MUTU WA MULONG WA KWILEJ WA 42
MUMINY 44 Malembil ma Mwin Kwikepish
Kuwapish Mutapu Wetu wa Kulembil
“Nikat kukutazuk nich muchim wam wawonsu. [Yehova],ngakulap amboku.”—Kus. 119:145.
MU WISWIMP
Tukuman anch kutongijokin pa malembil mafundinau kal mu Bibil kukutukwash kuwapish mutapu wetu wa kulembil.
1-2. (a) Yom ik yikutwisha kutukangesh kumufungwil Yehova muchim wetu? (b) Mutapu ik twija anch Yehova ukat kutesh nawamp malembil metu?
OV, YISU yimwing ukat kuman anch malembil mey mad kwau ma kuchirokin ap ma piur piur? Anch mwawiy, udap amwiney. Mulong etu awonsu tukwataken nakash, yisu yimwing tukat kusal kwetu malembil miswimp ni kuvuramen kusal malembil makurikina. Ap kand chikutwish kutukasiken kumufungwil Yehova muchim wetu mulong tutongin anch tuwanyidinap kumusejin piswimp.
2 Bibil utufundishin anch cha usey kud Yehova kadap mutapu tukata kulembil, pakwez kwijik anch malembil metu madokil mu muchim. Ukat kutesh “kulembil kwa antu itudishina.” (Kus. 10:17) Ukat kutesh nawamp yom yawonsu tumulejina mulong utubangidin.—Kus. 139:1-3.
3. Yipul ik yikwakulau mu mutu wa mulong winou?
3 Mu mutu wa mulong winou tukwakul ku yipul yilondwilaku ey: Mulong wak tufanyidinap kwidjidjek kumulembil Yehova nich muchim wetu wawonsu? Mutapu ik tukutwisha kuwapish malembil metu? Kutongijokin pa malembil madokila ku muchim mafundinau mu Bibil kukutukwash mutapu ik kuwapish malembil metu? Ni yom ik tukutwisha kusal anch chitukasikedin kubudish yovil yetu chisu tukata kulembil? El tutanany yakul ku yipul yiney.
KANGAL WIDJIDJEK KUMULEMBIL YEHOVA
4. Yom ik yikutwisha kutukwash kumulembil Yehova pakad kwidjidjek? (Kuseng 119:145)
4 Ang twajingunin anch Yehova ud murund ushinshamena ni ukatina uwamp wetu, chikutuswapel kumulembil pakad kwidjidjek. Muntu wafunda Kuseng 119 wasala usu wa kumuman Yehova mu mutapu winou chisu chamulembilangay. Warishang niyend ni yikokujol. Antu amwing amudimbena makasu. (Kus. 119:23, 69, 78) Chikwau kand, waziyang yisu yimwing mulong wa kurumbok kwend. (Kus. 119:5) Ap mwamu, kidjidjekangap kumufungwil Yehova muchim wend.—Tang Kuseng 119:145.
5. Mulong wak tufanyidinap kulikidil chom ap chimwing kutukangesh kumulembil Yehova? Let chilakej.
5 Yehova uyitin ap antu asadina kal yitil yikash kumulembil. (Isay 55:6, 7) Chawiy tufanyidinap kulikidil chom ap chimwing chitukangesh kumulembil. Chilakej, tong bil mud anch muntu washadik mwi mpay chad waman antu akutwisha kumukwash, ov, ukwidjidjek kuyitazuk mulong wa usany? Bwat kamu! Chilik chimwing, anch yisu yimwing twasal chitil, tufanyidinap kwidjidjek kumulembil Yehova.—Kus. 119:25, 176.
MUTAPU WA KUWAPISH MALEMBIL METU
6-7. Kutongijokin pa mikadil yiwamp ya Yehova kukutwish kutukwash mutapu ik kuwapish malembil metu? Let chilakej. (Tal kand mazu ma kwinshin.)
6 Anch twamulembil Yehova ni muchim wetu wawonsu, kusutin kumulej yom tutongina ni mutapu twiyovila, tukumusejin piswimp. Chawiy yom ik yikutwisha kutukwash kulembil mu mutapu winou?
7 Tongijokin pa mikadil yiwamp ya Yehova.a Anch twatongijokin chikurikina pa mikadil yend, chikutuswapel kumulej yitongijok yetu yawonsu. (Kus. 145:8, 9, 18) Shinshikin chilakej cha nambaz Kristine, wading ukweta tatuku wisumina. Ulondin anch: “Chading chinkasikedin kumuman Yehova mud Tatuku ukweta rukat. Niyovang anch ukutwish kwinlik mulong wa kurumbok kwam.” Mwikadil ik uwamp wa Yehova wamukwasha Kristine? Ulondin anch: “Natongijokina pa rukat rishinshamena ra Yehova, ni kusal mwamu kwanginkisha kashinsh anch Yehova winkatin. Nikwet kashinsh anch kakwinlikap. Ap anch nawap nchik, ukwinlangwish. Chinech chikat kwinkwash kumulej yom yam yawonsu yikata kwinletin musangar ap ushon.”
