Dandamen Kwend Kusutin Ritiy

1. Mulong wak kambuy Paul wafanyina kwov musangar pashinshikinay piur pa mutapu wasadinay mwom wend?

MU CHISU kanang, kambuy Paul wajingunina anch akumujip, pakwez chikalap nchik mwamu, wikala ni musangar nakash patongijokinay piur pa mutapu wasadinay mwom wend. Walonda anch: “Napwishin kal kubambil kwam, nalamin kand ritiy retu nawamp.” (2 Tim. 4:6-8) Paul wakwata mupak uwamp nakash wa kumusadin Yehova mu mwom wend, ni wiyova anch Yehova umusangaredin. Niyetu tufanyidin kukwat mipak yiwamp ni kwikal ni dilau da Nzamb. Mutapu ik tukutwisha kusal mwamu?

2. Kwend kusutin ritiy kurumburikin ik?

² Paul walonda piur pa amwinend ni piur pa in Kristu akwau ashinshamena anch: ‘Twendin kusutin ritiy, kadap kusutin yom yimekena.’ (2 Kor. 5:7) Yom ik yakimbay kulond? Mu Bibil, ‘kwend’ kurumburikining yisu yimwing mulad wa mashakamin utondinay muntu kwikal nich. Muntu wendina kusutin yom yimekena ni mes, ukat kukwat mipak yimedina kusu pa yom yimenay, yiteshinay, ni yovilay. Pakwez muntu wendina kusutin ritiy, ukat kukwat mipak yimedina pa ruchingej rend muday Yehova Nzamb. Yisal yend yimekeshining anch ukwet kashinsh anch Nzamb ukumufut ni anch ukutambul yiyukish yivud kusutin kusadin yiyul ya Yehova yida mu Dizu Dend.​—Kus. 119:66; Heb. 11:6.

3. Yom ik tukutaninamu anch twend kusutin ritiy? (2 Korint 4:18)

³ Chakin kamu, yisu yimwing etu awonsu tukat kukwat mipak yimedina pa yom tumena, tuteshina, ni twovila. Pakwez tukutwish kwikal ni milong anch mipak ya usey tukwatina yimedin kwau ching pa yom tumena ni yituteshina. Mulong wak? Mulong yom tumena ap tuteshina yidingap kamu chisu chawonsu yakin. Ap anch yid kwau yakin, anch twend kusutin yom yimekena, tukutwish kushiken kuduul rusot ra Nzamb ap chiyul chend. (Mul. 11:9; Mat. 24:37-39) Pakwez anch twend kusutin ritiy, tukutwish kukwat mipak “yikata kumusangarish Nsalejetu.” (Efes 5:10) Tukutwish kwikal ni musangar nakash ni kulam chisambu cha mu muchim anch twalondul chiyul cha Nzamb. (Kus. 16:8, 9; Isay 48:17, 18) Ni anch twadandamen kwend kusutin ritiy, tukwikal ni mwom wa chikupu.​—Tang 2 Korint 4:18.

4. Mutapu ik ukutwishay muntu kwijik anch wendin kusutin ritiy ap kusutin yom yimekena?

⁴ Mutapu ik tukutwisha kwijik anch twendin kusutin ritiy ap kusutin yom yimekena? Mulong wa kwakul ku chipul chinech, tufanyidin kwiyipul anch: Mipak tukata kukwat yimedining pa yom ik? Ov, yimedining kwau pa yom tumena? Ov, yimedining pa umutakel udokila kud Yehova? Mu mutu wa mulong winou tukuman mutapu tukutwisha kudandamen kwendin mu ritiy, chisu tutondina mudimu, chisu tutondina mbay wa uruw ni chisu tutambwila umutakel udokila ku dirijek da Yehova. Mu yom yiney yawonsu yisatu, tukwisambin yom tufanyidina kushinshikin mulong wa kukwat mipak yiwamp.

CHISU TUTONDINA MUDIMU

5. Yom ik tufanyidina kushinshikin chisu tutondina mudimu?

⁵ Etu awonsu tukweting kuswir kwa kuwanyish maswir metu ni ma dijuku detu. (Mul. 7:12; 1 Tim. 5:8) Ku midimu yimwing akat kufut nfalang jivud kusutamu midimu yikwau. Midimu mud yiney yikutwish kumukwash nsalamudimu kuwanyish maswir mend ma dichuku dawonsu ni kutekaku jikwau kuns mulong wa machuku ma kurutu. Pakwez ku midimu yikwau akat kufut nfalang jikemp, jikata kuyikwash antu kuwanyish kwau maswir ma usey nakash mud, kuland yakuda, yakudjal, ni kufutin ndond ya kushakam. Chid chakin anch chisu tutondina mudimu, tukat kushinshikinang pa difut tukutambula. Pakwez, tukutwishap kwend kusutin ritiy anch twashinshikin kwetu ching pa chom chimwing, difut.

