Akadivar Aad Asu Iwejina ku Chisak Chitakedila

MACHUKU MA ngond 5 Ngond wa 1, 2024, kwading chijikish cha pakampwil ku chikumangan cha pa muvu. Alejana anch: Mukadivar Jody Jedele ni Jacob Rumph ayitondin mulong wa kusal mu Chisak Chitakedila cha Atuman a Yehova. Awonsu aad amusadidin kal Yehova nich kushinshaman mu mivu yivud.

Mukadivar Jedele wavadikina mu Missouri, mwi ngand ya États-Unis ni wapamina mu dijuku da atuman. Dijuku dau dading dishich kwi ndond kwading Atuman a Yehova akemp. Chawiy wijikijana ni akadivar nau anambaz avud a ku jindond kushalijan ezang kulejan kwi ndond kwading kushichau. Rukat rau ni uumwing wau yamupukuna nakash. Amubatisha machuku ma ngond 15 Ngond wa 10 muvu wa 1983, wading uchid kal nsand nakash. Wading ukatin mudimu wa kulejan nakash ni wasambisha mudimu wa uchibol mwi ngond wa 9 mu muvu wa 1989 kupwa kwa kwilej shikol ya sekonder.

Mukadivar Jedele padingay nsand, anvajend ayisenda ndiy ni mpanyend mulong wa kuya kutal ku Betel. Yom yamanau kwinikwa yayibachika kukwat mupak wa kusadin ku Betel​—mu kusut kwa chisu awanyisha mupak winou awonsu aad. Mukadivar Jedele amutazuka ku Betel wa Wallkill mwi Ngond wa 9 muvu wa 1990. Kapamp ka kusambish wasadina ku Departema wa Kutut Masun, kupwa ku Departema wa yom ya Chimwingang.

Pa chirung chinicha yikumangan ya dizu da Espanyol yading yiyil kurutu ni kwading maswir ma akadivar. Chawiy Mukadivar Jedele waya mu chikumangan chimwing ni wasambisha kwilej dizu sa Espanyol. Kupwa kwa chisu chikemp, watanijana ni nambaz Damaris, wading chibol mu munyingumuk wau. Atijana ni asambisha awonsu kusadin ku Betel.

Mu 2005 adokala ku Betel mulong wa kuyilam anvaj au. Pa chisu chinicha, ading ayibol a rawonsu. Mukadivar Jedele wakwashang mud mulej ku Shikol ya Ayibol, wakwasha kand ku Komite wa Ukwash ku Milong ya Opital ni ku Komite wa Kutung wa Rejon.

Mu 2013, Mukadivar Jedele ni Mukajend ayitazuka kand ku Betel mulong wa kukwash ku proje wa kutung ku Warwick. Kudosh pinapa, asadina ku Patterson ni ku Wallkill. Mukadivar Jedele wasala kand ku service local de développement-construction (LDC) ni ku service mondial d’information hospitalier. Mwi Ngond wa 3, 2023 wikala nkwash ku Komite wa Mudimu. Patongidinay pa yisend yiney yawonsu, ulondin anch: “Ang akwinkish yisend yisu, yisu yimwing ukutwish kwiyov mud ukutwishap kwey kuyiwanish. Pakwez chid cha usey kumuchingejin Yehova mulong ndiy ukata kwikadish.”

Mukadivar Rumph wavadikina mu musumb wa Californie, mwi ngand ya États-Unis. Padingay mwanikanch, makwend kalejanangap kand ni kukumangan, pakwez wasalang usu mulong wa kumufundish mwanend uyakin. Chikwau kand, muvu wawonsu wayangang kumutal ngakend wading Kaman wa Yehova ushinshamena. Wamukwasha kukat uyakin, chawiy pawanishay mivu 13 wita chakwel asambish kumufundish Bibil. Amubatisha machuku ma ngond 27 Ngond wa 9 muvu wa 1992, wading uchid kal nsand nakash. Cha musangar, makwend wasambisha kand kulejan ni kukumangan, ni anamakwend awonsu aya kurutu pakad kulab ni ayibatisha.

Padingay nsand, Mukadivar Rumph wamanang musangar wadingau nich ayibol. Wasambisha mudimu wa uchibol mwi ngond wa 9 mu muvu wa 1995 kupwa kwa kwilej shikol ya sekonder. Mu 2000, waya kusadin mwi ngand ya Ekwater mwading maswir nakash. Kwinikwa watanijana ni nambaz Inga, chibol wadokala mu Kanada, kupwa atijana. Kupwa kwa kwatijan ashakama mu musumb umwing wa Ekwater mwading ka chisak kakemp ka In kulejan. Nlel mud yikumangan yikasikena mu spiritu.

Chisu chinicha, Mukadivar Rumph ni Mukajend ikala ayibol a pakampwil ni mu kusut kwa chisu asala mu munyingumuk. Mu 2011 ayitazuka ku shikol ya Galad ya 132. Kupwa kwa shikol, asadina mu jingand kushalijan ni asangera milad kushalijan ya mudimu wa chisu chawonsu, mud mudimu wa ku Betel, mudimu wa umishoner ni wa munyingumuk. Mukadivar Rumph wading kand ni dilau da kwikal mulej ku Shikol ya In Kulejan a Want.

Pa chirung cha chipupu cha COVID-19, Mukadivar Rumph ni mukajend achirika mu États-Unis. Ayitazuka kusadin ku Betel wa Wallkill ni kwinikwa Mukadivar Rumph amufumba ku Departema wa Mudimu. Chisu chimwing, ayituma kand kusadin ku mutiy wa Ekwater, kwinikwa Mukadivar Rumph wasala mu Komite wa Mutiy. Mu 2023 ayituma ku Warwick. Mwi Ngond wa 1, 2024 Mukadivar Rumph wikala nkwash ku Komite wa Mudimu. Patongidinay pa yisend yiney yawonsu, ulondin anch: “Kadap ndond yiusadidina yikutwisha kusal anch yom usadina yikal ya pakampwil, pakwez antu usadidina.”

Tusangaredin nakash mudimu usadinau akadivar inay ni ‘tudandamedin kuyikat nakash amakundj a mutapu winou.’—Filip 2:29.