MUTU WA MULONG WA KWILEJ WA 41
MUMINY 108 Rukat Rishinshamena ra Nzamb
Rukat ra Yehova Rushiching Chikupu
‘Mujikitishany Yehova, mulong ndiy udi muwamp. Rukat rend rishinshamena rushiching chikupu.’—KUS. 136:1, NWT.
MU WISWIMP
Kulam mu manang yom yilondinay Bibil piur pa rukat ra Yehova kukutukwash kulik kuziy anch twarish ni yikokujol.
1-2. Chikokujol ik chirishinau nich In Kristu avud?
TONGIN piur pa waat uda mu mambek makash. Akat kuuperil ni kuunyikesh chisu chawonsu. Anch antu kadjibwilap nkal, waat winou ukutwish kuya ndond yawonsu. Ching kamu nkal ndiy ukutwisha kuukangesh kuperok.
2 Anch urishin ni chikokujol chikash, ukutwish kwiyov mud waat winou. Chikutwish kukukasiken kutek manang mwi ndond. Yisu yimwing ukutwish kwikal ni kashinsh anch Yehova ukukatin ni ukukwashin; yisu yikwau ukutwish kwiyipul anch Nzamb umen kamu yom urishina nich. (Kus. 10:1; 13:1) Pamwing ap muruney ukutwish kukukasikesh ni ukutwish kwiyovaku nawamp mu chisu kanang. (Jnsw. 17:17; 25:11) Kupwa wasambish kand kwidjidjek. Ukutwish kand kutong anch Yehova kakukatinap kand kwend. Yom ik yikutwisha kwikal mud nkal ukukwashina chisu urishina ni yikokujol? Ap kand, mutapu ik ukutwisha kwikal ni kashinsh anch Yehova udandamedin kukukat ni kukukwash?
3. Kuseng 31:7 ni 136:1 utufundishin ik piur pa rukat rishinshamena ra Yehova, ni mulong wak tulondina anch ud chilakej cha pakampwil? (Tal kand chipich.)
3 Mutapu umwing ukutwisha kujijamen chikokujol, ud wa kuvurik rukat rishinshamena ra Yehova. (Tang Kuseng 31:7; 136:1.) Mazu ‘rukat rishinshamena’ mamekeshin urund wa piswimp ni wa chisu chawonsu ukutwishau kwikal nich antu aad. Yehova ud chilakej cha pakampwil cha rukat rishinshamena. Chikwau kand, Bibil umulejen anch ‘wizwil sens nich rukat rishinshamena.’ (Kub. 34:6, 7) Piur pa Yehova, Bibil ulondin kand anch: ‘Ey wizwil mu rukat rishinshamena kudi awiy akata kukutazuk.’ (Kus. 86:5) Tongin chirumburikina mazu minam: Yehova kakez kayilikap antwend ashinshamena! Kwijik anch Yehova ukwet rukat rishinshamena kukutukwash kujijaman chisu turishina ni chikokujol chikash.—Kus. 23:4.
Mud mukatay nkal kukangesh waat kuperok anch kud rinkind nakash, ang twikal ni kashinsh anch Yehova utukatin, tukutwish kujijaman chisu turishina ni yikokujol (Tal paragraf wa 3)
RUKAT RA YEHOVA MAD MAFUNDISH MA BIBIL MA PA DISHIN
4. Let yilakej ya mafundish ma Bibil ma pa dishin, kupwa rumburil mulong wak tumitiyining pakad kwidjidjek.
4 Chom chikwau chikutwisha kukukwash kujijamen yikokujol kud kwijik anch rukat ra Yehova mad mafundish ma pa dishin. Mazu “mafundish ma Bibil ma pa dishin marumburikin ik” kud ey? Pamwing ap makuvurishin uyakin umwing wileja mu dizu da Nzamb. Chilakej, wileja anch Yehova dawiy dijin da Nzamb, Yesu ud Mwan kapokal wa Nzamb, afu kijap chom, ni anch divu dikwikal paradis, ndond yiwamp yikushakamau antu chikupu. (Kus. 83:18; Mul. 9:5; Yoh. 3:16; Kuj. 21:3, 4) Chisu wajingunina mafundish minam mawonsu, widjidjekap kamu. Mulong wak? Mulong wajingunina anch mafundish minam mimedin pa uman wakin. El tuman mutapu ik kwijik anch rukat ra Yehova mad mafundish ma pa dishin kukutwisha kukukwash kulik kwidjidjek anch Yehova ukubangidin ni wij nawamp yom urishina nich.
