MUTU WA MULONG WA KWILEJ WA 40
MUMINY 111 Yom Yikata Kutuletin Musangar
Yehova ud ‘Musangar Wetu’
‘Chad nikuya . . . kud Nzamb, ndiy kamu Nzamb wa musangar ni kuzangijal kwam.’—KUS. 43:4.
MU WISWIMP
Tukuman yom yikutwisha kukepish musangar wetu ni mutapu tukutwisha kuuchirish anch twaushadish.
1-2. a) Yikokujol ik yirishinau nich antu avud nlel? b) Yom ik tukwisambina mu mutu wa mulong winou?
NLEL mu mangand antu akat kusal yawonsu yikutwishau mulong wa kwikal ni musangar. Chikalap nchik usu usadinau, kakatap kwikal ni musangar wakin. Antu avud iyovil nayimp ni atongin anch yom yikuswimpap kwau mu mwom wau. Ap atushalapol a Yehova akutwish kwiyov mwamu. Mulong tushich “mu machuku ma nsuden,” twij nawamp anch tukurish ni yishiken ni yovil “yikash kurish nich.”—2 Tim. 3:1.
2 Mu mutu wa mulong winou, tukwisambin yom yikutwisha kukepish musangar wetu ni mutapu tukutwisha kuuchirish anch twaushadish. Pakwez, tujinguninany bil cha kusambish Musul wa musangar wakin.
MUSUL WA MUSANGAR WAKIN
3. Yitang yitufundishin ik piur pa Yehova? (Tal kand yipich.)
3 Yehova ukweting kwend musangar chisu chawonsu, ni ukatin anch niyetu twikal ni musangar. Chawiy chitushimokishinap kuman anch yom yatangay yikat kutuletin musangar, chilakej divu, ulombu kushalijan, masengan ma annam ni yakuda kushalijan. Nzamb utukatin kamu ni ukatin anch tusanger mwom!
Mwan wa ndjamb: Image © Romi Gamit/Shutterstock; An a atujil atazukinau anch manchot: Vladimir Seliverstov/500px via Getty Images; an a mpemb: Rita Kochmarjova/stock.adobe.com; a dauphin aad: georgeclerk/E+ via Getty Images
Anch twaman annam akat kusengan, chikat kutuvurish anch Yehova ud Nzamb wa musangar (Tal paragraf wa 3)
4. a) Mutapu ik ulaminay Yehova musangar wend chikalap nchik mar mamenay mu mangand? b) Chipan ik chitwinkishinay Yehova? (Kuseng 16:11)
4 Ap anch Yehova ud “Nzamb wa musangar,” ukat kuman ushon ni mar mamenau antu mu mangand. (1 Tim. 1:11) Pakwez yom yimenay yikatap kukepish musangar wend. Wij anch mar mawonsu mad ma chirung chikemp—ndiy amwinend watenchikin kal chisu chikumapwishay. Ukat kuchingel nich kushimpish muchim dichuku dikudoshay ushon ni mar mawonsu chikupu. Paday kand kal asal mwamu, ukat kuman yikokujol turishina nich ni ukatin kutukwash. Mutapu ik ukatay kutukwash? Ukat kusal mwamu cha kusambish kusutin kutwinkish musangar mud chipan. (Tang Kuseng 16:11.) El tumanany mutapu wamwinkishay Mwanend Yesu chipan chinech.
5-6. Mutapu ik tukutwisha kutan musangar wakin?
5 Yesu ud muntu ukweta musangar nakash pakach pa yitang yawonsu ya Yehova. Mulong wak? El tushinshikinany mayingishin maad. 1) “Ud chifu cha Nzamb wakad kumekanang” ni ukat kumekesh wuntu wa Tatukwend mu chilik chiwanyidina mu mitapu yawonsu. (Kol. 1:15; 1 Tim 6:15.) 2) Yesu wasutishin kal chisu chilemp nakash ni Tatukwend, uda Musul wa musangar.
6 Yesu ukat kutan musangar chisu chawonsu kusutin kusal yom yimwitinau kusal kud Tatukwend. (Jnsw. 8:30, 31; Yohan 8:29) Chawiy mulong wa kushinshaman kwend, ukat kwikal ni dilau da Yehova.—Mat. 3:17.