8-9. Mulong wak chid cha usey kutongijokin pa yom tukimbina kulond kurutu kwa kusambish kulembil? Let chilakej.
8 Tongijokin pa yom ukulonda. Kurutu kwa kulembil, ukutwish kwiyipul yipul yimwing. Chilakej: ‘Yikokujol ik nirishina nich katat? Ov, kud muntu nifanyidina kulikishin? Ov, nirishin ni chikokujol niswirikedina ukwash wa Yehova mulong wa kuchipandakan?’ (2 Ant 19:15-19) Tukutwish kand kulondul chilakej cha Yesu kusutin kutongijokin pa yom tukutwisha kwit kud Yehova pantaliken ni dijin Dend, Want Wend ni rusot Rend.—Mat. 6:9, 10.
9 Pijikay nambaz Aliska anch nfumwend ukwet kanser mu mutu wading umutwadina ku rufu, chamukasikena kulembil. Uvurikin anch: “Naziya nakash ni natwishap kulembil, mulong chading chinkasikedin kutong nawamp.” Yom ik yamukwasha? Urumburil anch: “Kurutu kwa kulembil, nishila chisu cha kutenchik yitongijok yam, ni kusal mwamu kwankwasha kwikal ni kashinsh anch malembil madap kusu ma kwitongin am amwinam. Kusal mwamu kwankwasha kwiyov pee ni kuchirish manang chisu nilembila.”
10. Mulong wak tufanyidin kusal usu wa kulembil mu chisu chiwanyidina? (Tal kand yipich.)
10 Itekina chisu chiwanyidina cha kulembil. Chid chakin anch malembil miswimp makutwish kutusejish piswimp ni Yehova, pakwez anch twitekin chisu chiwanyidina, tukutwish kumulej Yehova yom yivud yida mu muchim.b Alijah, ikundj wa Aliska ulondin anch: “Nikat kulembil tupamp tuvud pa dichuku, ni namusejidin Yehova piswimp kusutin kwishil chisu chiwanyidina cha kulembil. Yehova kachingedinap anch nipwish malembil swa swa, chawiy nikutwish kwishil chisu chilemp cha kulembil.” Pakish kusal mwamu: Kimb ndond ni chisu ukutwisha kulembil pakad kampuw, pamwing ap nich dizu da piur, ni ikal ni chaku cha kulembil mu chisu chiwanyidina.
Kimb ndond ni chisu ukutwisha kulembil mu chisu chiwanyidina (Tal paragraf wa 10)
TONGIJOKIN PA MALEMBIL MADOKILA MU MUCHIM MAFUNDINAU MU BIBIL
11. Mutapu ik tukutwisha kutaninamu anch twatongijokin pa malembil madokila mu muchim mafundinau mu Bibil? (Tal kand mushet: “Ov, Wiyovil Mud Mwiyovau?”)
11 Chikutwish kukukwash anch watongijokin pa malembil madokila mu muchim, kuseng, ni miminy yitumbila yafundau mu Bibil. Anch waman mutapu walondau atushalapol a Yehova yitongijok ya mu muchim, chikukuswapel kumufungwil Yehova muchim wey. Ukutwish kand kujingunin mazu masu ma kumushiman nich Yehova ukutwisha kusadin mu malembil mey. Ni ukutwish kutan malembil mamwing makwatijadina ni yishiken yey.
12. Yipul ik tukutwisha kwiyipul chisu tushinshikidina pa mazu masadidinau mu malembil?
12 Piutongijokidina pa mazu masadidinau mu malembil mafundau mu Bibil iyipula anch: ‘Nany ulondina mazu minam ni mu yishiken ik? Ov, makwatijadin ni yishiken yam? Malejan ik nikutwisha kudoshinaku?’ Chikutwish kukwit kukimbijol kand mulong wa kwakul ku yipul yiney ni chid kamu cha usey kusal mwamu. Tushinshikinany yilakej yimwing.