5. Rumburil mutapu ukatay muntu kulikap mafundish ma makasu.
5 Chisu wasambisha kwilej Bibil, yom ik yakukwasha kulikap mafundish ma makasu? Chakin kamu, wasambisha kwilakej yom yakufundishangau mu relijon wen ni yom yifundishinay Bibil. Shinshikin chilakej chimwing: Tong bil mud ang wading witiyijin anch Yesu ndiy Nzamb wa dikand dawonsu. Chisu wileja Bibil wiyipula anch: ‘Ov, mafundish minam mad kamu makin?’ Kupwa kwa kushinshikin Mifund ya Bibil nawamp, wakula anch bwat. Kupwa waswinkesha mafundish ma makasu ni uyakin uda mu Bibil ulondina anch: Yesu ud kwend “kabuz ivumu wa yitang yawonsu,” “Mwan kapwokal wa Nzamb.” (Kol. 1:15; Yoh. 3:18) Chakin kamu, mafundish ma makasu makutwish kwikal mud “mpwembu” ni chiswapelap kumapandakan. (2 Kor. 10:4, 5) Pakwez, pawileja uyakin wasambishap kand kumitiyij.—Filip 3:13.
6. Mutapu ik ukutwisha kwikal ni kashinsh anch ‘rukat rishinshamena ra Yehova rushiching chikupu’?
6 Tukutwish kand kusal mwamu mulong wa yom yifundishinay Bibil piur pa rukat ra Yehova. Anch warish ni yikokujol ni widjidjek piur pa rukat ra Yehova, iyipula anch: ‘Ov, nitongin kamu nawamp?’ Ilakej kwidjidjek kwey piur pa rukat ra Yehova ni mazu mada mu Kuseng 136:1—verse wa mutu wa mulong winou. Mulong wak Yehova ulondin anch rukat rend rid ‘rishinshamena’? Mulong wak mazu ‘rukat rend rishinshamena rishiching chikupu’ amachirikidin tupamp 26 mu kuseng winou? Mud twamanang, rukat rishinshamena ra Yehova mulong wa antwend mad mafundish ma Bibil ma pa dishin, mud kand mafundish makwau mada mu Dizu da Nzamb twitiyija kal kudosh pakur. Chitongijok cha kwel anch Yehova kakukwatinap nich usey ni kakukatinap chid kamu cha makasu. Tufanyidin kwipuk mafundish minam, mud mutukata kwipuk kand mafundish makwau ma makasu!
7. Yom ik ukutwisha kusal ang ukwetap kashinsh anch Yehova ukukatin?
7 Mu Bibil mud kand maverse makwau matwinkishina kashinsh anch Yehova utukatin. Chilakej, Yesu wayileja in kwilej end anch: “Ukwetany usey nakash kusutamu amiswesu avud.” (Mat. 10:31) Yehova amwinend wayileja antwend anch: “Nikukukasikeshany, ni kukukwashany kand. Nikukuchidijany ni kukupandishany.” (Isay 41:10) Mazu minam movaken kamu nawamp. Yesu kalondap anch ‘Ukutwish kwikalany ni usey nakash,’ ni Yehova kalondap anch ‘Nikutwish kukukwashan.’ Pakwez alonda anch: “Ukwetany usey nakash” ni anch “Nikukukwashany.” Anch widjidjekin piur pa rukat ra Yehova chisu urishina ni chikokujol, maverse minam makutwish kukukwash nakash kwiyov nawamp ni kukwinkish kashinsh anch Yehova ukukatin. Maverse minam makwet uman wakin. Anch watongijokin pa yom yiney ni kulembil, ukwikal ni chitongijok chida mu 1 Yohan 4:16 ulondina anch: “Twilejin kal kwijik ni kwitiyij rukat rikwetay Nzamb mulong wetwetu.”a
8. Yom ik ukutwisha kusal ang yisu yimwing widjidjek anch Yehova kakukatinap?
8 Yom ik ukutwisha kusal ang udandamedin kwidjidjek piur pa rukat ra Yehova? Ilakej yovil yey ni yom wija piur pend. Tufanyidinap kuchingejin yovil yetu kusutamu uman tukweta, pakwez tukutwish kuchingejin rukat ra Yehova mulong rimedin pa uman udokila mu Bibil. Kulik kuchingejin mu rukat ra Yehova, kud mud kuvuramen anch Yehova amwinend ud rukat.—1 Yoh. 4:8.