7. Mutapu ik tukutwisha kwikal ni musangar wakin?
7 Niyetu tukutwish kutan musangar wakin kusutin kumusejin Yehova, uda Musul wa musangar. Anch twasutish chisu mu kwilej piur pa Yehova ni kumwimburij, tukwikal ni musangar nakash. Tukwikal kand ni musangar anch twasal rusot ra Nzamb ni kwijik anch tukwet dilau dend.a (Kus. 33:12) Pakwez chid nchik anch twashadish musangar wetu mu chisu chikemp ap mu chisu chilemp? Ov, komb chirumburikin anch tukwetap dilau da Nzamb? Bwat kwau! Tud antu akad kuwanyin ni yisu yimwing tukat kwov kusansan, ushon ni kuziy mu manang. Yehova ukat kutwov kurumburik. (Kus. 103:14) Tushinshikinany yom yikutwisha kukepish musangar wetu ni mutapu tukutwisha kand kuuchirish.
KANGAL WALIKIDIL CHOM KANANG CHIYIPISH MUSANGAR WEY
8. Yikokujol ya mu mwom yikutwish kwikal ni yibudikin ik pad etu?
8 Milong ya mu mwom. Ov, urishin ni rupompat, mar madokila ku yom yatangau, uzwendj, mayej ap upal? Tukutwish kushadish musangar wetu anch twarish ni yikokujol mud yiney, pakampwil anch kwikil chom tukutwisha kusal mulong wa kuwapish yom. Bibil ulejen anch “ushon wa mu muchim ukat kujip mupim.” (Jnsw. 15:13) Babis, mukadivar uda mukurump wa chikumangen niyend wiyova mwamu mu chisu kanang pafishay yayend, makwend ni tatukwend mu chisu chikemp. Ulondin anch: “Niyova anch nading amwinam ni nadingap ni mwin kwinkwash. Yisu yimwing, niyovang nayimp mulong nading nikatin kusutish chisu chivud ni yayam nau anvajam kurutu afa.” Yikokujol ya mu mwom yikutwish kutuziyish nakash ku mujimbu ni mu manang.
9. Yom ik yikutwisha kutukwash kuchirish musangar wetu? (Jeremiy 29:4-7, 10)
9 Yom ik yikutwisha kutukwash kuchirish kand musangar wetu? Tukutwish kuchirish musangar wetu kusutin kwikal isikena ni in kujikitish. Mangand makasikeshin chitongijok cha kwel anch mulong wa kwikal ni musangar tufanyidin kwikal ni mwom uwamp nakash. Pakwez chitongijok chinech chidap chakin. Chilakej, Yehova wayikasikesha In Yuda ading mu winkwal mu Babilon kwijidin mashakamin mau masu mud antu ada mwi ngand ya wingendj ni kusal usu wau wawonsu mulong wa kwikal ni musangar chikalap nchik yishiken yiney yikash. (Tang Jeremiy 29:4-7, 10.) Disu dilejan? Tufanyidin kwitiyin mashakamin metu ni kusanger yom tukweta mu mwom wetu. Tufanyidin kwikal ni kashinsh anch Yehova kakutulikap bwat. (Kus. 63:7; 146:5) Effie, wakad kutwish kand kwend mulong wa aksidang wasalay ulondin anch: “Ankwasha kud Yehova, dijuku dam ni kud akadivar nau anambaz. Chawiy nikat kutong anch, ang naziy nikumekesh anch niburedin muchim wa kujikitish mulong wa yom yansadinau. Nimujikitishin nakash Yehova ni arunam mulong wa ukwash wau ujim.”
10. Mulong wak tukutwish kwikal ni musangar ap anch turishin ni yikokujol?
10 Tukutwish kudandamen kwikal ni musangar ap anch mwom wetu udap kamu uwamp nakash ni ap anch yom yiyimp yatushiken etu ap dijuku detu.b (Kus. 126:5) Mulong wak? Mulong musangar wetu wimedinap kwau pa yishiken ya mwom. Maria, uda chibol ulondin anch: “Ang urishin ni yikokujol, kwikal ni musangar kurumburikinap anch uduwil yovil yey. Pakwez kumekeshin anch ulamin mu manang kushilamu kwa Yehova. Tatukwetu wa mwiur ukutukwash kulam musangar wetu.” Vurik anch, chikalap nchik mutapu ukasikena yom nlel, yikokujol yetu yawonsu yid kwau ya kachisu kakemp—mud mukata kujimwangan nzau jishadina mu usukuril.