13. Dilejan ik tukutwisha kwilej piur pa malembil kusutin Ana? (1 Samwel 1:10, 11) (Tal kand cha pa chibur.)
13 Tang 1 Samwel 1:10, 11. Palembilay Ana malembil minam, wading urishin ni yikokujol yaad yijim. Wading mumb ni mukajinend wamuwejinang mar pa makwau. (1 Sam. 1:4-7) Anch urishin ni milong yakad kupwa, yom ik ukutwisha kwilejin ku malembil ma Ana? Wiyova pee kusutin kwitekin chisu chiwanyidina mulong wa kulembil ni kumulej Nzamb yom yawonsu yadingay nich ku muchim. (1 Sam. 1:12, 18) Niyetu tukutwish kutan rongoj anch twapan ‘yakamish yetu yawonsu kud Yehova’ kusutin kumulej mutapu twiyovila piur pa yikokujol kampand turishina nich.—Kus. 55:23.
Pading panenganenay nakash mulong wading mumb ni mulong amusipang chisu chawonsu kud mukajinend, Ana wamufungwila Yehova muchim wend (Tal paragraf wa 13)
14. (a) Yom ik kand yikwau tukutwisha kwilejin ku chilakej cha Ana? (b) Mutapu ik tukutwisha kuwapish malembil metu kusutin kutang ni kutongijokin pa Dizu da Nzamb? (Tal kand mazu ma kwinshin.)
14 Mivu yikemp kupwa kwa kumuval Samwel, Ana wamupana kud Mwin Kupesh Mujim Eli. (1 Sam. 1:24-28) Mu malembil mend madokila mu muchim, Ana wamujikitisha Yehova nakash mulong ukat kuyichidij ni kuyibangin atushalapol end ashinshamena.c (1 Sam. 2:1, 8, 9) Chimeken anch milong yend yapwap ku chikumbu, pakwez Ana washinshikina pa mutapu wamuyukishau kud Yehova. Dilejan ik kud etu? Chikutuswapel kurish ni yikokujol yakad kupwa swa anch twashinshikin pa mutapu watukwashinay kal Yehova kushik ni katat.
15. Anch twarish ni kuburen kutentam, yom ik tukutwisha kwilejin ku malembil ma muprofet Jeremiy? (Jeremiy 12:1)
15 Tang Jeremiy 12:1. Chisu chimwing mu mwom wend, muprofet Jeremiy wanenganana nakash pamanay antu ayimp akat kutwish yom yisadinau. Waziya kand mulong wa mutapu wamusadinangau kud ambay nend In Isarel. (Jer. 20:7, 8) Tukutwish kutesh nawamp yovil yadingay nich anch twaman antu ayimp akat kuya kurutu ni ap anch atusip. Ap anch Jeremiy wajimana, pakwez katongap anch Yehova uburedin kutentam. Pamanay mutapu Yehova wayipupay antwend, wikala kand ni kashinsh kupandakan anch ud Nzamb utentamina. (Jer. 32:19) Niyetu tukutwish kumulej Yehova mutapu chitusadina nayimp pa kuman antu aburedin kutentam. Ni chisu chawiy chimwing tukutwish kwikal ni kashinsh anch, pa chisu chiwanyidina Yehova ukusal chom kanang piur pa kuburen kutentam.
16. Anch twiyov anch tutwishinap kusal yom yimwing mulong wa yishiken yetu, yom ik tukutwisha kwilejin ku malembil ma Mwin Levi? (Kuseng 42:1-4) (Tal kand yipich.)
16 Tang Kuseng 42:1-4. Muminy winou aufunda kud Mwin Levi umwing wading wakad mutapu wa kwifukwil pamwing ni ambay nend In Isarel. Yom yafunday yimekeshin mutapu wading wiyovilay. Niyetu tukutwish kumutesh nawamp anch tukwetap mutapu wa kudokal ku chikumbu, chilakej mulong wa mayej ni anch atutek mu rukan mulong wa ritiy retu. Yovil yetu yikutwish kuswimpol chisu chawonsu, pakwez chid cha usey kuyilond mu malembil. Chinech chikutukwash kwijik nawamp yovil yetu ni kutuvurish yom yida chakin kamu ya usey. Chilakej, Mwin Levi winou wajingunina anch wading ukwet mitapu yikwau ya kumushiman Yehova. (Kus. 42:5) Watongijokina kand pa mutapu wading umubangidinau kud Yehova. (Kus. 42:8) Kumulembil Yehova nich win kashinsh kukutukwash kushinshikin nawamp yovil yetu, kwikal isikena ni kutwinkish usu wa kujijaman.
Mwin Levi wafunda Kuseng 42 wamufungwila Nzamb muchim wend. Anch twarumburil yovil yetu mu malembil, chikutwish kutuswapel kuman yom yida kamu ya usey (Tal paragraf wa 16)
17. a) Yom ik tukutwisha kwilejin ku malembil ma muprofet Yona? (Yona 2:1, 2) b) Mazu mamwing mada mu Kuseng makutwish kutukwash mutapu ik chisu turishina ni yikokujol? (Tal mazu ma kwinshin.)