VURIK CHISU CHAWONSU ANCH ‘YEHOVA UKUKATIN’
9-10. Mud mufundinau mu Yohan 16:26, 27, Yesu wakimba kulond ik palonday anch “Tatuku amwinend ukukatinany”? (Tal kand chipich.)
9 Tukutwish kwilej yom yivud piur pa rukat ra Yehova kusutin kutongijokin pa mazu mayilejay Yesu in kwilej end anch: “Tatuku amwinend ukukatinany.” (Tang Yohan 16:26, 27.) Yesu kalondap kwend mazu minam mulong kwau wa kuyisangaresh in kwilej end. Mutapu walonday mazu minam umekeshinap anch Yesu wading kwend wisambidin piur pa yovil yau. Pakwez, Yesu wading wisambidin piur pa chom cha usey nakash—malembil.
10 Yesu wayileja in kwilej end anch afanyina kulembil kusutin dijin dend, kadap kumulembil ndiy. (Yoh. 16:23, 24) Chading cha usey nakash kud awiy kwijik chom chinech. Mulong kupwa kwa kuvumbuk kwend, in kwilej end ela pamwing ap kumulembil ndiy. Chikalap nchik mwamu, Yesu wading murunau. Afanyina pamwing ap kutong anch mulong wading uyikatin, chawiy wafanyina kumulej Tatukwend chakwel akul malembil. Pakwez, Yesu kayilejap kutong mwamu. Mulong wak? Mulong wayileja anch: “Tatuku amwinend ukukatinany.” Mazu minam mad pakach pa mafundish ma Bibil ma pa dishin piur pa malembil. Shinshikin chirumburikina mazu minam kud ey: Kusutin dilejan dey da Bibil, washikena kumwijik Yesu ni kumukat. (Yoh. 14:21) Pakwez mud mwasalau in kwilej a mu mivu chitot ya kusambish, niyey ufanyidin kumulembil Nzamb nich kashinsh kawonsu, mulong wij anch ‘amwinend ukukatin.’ Ukat kumekesh ritiy rey mu mazu minam chisu chawonsu ukata kumulembil Yehova.—1 Yoh. 5:14.
Tukutwish kumulembil Yehova ni kashinsh mulong twij anch ‘amwinend utukatin’ (Tal paragraf wa 9-10)b
JINGUNIN KWISU KUDOKILA KWIDJIDJEK KWEY
11. Mulong wak Satan ukat kusangar anch twidjidjek piur pa rukat ra Yehova?
11 Yom ik yikutwisha kutubachik kwidjidjek piur pa rukat ra Yehova? Chid kwau chakin kulond anch Satan ndiy ukata kutubachik kwidjidjek mulong ‘ukimbin kutuda,’ ni ukusangar nakash pa kutumanay tukat kwidjidjek piur pa rukat ra Yehova. (1 Pita 5:8) Anch Yehova wapana difut chid mulong utukatin—pakwez yisu yimwing Satan ukat kutubachik kutong anch tuwanyidinap kutambul yiyukish yidokila ku difut dined. (Heb. 2:9) Chad nany ukutaninamu anch twidjidjek piur pa rukat ra Yehova? Ud Satan. Ni nany ukusangara anch twaziy kushik mu chilik cha kulikap kumusadin Yehova? Ud ching Satan. Tongin rubabek rikatay kusadin mulong wa kutubachik kwidjidjek piur pa rukat ra Yehova. Twij nawamp anch ndiy washadisha kal rukat ra Yehova. Chawiy, kutubachik kutong anch Yehova katukatinap ni anch uchingedin kutushesh, yid pakach pa “mipit” yisadidinay Djabul. (Efes 6:11) Anch twajingunin yom yisadinay mukankuny netu winou mulong wa kutuziyish, chikutuswapel kudandamen ‘kumurishikish.’—Yak. 4:7.
12-13. Kuburen kuwanyin kukat kutubachik mutapu ik kwidjidjek piur pa rukat ra Yehova?