11. Chilakej cha kambuy Paul chikukasikeshin mutapu ik?
11 Chid nchik ang tutongin anch yikokujol turishina nich yimekeshin anch tukwetap dilau da Yehova? Chikutwish kwikal cha usey kutongijokin pa yilakej ya atushalapol ashinshamena a Yehova arisha ni yikokujol yikash. Shinshikin chilakej cha kambuy Paul. Amutonda kud Yesu mulong wa kulejan uyakin “ku michid, kud ant, ni kud an a Isarel.” (Mid. 9:15) Dilau mud ik! Pakwez mwom wa Paul wadingap wakad yikokujol. (2 Kor. 11:23-27) Ov, yikokujol yarishangay nich Paul yading yimekeshin anch washadishin kal dilau da Yehova? Bwat kamu! Pakwez, kujijaman kwend kwamekesha anch Yehova wading umuyukishin. (Rom 5:3-5) Niyey dandamen bil kutongin pa mashakamin mey. Ukat kujijaman nich kushinshaman chikalap nchik yikokujol urishina nich. Ukutwish kand kwikal ni kashinsh anch ukwet dilau da Yehova.
12. Kukangany kusal yom tutongina kusal mu mudimu wa Yehova kukutwish nchik kukepish musangar wetu?
12 Kukangany kusal yom tutongina kusal mu mudimu wa Yehova. (Jnsw. 13:12) Rukat retu mulong wa Yehova ni muchim wa kujikitish yikat kutubachik kwitekin mipak ya mu spiritu. Pakwez, anch mipak twitekidina yikwatijadinap ni mashakamin metu, tukutwish kuziy nakash. (Jnsw. 17:22) Holly uda chibol ulondin anch: “Nakata kuya ku Shikol ya in Kulejan a Want, kulejen mwi ngand yindj ap kukwash proje wa mudimu wa kutung ku Ramapo. Pakwez mashakamin mam maswimpa, natwishap kand kuwanyish mipak yiney yawonsu, naziya nakash. Chisangareshiningap kamu anch utwishinap kuwanyish yom wada utongina kusal.” Chayishikedin kal antu avud kwiyov mwamu.
13. Anch mashakamin metu matukangesh kusal yom tutongina, mipak ik yisikena tukutwisha kwitekin?
13 Yom ik yikutwisha kutukwash kand kuchirish musangar wetu? Vurik anch Yehova kakatap kutwit kusal yom yitusutinamu chipim. Kakatap kutukwat nich usey mulong kwau wa yom tukutwisha kusal mu mudimu wend. Yehova ukatin anch twijik mimbu yetu ni twikal antu ashinshamena. (Mike 6:8; 1 Kor. 4:2) Ukat kushinshikin nakash wuntu wetu wa mukach kadap yom tukutwisha kusal. Ov, chikwikal cha manang kutong anch tufanyidin kusal yom yivud nakash kusutamu yom yichingejinay Yehova anch tusal?c Bwat kamu! Chawiy, anch mashakamin mey makukangeshin kusal yom ukatina kusal mu mudimu wend, ikasikesha kwey kushinshikin pa yom ukutwisha kusal. Chilakej, ukutwish kuyifumb ansand ap kuyikasikesh akadivar nau anambaz ada amapal. Ukutwish kand kwitekin mupak wa kumukasikesh muntu kanang kusutin kumwendin ku chikumbu, kumutazuk ku telefon, ap kusutin kumufundin mesaj. Yehova ukat kusangar anch twasal yom tukweta mutapu wa kusal ni ukat kutukwash kwikal ni musangar! Vurik anch mwi ngand yisu tukumusadin Yehova mu mutapu ushimwokishena nakash! Holly wajimbulangau kwiur oku ulondin anch: “Nitekina chisu cha kutong anch, ‘nikwet mutapu wa kushakam chikupu.’ Nich ukwash wa Yehova, nikuwanyish mipak yam yimwing mwi ngand yisu.”
14. Yom ik kand yikwau yikutwisha kutushadishin musangar wetu?
14 Kukimb kwisangaresh. Antu amwing akat kusadin tupend twa kwambambin mulong wa kukasikesh chitongijok cha kwel anch musangar udokiling ku kwisangaresh. Niyetu tukutwish kusambish kutong anch tukutwish kwikal ni musangar wakin kusutin kusal yom tukatina, kuland yom tukatina ni kwendangan kwi ndond kushalijan. Chiyipinap kwau kusanger yom mud yiney. Yehova watutanga ni ukaliweny wa kusanger yom yiwamp. Pakwez antu avud ipana nakash mu kwisangaresh ayinau, mu kusut kwa chisu ashikena kujingunin anch kadingap kamu ni musangar. Eva, uda chibol ulondin anch, “ang ukatin kwisangaresh nakash mu mwom wey ukwikalang kwey ni kuswir kwa yom chisu chawonsu.” Anch tukimbin ching kwisangaresh ayinetu chisu chawonsu, tukushiken kunenganan ni kuburen musangar wakin.