6. Mutapu ik tukutwisha kwend kusutin ritiy chisu tutondina mudimu? (Hebereu 13:5)

⁶ Anch twendin kusutin ritiy, tukushinshikin kand usu ukutwisha kwikal ni mudimu pa urund wetu ni Yehova. Tufanyidin kwiyipul anch: ‘Ov, mudimu winou ukwingit kusal yom yikisinay Yehova?’ (Jnsw. 6:16-19) ‘Ov, ukutwish kwinkangesh kwipan mu mijikit ya mu spiritu ap kwintwal kulemp ni dijuku dam mu chisu chilemp?’ (Fil. 1:10) Anch wakul anch mwaning ku yipul yiney, chikutwish kwikal cha manang kulik mudimu winou ap anch midimu yikasiken. Mulong twendin kusutin ritiy, tukukwat mipak yimekeshina anch tukwet kashinsh anch Yehova ukuwanyish maswir metu.​—Mat. 6:33; tang Hebereu 13:5.

7-8.Mukadivar umwing wa mu Amerik wa Kurul wenda kusutin ritiy mutapu ik? (Tal kand chipich.)

⁷ Mukadivar Javiera uda mu Amerik wa kurul wamana usey wa kwend kusutin ritiy. Ulondin anch: “Napana dijin mulong wa kusal mudimu uwamp nakash wafanyina kwinfut nfalang tupamp twad pa nfalang jinatambulang ku mudimu wa kusambish, ni wafanyina kwinletin musangar nakash.” Pakwez, Javier wading ukatin nakash kusal mudimu wa uchibol. Ulondin kand anch: “Antazuka chakwel nambamb ni mukurump wa mudimu. Kurutu kwa mambamb, namulembila Yehova chakwel ankwash, mulong nading ni kashinsh anch ndiy wija yom yida ya usey mulong wamam. Nading kamu nikatin kwikal ni yisend yivud ku mudimu ni kwikal ni difut diwamp, pakwez nafanyinap kwitiy mudimu winou mud anch wankangesh kuwanyish mipak yam ya mu spiritu.”

⁸ Javier ulondin anch: “Pitwading twambambina, mukurump wa mudimu wanleja anch yisu yivud nikusambish kusutishang saa ya kwimik mudimu. Nich kalimish, namwakula anch nikutwishap kusal mwamu mulong wa yom yikwau nikata kusal mu difukwil dam.” Javier kitiyap mudimu winou. Kupwa kwa mbing jaad, wasambisha mudimu wa uchibol. Mu kusut kwa chisu, wamana mudimu wa kusal mu asaa akemp. Ulondin anch: “Yehova wakula malembil mam ni wanginkisha mudimu wafanyina kwinkwash kusal mudimu wa uchibol. Nikwet musangar nakash wa kwikal ni mudimu winshidina chisu cha kwipan nakash mu kumusadin Yehova ni akadivar nam.”

9. Yom ik twilejina kusutin yom yamushikena Trésor?

⁹ Yom ik tufanyidina kusal anch twajingunin anch mudimu tukweta katat utukangeshin kwend kusutin ritiy? Shinshikin yom yamushikena Trésor uda mu Congo. Ulondin anch: “Mudimu wam usu wading usangareshin kamu. Uvud wa nfalang janfutangau wading usutinamu tupamp tusatu nfalang janfutangau ku mudimu ukur, ni antu anlimishang.” Pakwez, yisu yivud Trésor waburenang yikumangan mulong wasalang asaa avud ku mudimu. Yisu yimwing ambay nend a mudimu amubachikang kand kuyidimb antu chakwel akangany kujingunin yom yiyimp yasadikang ku mudimu wau. Trésor watonga kulik mudimu, pakwez wiyakamisha anch ukuburen ya kusal. Yom ik yamukwasha? Ulondin anch: “Abakuk 3:17-19 wankwasha kujingunin anch, ap anch nalik mudimu winou nasambish kutambul nfalang jikemp, Yehova ukwimbangin. Chawiy nalikap mudimu.” Ulondin kand anch: “Ansalamudimu avud atongining anch ang kud mudimu ufutinau nfalang jivud, antu akutwish kwipan ni kusha yawonsu yikwetau ap majuku mau ni mijikit ya mu spiritu. Nikwet musangar mulong natwisha kulam urund wam ni Yehova ni dijuku dam. Kupwa kwa muvu umwing, Yehova wankwasha kuman mudimu uwamp winkwashina kuwanyish maswir mam ni kwikal ni chisu chijim mulong wa mijikit ya mu spiritu. Anch twamutek Yehova pa ndond ya kusambish, yisu yimwing tukwikalap ni nfalang jivud, pakwez Yehova ukudandamen kutubangin.” Chakin kamu, anch twachingejin chiyul cha Yehova ni kushilamu kwend tukudandamen kwend kusutin ritiy ni ukutuyukish.

