Vurik Kuyilembil Antu Akwau

1. Mulong wak twija anch Yehova ukwatining malembil metu nich usey?

MALEMBIL chid chipan cha usey nakash. Tongin chom ech: Yehova wayinkishin kal angel yisend yimwing. (Kus. 91:11) Wamwinkishin kal kand Mwanend yisend ya usey nakash. (Mat. 28:18) Pakwez, chid nchik piur pa kutesh malembil? Chid chom chimutadina ching kusu Ndiy amwinend; Yehova, Nzamb “ukata kwakul kulembil kwetu”.​—Kus. 65:2.

2. Chilakej ik chatushilay kambuy Paul piur pa kuyilembil antu akwau?

² Ap anch tufanyidin kumulembil Yehova pakad kwidjidjek mulong wa kumulej yakamish yetu, tukutwish kand kuyilembil antu akwau. Yawiy yom yasalay kambuy Paul. Chilakej, wayifundina In Kristu a ku chikumangen cha Efes anch: “Nidandamedin kukujimbulany mu malembil mam.” (Efes 1:16) Paul walembilang kand mulong wa muntu ni muntu panrend. Chilakej, wamuleja Timote anch: “Nimujikitishin Nzamb, . . . nidandamedin kukuvurik mu malembil mam ma kwilemb uchuku ni muten.” (2 Tim. 1:3) Paul wading ni yakamish yend yafanyinangay kulembil. (2 Kor. 11:23; 12:7, 8) Chikalap nchik mwamu, witekinang kand chisu cha kuyilembil antu akwau.

3. Mulong wak chikutwish kutushiken kuvuramen kuyilembil antu akwau?

³ Yisu yimwing tukutwish kuvuramen kuyilembil antu akwau. Mulong wak? Nambaz Sabrinaa wajingunina diyingishin dimwing. Ulondin anch: “Mwom mu mangand minam ukasiken nakash. Tukutwish kushinshikin nakash pa milong yetu kushik ni mu chilik cha kulembil kwau ching mulong wa maswir metu.” Ov, yom yiney yakushikedinap kal niyey? Anch chid mwamu, mutu wa mulong winou ukutwish kukukwash. Ukwisambin yom yaad: (1) ukurumburil mulong wak chid cha usey kuyilembil antu akwau ni cha (2) ukulejan yom tukutwisha kusal mulong wa kuyilembil antu akwau.

MULONG WAK CHID CHA USEY KUYILEMBIL ANTU AKWAU?

4-5. Malembil metu mulong wa antu akwau “makwet usu” mutapu ik? (Yakobu 5:16)

⁴ Malembil ma antu akwau “makwet usu.” (Tang Yakobu 5:16.) Ov, kuyilembil antu akwau kukutwish kamu kuswimp yom yiyishikedina? Mwawiy, chikutwish kusadik. Yesu wading wij anch kambuy Pita ukumupungan, pakwez wamuleja anch: “Nakulembilang ey chakwel kangal ritiy rey raziy.” (Luka 22:32) Paul wading wij anch malembil makutwish kuswimp yom. Pamutekau mu rukan ku Rom pakad mulong, wamufundina Filemon anch: “Nichingejin anch kusutin malembil men akwinchirish kand kud en.” (Filem. 22) Yawiy yom yashikena kamu, amulikishaku Paul ni wasambisha kand kulejan.

⁵ Chakin kamu, chirumburikinap anch kusutin malembil tukutwish kumushindin Yehova kusal chom. Amwinend ukat kushinshikin yom yimulejinau antwend, ni pa chisu kanang ukat kutond kuyakul. Kwijik anch wawiy mutapu ukatay kusal yom kukutukwash kumulembil pakad kwidjidjek ni kusha milong yetu mu makas mend.​—Kus. 37:5; tal 2 Korint 1:11.