15. Dilejan ik tukutwisha kwilejin ku chilakej cha Mwant Salomon?
15 Tukutwish kudosh dilejan ku yom yamushikena Mwant Salomon piur pa yibudikin yiyimp yidokiling ku kukat kwisangaresh nakash. Wapakisha kukimb musangar kusutin kusangaresh maku mend amwinend mud kusanger yakuda yiwamp, mizik yiwamp ni yom yawonsu yiwamp yadingay ni mutapu wa kuland ni nfalang pa chisu chinicha. Pakwez katwishap kutan musangar wakin. Walonda anch: “Mes kimakuziyangap kuman, ap matu kimakuziyangap kwov.” (Mul. 1:8; 2:1-11) Antu amwing atongining anch, ang akwet nfalang ni asal yom yikatinau, akwikal ni musangar. Pakwez minam mad makasu; yom yiney yikutwishap kutuletin musangar.
16. Kuyikwash antu akwau kukutwish nchik kutukwash kuchirish musangar wetu? (Tal kand yipich.)
16 Yom ik yikutwisha kutukwash kuchirish musangar wetu? Yesu watufundisha anch: “Musangar wa kupan upandakenamu wa kutambul.” (Mid. 20:35) Alekos uda mukurump wa chikumangen ulondin anch: “Nikat kuyisadin antu tuyom tukemp tukemp. Chisu nikata kupan, nikatap kushinshikin pad am amwinam, chinech chikat kusal anch nikal ni musangar.” Yom ik ukutwisha kuyisadin antu akwau? Anch waman muntu kanang urishina ni chikokujol, sal usu wa kumukasikesh. Ukutwishap kupwish milong yend, pakwez ukutwish kumukasikesh kusutin kumutesh, kumwanaken ni kumuvurish anch ukutwish kudjibwil yisend yend kud Yehova. (Kus. 55:22; 68:19) Ukutwish kand kumukwash kuman mutapu umubangidinau kud Yehova. (Kus. 37:28; Isay 59:1) Ukutwish ap kumusadinaku ka chom kampand mud kumwisukinaku chakuda ap kwendanganaku nend. Ukutwish kumutazuk chakwel akutwalaku mu mudimu wa kulejan, kusal mwamu kukutwish kumukasikesh. Ikal muntu usadidinay Yehova mulong wa kuyikwash antu akwau. Kushinshikin padau antu akwau pa ndond pa kushinshikin pad etu ayinetu kukutwish kutukwash kwikal ni musangar wakin!—Jnsw. 11:25.
Pa ndond pa kushinshikin pa maswir mey amwiney, shinshikin pa maswir ma antu akwau (Tal paragraf wa 16)d
17. Anch tukimbin kwikal ni musangar yom ik tufanyidina kusal? (Kuseng 43:4)
17 Tukutwish kwikal chakin kamu ni musangar anch twadandamen kumusejin Tatukwetu wa mwiur. Bibil utwinkin kashinsh anch Yehova ud “musangar ni kuzangijal [kwetu].” (Tang Kuseng 43:4.) Chawiy, chikalap nchik yom yitushikedina mu mwom wetu, tukutwish kwikal mu diking. El tudandamenany kushinshikin paday Yehova, Musul wa musangar wakin!—Kus. 144:15.
MUMINY 155 Musangar Wetu wa Chikupu
a Tal mushet “Muchingejina Yehova Mulong wa Kwikal ni Musangar.”
b Chilakej, tal video wa Nsangu Jisu ja 5 Jidiokila ku Chisak Chitakedila Muvu wa 2023 pa jw.org, muyipwilau ambay a uruw Dennis ni Irina Christensen.
c Mulong wa kwijik yom yivud, tal mutu wa mulong “Ikalany Nich Kuchingejin Kwisikena, ni Sangarany” mu Chinong cha Kalam cha 15 Ngond wa 7, 2008.
d KURUMBURIL CHIPICH: Nambaz waland kal yom yivud mulong wa amwinend, pakwez watan kal musangar uvud kusutin kuland yisalamb mulong wa nambaz wapamina kal ukweta kuswir kwa dikasikesh.