17 Tang Yona 2:1, 2. Muprofet Yona wasala malembil minam padingay mwinvumu mwa insh mujim. Ap anch wamubwambwila Yehova, Yona wading ukwet kashinsh anch Nzamb ukutesh malembil mend. Mu malembil mend, Yona wasadina mazu mavud mada mu Kuseng.d Chimeken anch wading wij nawamp nakash maverse minam. Kusutin kumatongijokin, wikala ni kashinsh anch Yehova ukumukwash. Mutapu umwing kand niyetu, anch twasal usu wa kulam mu manang maverse mamwing, tukutwish kumavurik ni makutukasikesh chisu tukata kumulembil Yehova piturishina ni yikokujol.
DANDAMEN KUMUSEJIN YEHOVA MU MALEMBIL
18-19. Yisu yimwing, anch twakangany kumulej Yehova yovil yetu mu malembil, kashinsh ik tutanina mu verse wa Rom 8:26, 27? Let chilakej.
18 Tang Rom 8:26, 27. Yisu yimwing tukutwish kunenganan nakash ni kukangany kumulej Yehova mutapu twiyovila. Pakwez tuburedinap ukwash. Mu yisu mud yiney, spiritu utumbila wa Nzamb ukat “kutulondin.” Mutapu ik? Yehova wasadina spiritu wend mulong wa kuyibachik antu kufund malembil mavud mada mu Bibil. Chisu twakad kutwish kurumburil yovil yetu, Yehova ukutwish kwitiy mazu mamwing mada mu malembil minam, kumakwat anch yawiy yom tukimbina kumwit, ni ukutwish kumakul.
19 Chitongijok chinech chamukwasha nambaz Yelena wa mwi ngand ya Risi. Amukwata mulong walembilang ni kutang Bibil. Yelena wiyova nayimp nakash ni chamukasikena kulembil. Ulondin anch: “Navurika anch, ang niyakamish nakash ni nakangany kulembil, Yehova ukwitiy malembil mapepidilau ma atushalapol end a pakur . . . ni kumakwat mud mamam. . . . Chom chinech chankasikesha nakash mu chirung chikash nasutisha.”
20. Chisu tukweta yakamish, mutapu ik tukutwisha kwirijek mu manang kurutu kwa kulembil?
20 Anch tukwet yakamish, tukutwish kulembil oku mu manang mud yom yindj. Mulong wa kurijek manang, chikutwish kwikal cha usey kutesh Kuseng wakwatinau kal. Tukutwish kand kufund yovil yetu, mud mwasalay Mwant David. (Kus. 18, 34, 142.) Chakin, kwikil kwau mutapu ap umwing tufanyidina etu awonsu kulondul mulong wa kwirijek kurutu kwa kulembil. (Kus. 141:2) Muntu ni muntu ufanyidin kwirijek mu mutapu umenay anch ud uwamp kud ndiy.
21. Mulong wak tukutwish kulembil ni muchim wetu wawonsu?
21 Chitukasikeshin nakash kwijik anch Yehova ukat kututesh, ap kurutu kwetwetu kumulej yom tukweta ku muchim. (Kus. 139:4) Pakwez ukatin anch tumulej kand mutapu twiyovila, ni mutapu tumuchingejidina nakash. Chawiy kangal widjidjek kumulembil Tatukwey wa mwiur. Sadin mazu mada mu malembil mafundau mu Dizu dend. Lembil ni muchim wey wawonsu. Muleja yom yawonsu yikuletidina musangar ap ushon. Mud Muruney wakin, Yehova kakukulikap, pakwez ukwikal ney chisu chawonsu!
MUMINY 45 Kutongijok kwa Muchim Wam
a Shinshikin chikunku: “Mikadin Yimwing ya Yehova Yisangareshina” mu buku Mifund ya Ukwash Mulong wa Mashakamin ma Win Kristu, mu mutu wa mulong: “Yehova.”
b Yisu yivud, malembil masadiningau mulong wa chikumangen mading miswimp.
c Mu malembil mend, Ana walonda yom yifanakena ni yafunday Moses. Witekina chisu cha kutongijokin pa Dizu da Nzamb. (Kuv. 4:35; 8:18; 32:4, 39; 1 Sam. 2:2, 6, 7) Kupwa kwa mivu yivud, Mariy, makwend wa Yesu wasadina mazu ma kushiman nich mafanakena ni malonday Ana.—Luka 1:46-55.
d Chilakej, ilakej Yona 2:3-9 ni Kuseng 69:1; 16:10; 30:3; 142:2, 3; 143:4, 5; 18:6; ni 3:8 (pinap, maverse ma Kuseng amalongin kukwatijan ni mutapu wamajimbulau kud Yona.