6. Mutapu ik tukutwisha kwiyov anch twalembil mulong wa antu akwau? (1 Pita 3:8)

⁶ Kuyilembil antu akwau kukat kutukwash kwikal ni “riy rakin.” (Tang 1 Pita 3:8.) Muntu ukweta riy ukat kuman mar ma muntu mukwau ni kusal chom kanang mulong wa kumukwash. (Marko 1:40, 41) Michael uda mukurump wa chikumangen ulondin anch: “Chisu nikata kuyilembil antu akwau, nikat kutesh nawamp yikokujol yirishinau nich ni chinech chikat kwimbachik kuyikat nakash. Nikat kwiyov anch nid nau piswimp ap anch kijap kwau.” Richard, mukurump wa chikumangen mukwau ulejen uwamp wa kuyilembil antu akwau. Ulondin anch: “Kuyilembil antu akwau kukat kutubachik kusal chom kanang mulong wa kuyikwash.” Ulondin kand anch: “Ang twamwinkish muntu tulembidina chom chiswirikedinay, tukumukwash kuman anch malembil mend amakwil.”

7. Kuyilembil antu akwau kukat kutukwash mutapu ik kwikal ni chitongijok chisikena pa milong yetu? (Filip 2:3, 4) (Tal kand yipich.)

⁷ Kuyilembil antu akwau kukat kutukwash kwikal ni chitongijok chiwamp piur pa milong yetu. (Tang Filip 2:3, 4.) Etu awonsu tukat kurish ni yikokujol mulong tushich mu mangand matakedinau kud Djabul. (1 Yoh. 5:19; Kuj. 12:12) Kwikal ni chaku cha kuyilembil antu akwau kukutukwash kuvurik anch “dijuku dawonsu da akadivar [netu] pa mangand dirishin ni mar ma mutapu umwing.” (1 Pita 5:9) Katherine uda chibol ulondin anch: “Kuyilembil antu akwau kukat kwinvurish anch niyau arishin ni yikokujol. Uyakin winou ukat kwinkwash kulik kutongin nakash pa milong yam.”

AKWET KUSWIR KWA MALEMBIL METU

8. Let yilakej ya antu tukutwisha kulembil.

⁸ Anany tukutwisha kujimbul mu malembil metu? Tukutwish kuyilembil antu avud—chilakej, antu ayedina, ansand asipinau ap abachikinau kusal yom yiyimp kud ambay nau a shikol ni antu arishina ni yikokujol yidokila ku upal. Ambay netu In Kristu avud akat kuyipompat mu majuku ap kud maguvernema. (Mat. 10:​18, 36; Mid. 12:5) Akadivar netu amwing asha yikumbu yau mulong wa kupwitamijan pantaliken ni milong ya chipolitik ya ngand yau. Akwau akat kurish ni mar madokila ku yom yatangau. Tuyijap kamu akadivar nau anambaz inay awonsu. Pakwez anch twayilembil, tukumekesh anch tulondwil mbil yatwinkishay Yesu anch “katijanany umwing ni mukwau.”​—Yoh. 13:34.

9. Mulong wak tufanyidin kuyilembil akadivar atakedina dirijek da Yehova kuwejinaku akajau?

⁹ Tukutwish kand kuyilembil antu awonsu atakedina dirijek da Yehova. Mud akadivar ada mu Chisak Chitakedila ni ankwash au, akadivar a mu Makomite ma Mutiy, antakel a midimu ku Betel, Atulam a Munyingumuk, amakurump a chikumangen ni ankwash a mudimu. Akadivar mud inay arishin niyau ni milong yau, pakwez akat kusal mudimu nakash mulong wa kutukwash. (2 Kor. 12:15) Chilakej, Mark uda kalam wa munyigumuk ulondin anch: “Chikokujol chijim nakash pakach pa yikokujol nirishina nich, kud kwikal kulemp nau anvajam ananapina kal. Awonsu aad kakwetap ukash wa mujimbu uwamp. Ap anch ayibangidin kud mpanyam ni nfumwend, chikat kwinsal nayimp kuman anch nitwishinap kusal yom yivud mulong wa kuyikwash.” Twijika ap bwat yikokujol yirishinau nich akadivar inay, chid cha usey kuyitek mu malembil metu. (1 Tes. 5:12, 13) Tukutwish kand kuyilembil amband a akadivar inay, mulong akat kuyikwash anfumwau nich kushinshaman chakwel andandamen kuwanyish yisend yau.

