Antu Asu mu Chisak Chitakedina

DIAKASATU pamanch, pa Kafumpul 24, 2005, ku Betel wa États-Unis ni wa Canada, atesha rusangu rimwing ra musangar nakash, ku program wa kushinshikin mufund wa dichiku wasalau kusutil ku video. Kusambishin pa Mwinses 1, 2005, antu asu aad—Geoffrey W. Jackson nenday Anthony Morris III—ayiwejidin ku Chisak Chitakedina cha Atuman a Yehova.

Mukadivar Jackson wasambisha mudimu wa uchibol mwi ngond wa kaad mu muvu wa 1971, mu Australie, mu musumb waTasmania. Mwi ngond wa musamban, mu muvu wa 1974, ndiy watijana nenday Jeannette (Jenny). Kupwa kwa machuku makemp, ayitonda kuya ni kusal mudimu wa uchibol a pakampwil. Kudiosh mu muvu wa 1979 kushik mu muvu wa 2003, ading ni kusal mudimu wa umishoner mwi ngand ya Tuvalu, mu Samoa, ni mu Fiji—ditung didia kurul kwa karung upidilau anch Pasifik. Padingau ni kusadil pa ditung dined, Mukadivar Jackson ni mukajend akwasha nakash mu mudimu wa kukarumun mikand yimedina pa Bibil. Mu muvu wa 1992, Mukadivar Jackson wadinga mu Komite wa Mutiy wa ngand ya Samoa, ni kudiosh mu muvu wa 1996, wadinga mu Komite wa Mutiy wa ngand ya Fiji. Mwi ngond wa kanying mu muvu wa 2003, ndiy ni mukajend Jenny asambisha kusal ku Betel wa États-Unis. Adinga ni kusal mudimu ku departema wa Mudimu wa Kukarumun. Kupwa, Mukadivar Jackson wasambisha kukwash ku Komite wa Chisak Chitakedila Utadila Milong ya Kufundish.

Mukadivar Morris ni ndiy wasambisha mudimu wa uchibol mu muvu wa 1971, mu États-Unis. Mwi ngond wa dikum ni yaad wa muvu winiwa, ndiy watijana ni Suzan, ni adandamena kusal mudimu wa uchibol mivu yinying kushik ni pavadikina mwanau ikundj wa kusambish, Jesse. Kupwa kwa angond makum maad, avala kand mwan mukwau, wapilau anch Paul. Mukadivar Morris wasambisha kand kapamp kakwau mudimu wa chisu chawonsu mu muvu wa 1979 mud chibol wa rawonsu. Pasambishau kal anend kwilej, mukajend ni ndiy wasambisha mudimu wa uchibol. Chisak chinech chasalanga mudimu ndond kwadinga maswir majim mu ditung dia Rhode, ni Kwingangel kwa Caroline, mu États-Unis. Mukadivar Morris wadinga ni kusal mudimu wa kumuswinkan kalam wa munyimuku, ni anend ikala ayibol a rawonsu. Jesse ni Paul ayitazuka kuya ni kusal ku Betel, pawanyishau kal mivu 19. Pa chisu chawiy chimwing, Mukadivar Morris wikala kalam wa munyimuku. Kupwa, mu muvu wa 2002, ndiy ni mukajend Suzan ayitazuka kuya ni kusal mudimu ku Betel. Asambisha mudimu wau usu mwi ngond wa chinan, pa dichuku dia kusambish. Mukadivar Morris wasala ku Departema utadila mudimu wa kulejan ku Patterson ni kupwa ndiy wasambisha kukwash ku Komite wa Mudimu wa Chisak Chitakedina.

Kuwejin ku antu aad inay asu, mu Chisak Chitakedina mudi akadivar C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ni D. Sydlik. Antu awonsu adia mu Chisak Chitakedina adi in Kristu azizidilau many.