Mutapu Utenchikinau Chisak Chitakedila

CHISAK Chitakedila cha Atuman a Yehova achitenchikin nich amakundj atushalapol azizidilau many a Nzamb. Asadil mudi antimesh a chisak cha kashalapol ushinshamena ni kubabal, ukweta chisend cha kupan yakudia ya muspiritu ni kupan umutakel ni kutwal kurutu mudimu wa kulejan wa Want pa mangand mawonsu.—Mat. 24:14, 45-47.

Chisak Chitakedila chikat kukumangan rubing ni rubing, chisu chivud Diakasatu. Chawiy chiyitwishishina akadivar asadila pamwing mu uumwing. (Kus. 133:1) Yid ya Chisak Chitakedila yikat kusadil kand mu makomite kushalijan. Mu kuwanyish yisakin ya Want, komite ni komite ukwet mudimu wimanyidinay, mudi muyilejenau mu wiswimp kwishin oku.

◼ KOMITE WA KUTENCHIK: Mu komite winou mudi ntakel wa komite ni komite wa Chisak Chitakedila ni kalerik udia niyend chid cha Chisak Chitakedila. Ukat kushinshikin anch makomite mawonsu masadil nawamp ni muchifanyidina. Ukat kubangin kand milong yijim-yijim, rupompat, yak, ni milong yikwau yikash yiyikwatina Atuman a Yehova mu mangand.

◼ KOMITE WA IN MUDIMU WA KU BETHEL: Akadivar adia mu komite winou ayinkisha kal chisend cha kutakel yitenchik mulong wa antu asadila mudimu ni mwom wa muspiritu ni kuyikwash yid ya majuku ma Bethel pa mangand mawonsu. Komite winou utadiling kutondiu ni kuyitazuk yid yisu ya majuku ma Bethel ni kupwish milong yitadila mudimu wau wa ku Bethel.

◼ KOMITE WA KUPALANGESH MIKAND: Komite winou utadil mudimu wa kuchap, kupalangesh, ni kutum mikand yirumburila Bibil mu mangand mawonsu. Utadil mashiny ma kuchap nich mikand ni yikumbu yau ni yapu kushalijan yikatau kusadil Atuman a Yehova. Komite winou utenchikin mutapu uwamp wa kusadil milambu yiletiningau ya mudimu wa Want wa pa mangand mawonsu.

◼ KOMITE WA MUDIMU: Antu asadidila mu komite winou atadil mudimu wa kulejan ni milong yishikedina mu yikumangen, ayibol, amakurump, ni atulam in kwendangan. Utadil kutenchik kwa Mudimu Wetu wa Want ni kuyitazuk in kuya ku Shikol ya Gilead ni ku Shikol ya Diyiy dia Mudimu, kupwa ni kuyinkish mudimu wa kusal.

◼ KOMITE WA MALEJAN: Komite winou utadil malejan makatau kulejan ku yitentam ya munyimuku ni ya pakampwil ya dichuku dimwing, ya distrik, ni ku yikumangan ya yikumangen. Ukat kutenchik maprogram ma muspiritu mulong wa yid ya majuku ma Bethel ni utadil mashikol kushalijan, mudi Shikol ya Gilead ni Shikol ya Mudimu wa Ayibol, pamwing nich kukwat maprogram ma makaset ni mavideo.

◼ KOMITE WA IN KUFUND: Komite winou ukwet chisend cha kufund yakudia ya muspiritu mu mikand ni kuyangenay ambay akaritiy ni antu awonsu. Komite winou wakwiling ku yipul yipwilau piur pa Bibil ni kwitiyij malejan mudi madram ni madiskur ma antu awonsu. Utadil kand mudimu wa kukarumun usadikina pa mangand mawonsu.

Kambuy Paul wafanikesha chikumangen cha antu azizidilau many nich mujimbu wa muntu ni wakasikeshina jindond ja usey padiau yid yawonsu pamwing nich kusadil kwau pamwing, rukat, ni kusadil pamwing mudimu wayinkishau kudi Nzamb. (Rome 12:4, 5; 1 Kor. 12:12-31) Mutu, Yesu Kristu, uyinkishin yid ya mujimbu yiswiridinau chakwel yisadil pamwing, mu kwovijan, ni kuyidish muspiritu. (Efes 4:15, 16; Kol. 2:19) Pa chinech, Chisak Chitakedila achintechika mulong wa kutakel mudi muyitakedilau kudi Yehova nich mwiku wend utumbila.