10-11. Ov, malembil ma mu uvud mulong wa akadivar nau anambaz netu mamusangareshining Yehova? Rumburil.

¹⁰ Mud twamana kal, yisu yivud tukat kulembil mulong wa akadivar nau anambaz. Chilakej, ap anch tukwetap muntu wa pakampwil mu manang, tukutwish kumwit Yehova chakwel ayikwash antu ada mu rukan, ap kuyongoj ashadishina akatish nau. Donald uda mukurump wa chikumangen ulondin anch: “Tukwet akadivar nau anambaz avud arishina ni yikokujol, chawiy yisu yimwing mulong wa kuyilembil awonsu tukat kuyijimbul mu uvud.”

¹¹ Ov, Yehova ukat kutesh malembil ma mutapu winou? Chakin kamu! Uyakin ud anch twijap kamu maswir ma ambay netu In Kristu awonsu. Chawiy, chid cha usey kuyilembil akadivar nau anambaz piur pa yom yijim yikutwishau kwikal nich kuswir. (Yoh. 17:20; Efes 6:18) Malembil minam mamekeshin anch ‘tukatin dijuku dawonsu da akadivar.’​—1 Pita 2:17.

CHISU ULEMBILA MULONG WA MUNTU NI MUNTU PANREND

12. Kuyishinshikin antu akwau kukat kutukwash mutapu ik kwijik yom ya kulond mu malembil metu?

¹² Ikal ni nkeu. Kudoshaku kuyilembil akadivar nau anambaz avud, chid cha usey kumujimbul muntu ni muntu pa dijin. Ov, mu chikumangen chen mud muntu urishina ni mayej makad kuyerik? Ov, mud nsand uziyina mulong wa yibachikin yikash yirishinay nich ku shikol? Ov, mud nvaj umena mar ma kumulil mwan amwinend “mu dipup ni mu umutakel wa Yehova”? (Efes 6:4) Anch wikal mwin kuyishinshikin antu akwau, ukuyikat nakash ni kuyanaken, ni mwamu ukwov ja kuyilembil.b​—Rom 12:15.

13. Mutapu ik tukutwisha kuyilembil antu twakad kwijik?

¹³ Yilembila antu akwau kusutin kuyijimbul pa majin. Tukutwish kusal mwamu ap anch kand kal tuyimanangap. Chilakej, mud akadivar nau anambaz ada mu jinkan mu jingand kushalijan mud mu Crimée, mu Eritre, mu Risi ni mu Singapour. Pa jw.org, ukutwish kutan majin ma akadivar ni anambaz ada mu jinkan.c Brian, uda kalam wa munyingumuk ulondin anch: “Kufund dijin da mukadivar ap nambaz uda mu rukan ni kudijimbul nich dizu da piur, kukat kwinkwash kumuvurik ni kumutek mu malembil mam.”

14-15. Mutapu ik tukutwisha kwijik yom tufanyidina kulond mu malembil metu?

¹⁴ Ijik yom ya kulond mu malembil. Michael, wajimbulangau kwinsambishin ulondin anch: “Chisu nikata kutang jinsang pa jw.org piur pa akadivar ada mu jinkan, nikat kwikasikesh kutong mutapu nikutwisha kwiyov anch nading niyam mu rukan. Nij anch nafanyina kwiyakamish mulong wa mukajam ni kwikal ni kashinsh anch ukwet yom yiswirikedinay. Kusal mwamu kukat kwinkwash kwijik yom nifanyidina kuyilembil akadivar nam ada mu rukan akweta amband.”​—Heb. 13:3, mazu ma kwinshin.

