha nakash?

¹⁵ Padingay ni mivu 39, Mwant Ezekias wa Yuda wayela nakash. Yehova wamutuma muprofet Isay mulong wa kumulej anch ukufa kwend. (2 Ant 20:1) Ezekias kadingap kand ni ruchingej. Pateshay mazu ma muprofet Isay, wova ushon ni wadila nakash. Wamwilembina Yehova nakash mulong wa kumwit ukwash.​—2 Ant 20:2, 3.

16. Yom ik yamusadinau Ezekias kud Yehova?

¹⁶ Pateshay Yehova malembil ma Ezekias ni kuman mansoj mend, wamwovila riy. Nich ranaken wamuleja anch: ‘Am natesh kal malembil mey, naman kal mansoj mey. Tal nikukwok.’ Kusutin Isay, Yehova wamuleja Ezekias anch ukulepishaku mwom wend ni ukuyikwol in Yerusalem mu makas ma in Asiria.​—2 Ant 20:4-6.

17. Mutapu ik ukatay Yehova kutukwash chisu turishina ni mayej makash? (Kuseng 41:4) (Tal kand chipich.)

¹⁷ Yom twilejidinaku. Ov, urishin ni mayej mamekena mud makupwap kwau? Mulembila Yehova ap nich mansoj ku mes. Bibil utwinkishin kashinsh anch ‘Tatuku wa riy rijim ni Nzamb wa rongoj rawonsu,’ ukutukasikesh mu yikokujol yetu yawonsu. (2 Kor. 1:3, 4) Nlel tukutwishap kuchingej anch Yehova apwish milong yetu yawonsu, pakwez tufanyidin kwikal ni kashinsh anch ukutukwash. (Tang Kuseng 41:4.) Kusutin spiritu wend utumbila, Yehova ukat kutwinkish usu, manang ni chisambu cha mukach mulong wa kujijamen yikokujol yetu. (Jnsw. 18:14; Fil. 4:13) Ukat kutukasikesh kand kusutin ruchingej ritwinkishinay mu Dizu dend Bibil ra kupwish mayej min mawonsu.​—Isay 33:24.

18. Verse ik ukata kukukasikesh chisu urishina ni chikokujol chikash? (Tal mushet “Maverse Makutwisha Kutukasikesh Chisu Tunenganena.”)

¹⁸ Ezekias wikala ni usu kusutin mazu ma Yehova. Chilik chimwing, niyetu tukutwish kwikal ni usu kusutin yom yitulejinay Yehova mu Dizu dend. Chisu tunenganena, mazu ma Yehova mada mu Bibil makutwish kutukasikesh ni kutukwash kwiyov zoong. (Rom 15:4) Nambaz umwing wa mu Afrik wa Kurand wadilang chisu chawonsu pamukwatau kanser. Ulondin anch: “Verse wankasikesha nakash ud Isay 26:3. Ap anch yisu yivud tukutwishap kamu kuswimp mashakamin metu, verse winou utwinkishin kashinsh anch Yehova ukutukwash kwikal ni chisambu ni kujijamen chikokujol chin chawonsu turishina nich.” Ov, kud verse ukata kukukasikesh pakampwil chisu urishina ni chikokujol chikash, pamwing ap chimekena mud chikutwishap kupwa?

19. Yom ik tufanyidina kuchingej mu machuku ma kurutu?

¹⁹ Disuden da mangand minam did piswimp nakash, ni tuchingejin anch yikokujol yikash yikupandakan kuvul. Pakwez mud twamana kal kusutin chilakej cha Ana, David ni Mwant Ezekias, Yehova ukat kutesh kudil kwetu ni ukat kunenganan. Ukat kuman mansoj metu. Chawiy chisu turishina ni chikokujol, tufanyidin kumwazuril muchim wetu mu malembil. Tufanyidin kushal piswimp nau akadivar ni anambaz netu in Kristu. Ni chisu tutangina Bibil tukutwish kand kutan rongoj ra Yehova. Tufanyidin kwikal ni kashinsh anch Yehova ukutufut anch twashal ashinshamena kud ndiy. Ni utukanin anch pa chisu chiwanyidina, ‘ukukuswol mansoj mawonsu’ tukata kubudish mulong wa kusansan. (Kuj. 21:4) Pa chisu chinicha, tukubudish kwetu ching mansoj ma musangar.