12 Kud kand chom chikwau chikutwisha kutubachik kwidjidjek piur pa rukat ra Yehova. Chom ik? Kuburen kuwanyin. (Kus. 51:5; Rom 5:12) Chitil chayipisha urund wa antu ni Nzamb. Chayipisha kand mutapu wetu wa kutong, yovil yetu ni ukash wetu wa mujimbu.
13 Chitil chayipishin kal manang metu mu mutapu uyimp, chikat kutubachik kwifish nich, kwiyakamish, kwov usany, ni kwiyov anch tudap mu diking. Tukutwish kwiyov mwamu anch twasal chitil. Pakwez tukutwish kand kwiyov mwamu chisu chawonsu mulong twij anch tud antu akad kuwanyiny—mwikadil ushalijangena kamu ni mutapu watutangay Nzamb. (Rom 8:20, 21) Mud mutapu motak ukweta dikar dibuzikina ukutwishap kuya mau nakash, niyetu mulong wa kuburen kuwanyin, tukutwishap kamu kusal yom yawonsu nawamp mud mwatutangay Nzamb. Chitushimwokishinap kwijik anch yisu yimwing tukat kwidjidjek piur pa rukat ra Yehova. Anch chom chinech chatushiken, tufanyidin kuvurik anch Yehova ud ‘Nzamb mujim ukwatishena wom, mwin kulam manswik, ukweta ranaken kud awonsu amukatila ni kulam yijil yend.’—Neh. 1:5.
14. Kutongijokin pa difut kukutwish nchik kutukwash kurishikish chitongijok cha kwel anch Yehova kakutwishap kutukat? (Rom 5:8) (Tal kand mushet “Babel ‘Usu wa Kudimban wa Chitil.’”)
14 Chakin, yisu yimwing tukat kwiyov anch tuwanyidinap kamu kutukat kud Yehova. Uyakin ud anch, tuwanyidiningap kamu rukat rikatay kutumekeshin Yehova—ni dawiy diyingishin ditubachikina kulond anch rukat riner rid kamu ra pakampwil nakash. Kwikil kwau chom tukutwisha kumusadin chakwel Yehova atukat. Pakwez kusutin difut, Yehova ukat kubwik yitil yetu, ni wasala kal chom chinech mulong utukatin. (1 Yoh. 4:10) Vurik kand anch Yesu weza mulong wa kuyimpandish akayitil, kadap antu awanyidina. (Tang Rom 5:8.) Kwikil muntu ukutwisha kusal yom mu mutapu uwanyidina, ni Yehova kakatap kuchingej anch tusal mwamu. Ang twijik anch kuburen kuwanyin kukutwish kutubachik kwidjidjek piur pa rukat ra Yehova, tukukwat mupak wa kudandamen kurishikish kwidjidjek kwetu.—Rom 7:24, 25.
KWAT MUPAK WA KUSHAL USHINSHAMENA
15-16. Anch twadandamen kushal ashinshamena kud Yehova, kashinsh ik tukwikala nich ni mulong wak? (2 Samwel 22:26)
15 Yehova ukatin anch tukwata mupak uwamp kusutin “kulamatil kudi ndiy.” (Kuv. 30:19, 20) Anch twasal mwamu, niyend ukutushinshamen. (Tang 2 Samwel 22:26.) Anch twadandamen kushal ashinshamena kud Yehova, tukutwish kwikal ni kashinsh anch ukutukwash mu yishiken yawonsu yikutwisha kutushiken mu mwom wetu.
16 Mud twadokala kal kutesh, tukwet mayingishin mavud ma kulik kwiyakamish anch twarish ni yikokujol. Twij anch Yehova utukatin ni ukutukwash. Bibil ndiy utufundishina mwamu. Anch twalik kwidjidjek piur pa rukat rend, tukumekesh anch yom twija piur pa Yehova yid yakin ni tukulik kushinshikin pa mutapu twiyovila katat. Tudandamenany kwikal ni kashinsh anch rukat ra Yehova rikudandamen chikupu mud mutufundishinay Bibil.
MUMINY 159 Mwinka Yehova Uyaj
a Yilakej yikwau tuyitanin mu Kuvurik Yijil 31:8, Kuseng 94:14 ni mu Isay 49:15.
b KURUMBURIL CHIPICH: Mukadivar ulembil mulong wa kwikal ni usu wa kumukwash mukajend uyedina, kukwat mupak wa kusadin nfalang nawamp ni mulong wa kumufumb mwanend mband kumukat Yehova.