CHISU TUTONDINA MBAY WA URUW

10. Yom ik yikutwisha kutubachik kwend kusutin yom tumena chisu tutondina mbay wa uruw?

¹⁰ Uruw chid chipan chidokila kud Yehova, ni chiyipinap kwau kwachik ap kwatan. Patongijokidinay piur pa mukadivar ukutwisha kwikal mbay nend wa uruw, nambaz ukutwish kushinshikin pa wuntu wa mukadivar winou, yisal yend, mutapu umumeningau kud antu akwau, mutapu usadidiningay nfalang, yisend yikwetay mu dijuku, ni kuman mu chilik chimusangareshinay.b Chakin, yom yiney yid ya usey. Pakwez, anch washinshikin ching kwau pa yom yiney, ukutwish kwend kusutin yom yimekena.

11. Mutapu ik tukutwisha kwend kusutin ritiy chisu tutondina mbay wa uruw? (1 Korint 7:39)

¹¹ Yehova ukat kumusanger nakash mukadivar ap nambaz ulondwila yiyul yend chisu chitondinay mbay wa uruw! Chilakej, ukat kukwat nich usey chiyul chimukasikeshina “[kukul] ku mujimbu ni mu manang” kurutu kwa kusambish kwendijadin. (1 Kor. 7:36) Ukat kushinshikin anch muntu ukwatijanay nend ukwet mikadil yimwitinau kukudish kud Yehova mulong wa kwikal mband ap ikundj muwamp. (Jnsw. 31:10-13, 26-28; Efes 5:33; 1 Tim. 5:8) Anch muntu wakad kwikal Kaman wasambish kumusosomb, ukat kulik mulong wa kulondul chiyul chikasikeshina kwatijan ching ni “mwin kwilej wa Nsalejetu” chida mu 1 Korint 7:39. (Tang.) Ukat kudandamen kwend kusutin ritiy, mulong ukwet kashinsh anch Yehova ukubangin yovil yend kusutamu muntu win mwawonsu.​—Kus. 55:23.

12. Yom ik twilejina kusutin yom yamushikena Rosa?

¹² Shinshikin yom yamushikena Rosa uda chibol mu Kolombi. Ku mudimu wau ikundj umwing wakad kwikal kaman wasambisha kumusosomb. Rosa wasambisha kumukat. Ulondin anch: “wading kamu ikundj muwamp nakash. Wayikwashang antu kwindond kwading kushichay ni wading umeken anch ud muntu muwamp. Nakata kamu mutapu wambanginangay. Wading uwanyishin yom yawonsu nikimbina kud ikundj, pakwez kadingap kaman wa Yehova.” Rosa ulondin kand anch: “Chading chikasiken kumulej anch bwat mulong mu muchim nading nimukatin. Chirung chinicha, niyovang anch nid amwinam ni nading kamu nikatin kwachik, pakwez namanap kwam mukadivar mu uyakin.” Rosa kashinshikinap kwend pa yom yading yimekena ku mes. Wamana mutapu wafanyina kwikal mupak wend ni yibudikin pa urund wend ni Yehova. Chawiy, wimika ni ikundj winou kupwa wasambisha kwipan nakash mu mijikit ya mu spiritu. Kupwa kwa chisu chikemp, amutazuka ku Shikol ya in Kulejan a Want, ni amutuma kusal mud chibol wa pakampwil. Rosa ulondin anch: “Yehova wanginkishin yiyukish yivud yisadina anch nikal ni musangar nakash.” Chiswapelingap kamu kusal yom yisotilay Yehova anch tusal, pakampwil anch tukwet maku makash piur pa chom kanang. Pakwez tukat kutaninamu chisu chawonsu anch twalikidil yitongijok ya Yehova yitutakela.

CHISU TUTAMBWILA UMUTAKEL UDOKILA KU DIRIJEK DA YEHOVA

13. Yom ik tukutwisha kusal anch twatambul umutakel udokila ku dirijek da Yehova?

¹³ Chisak Chitakedila, kalam wa munyingumuku, biro wa mutiy, ni amakurump a chikumangen, akat kutwinkish umutakel utukwashina kumwifukwil Yehova. Pakwez yisu yimwing tukutwishap kamu kutesh nawamp mayingishin matwinkishidinau umutakel kud akadivar inay. Tukutwish kwidjidjek piur pa umutakel utwinkishinau anch ud kamu wakin. Tukusambish kushinshikin pa kuburen kuwanyin kwa akadivar atwinkishina umutakel winou.