¹⁵ Anch twatongijokin mutapu uda mwom wa akadivar netu mu rukan, tukutwish kand kuman yom tukutwisha kulond mu malembil. Chilakej, tukutwish kulembil chakwel atulam a rukan ayisadin yom yiwamp ni chakwel antakel ayitiyin kumwifukwil Yehova. (1 Tim. 2:1, 2) Tukutwish kulembil chakwel chikumangan chikal chikasikeshinau kusutin chilakej cha akadivar nau anambaz ada mu jinkan ni chakwel antu akad kwikal Atuman itiya uyakin kusutin yilakej yiwamp ya ambay netu ada mu jinkan. (1 Pita 2:12) Chakin, kusal yom mu mutapu winou kukutukwash kand chisu tulembila mulong wa akadivar nau anambaz ajijamedina yikokujol. Ang twikal in kuyishinshikin antu akwau, twayilembil kusutin kujimbul majin mau ni anch twijik yom tufanyidina kulond mu malembil metu, tukumekesh anch ‘atwizwishin kal nich rukat mulong wa umwing ni mukwau.’​—1 Tes. 3:12.

CHITONGIJOK CHISIKENA PIUR PA MALEMBIL METU

16. Mutapu ik tukutwisha kudandamen kulam chitongijok chisikena piur pa malembil metu? (Mateu 6:8)

¹⁶ Mud mutapu twamana kal, malembil metu makutwish kuswimp yom yiyishikedina antu akwau. Pakwez, tufanyidin kwikal isikena. Chisu tulembila tufanyidinap kusal mud tumulejin Yehova yom yakaday kwijik, ap mud tumulejin mutapu uwamp wa kupwish mulong. Yehova wij yom yiswirikedinau atushalapol end kurutu kwa ayinau ap etu kwijik. (Tang Mateu 6:8.) Anch chid mwamu, mulong wak tufanyidin kuyilembil antu akwau? Kudoshaku mayingishin twisambina kal mu mutu wa mulong winou, kusal mwamu kud kumekesh anch tuyibangidin antu akwau. Rukat rawiy rikata kutubachik kuyilembil antu akwau. Ni Yehova ukat kusangar anch atushalapol end amwimburij kusutin kumekesh rukat.

17-18. Let chilakej chimekeshina usey wa kuyilembil antu akwau?

¹⁷ Ap anch malembil metu maswimpinap kamu yom yiyishikedina antu akwau, pakwez mamekeshin rukat tukweta mulong wa akadivar nau anambaz netu ni Yehova ukat kushinshikin chom chinech. Chilakej, tongin mu dijuku muda mwan nsand ni mwan changadim. Mwan nsand wayel, ni changadim waya wamutan tatukwend ni wamulej anch: “Tatuku sal amboku chom kanang mulong wa kumukwash mpanyam uyedina!” Pakwez tatukwend wij kwend yom yasadikang, umukatin mwanend ni umubangidin. Chikalap nchik mwamu tatuku ukwov musangar nakash pa kuman mwanend mband umubangidin mpanyend kushik ni mu chilik cha kwez kumwitin chakwel amukwash.

¹⁸ Yawiy yom yitukasikeshinay Yehova kusal​—kubangijadin ni kulembil mulong wa amwing ni akwau. Ang twasal mwamu, malembil metu makumekesh anch tuyibangidin antu akwau ni Yehova ukuman yom tusadina. (2 Tes. 1:3; Heb. 6:10) Chikwau kand, mud twadokala kal kutesh, yisu yimwing malembil metu makutwish kuswimp yom kanang mu mwom wa akadivar ni anambaz netu. Chawiy, tuvurikan komb kuyilembil antu akwau.