14. Yom ik yikutukwasha kwend kusutin ritiy chisu tutambwila umutakel udokila ku dirijek? (Hebereu 13:17)

¹⁴ Anch twend kusutin ritiy, tukwikal ni kashinsh anch Yehova utakedin dirijek dend ni wij yom yawonsu yitushikedina. Mud chibudikin, tukat kuziyin pakad kulab, ni tukat kusal mwamu ni chitongijok chiwamp. (Tang Hebereu 13:17.) Tukat kwijik anch kuziyin kwetu kukat kukasikesh uumwing wa chikumangen. (Efes 4:2, 3) Tukwet kashinsh anch ap anch akadivar atutakedina ad akad kuwanyin, Yehova ukutuyukish anch twaziyin. (1 Sam. 15:22) Pa chisu chiwanyidina, ukuwapish yom yin yawonsu yakad kwend nawamp.​—Mike 7:7.

15-16. Yom ik yamukwasha mukadivar umwing kwend kusutin ritiy ap anch wading widjidjekin piur pa umutakel watambulay? (Tal kand chipich.)

¹⁵ Shinshikin chilakej chimekeshina usey wa kwend kusutin ritiy ni kulondul umutakel udokila ku dirijek. Ap anch dizu da Espanyol dipalangen mu Peru, antu avud akat kulond kwau mazu ma chivadik. Dimwing pakach pa mazu minam did dizu da Kechwa. Kudosh mu mivu yivud, akadivar nau anambaz alondina dizu da Kechwa, akat kukimb antu alondina dizu dined mu teritwar wau. Pakwez, mulong wa kulimish mbil ja guvernema, kwikala kuswimp mu mulad wetu wa kulejan. (Rom 13:1) Mud chibudikin, antu amwing iyipula anch mudimu wau wa kulejan ukudandamen kamu kuya kurutu. Mulong, akadivar aziyina ku umutakel, Yehova wayukisha usu wau ni wayikwasha kutan antu avud alondina dizu da Kechwa.

¹⁶ Kevin uda mukurump wa chikumangen cha dizu da Kechwa wading niyend pakach pa antu ading idjidjekina. Ulondin anch: “Niyipula anch, ‘mutapu ik tukutwisha kand kuyitan antu alondina dizu da Kechwa?’” Yom ik yasalay Kevin? Ulondin anch: “Navurika mukand wa Jinswir 3:5. Ni natongijokina pa chilakej cha Moses. Yehova wamwinkisha umutakel wamekana mud wakad kwovakan nawamp. Wamuleja Moses kuyibudish in Isarel mu Idjibit ni kuyitwal ku Karung Musunz, ni kwinikwa kwamekana mud kwikil mutapu wa kuyiyep amasalay a in Idjibit ading ayilondwila. Pakwez waziyina, ni Yehova wayukisha kuziyin kwend kusutin kusal chilay mulong wa kuyipandish.” (Kub. 14:1, 2, 9-11, 21, 22) Kevin wakwata mupak wa kulejan kukwatijan ni mulad usu. Yibudikin ik yatanay? Ulondin anch: “Nashimwoka nakash mutapu watuyukishay Yehova. Kwinsambishin twendanganang nakash mu teritwar ni yisu yimwing twatanang kwetu muntu umwing ap aad alondina dizu da Kechwa. Pakwez katat tukat kulejan nakash kwindond kuda antu avud alondina dizu da Kechwa. Mud chibudikin, tukwet antu avud tukata kwambamb nau, kuchirikin ni kwilej nau Bibil. Ni antu avud akat kukumangan ku yikumangan yetu.” Mwaning, anch twend kusutin ritiy, Yehova ukutuyukish.

17. Yom ik wileja kal mu mutu wa mulong winou?

¹⁷ Twashinshikin kal mutapu tukutwisha kudandamen kwend kusutin ritiy chisu tukwatina mupak piur pa yom yisatu ya usey nakash. Pakwez tufanyidin kudandamen kwend kusutin ritiy mu yom yawonsu tusadina mu mwom wetu, chilakej chisu tutondina kwipuwangej ni chisu tukwatina mupak piur pa kwilej ap kulil an. Mipak yawonsu tukimbina kukwat yifanyidinap kwau kwimen ching pa yom tumena, pakwez kand pa urund wetu ni Yehova, pa yiyul yend, ni kushilamu kwend mulong wa kutubangin. Anch twasal mwamu, tukutwish “kumwifukwil [Yehova] Nzamb wetu chikupu ni chikupu.”​—Mike 4:5.