Ikal ni Kashinsh Anch Yehova Ukukatin

1. Mulong wak wipana amwiney kud Yehova? (Tal kand chipich.)

OV, UVURIKIN dichuku wipana amwiney kud Yehova mu malembil? Wakwata mupak winou mulong wamwijika Yehova nawamp ni kumukat. Wamukana anch ukutek rusot rend pa ndond ya kusambish mu mwom wey ni anch ukudandamen kumukat nich muchim wey wawonsu, nich mupim wey wawonsu, manang mey mawonsu, ni usu wey wawonsu. (Mar. 12:30) Kudokal kamu pinipa, wasambisha kamu kumukat nakash. Chawiy, mutapu ik ukwakula anch muntu wakwipul anch: “Ov, ukwet kamu kashinsh anch umukatin Yehova?” Pakad kwidjidjek, ukumwakul anch: “Nimukatin nakash kusutamu muntu win mwawonsu ap chom chin chawonsu!”

2-3. Yehova ukatin anch twikala ni kashinsh ik, ni yom ik tukumana mu mutu wa mulong winou? (Jeremiy 31:3)

² Chad mutapu ik ukutwisha kwakul anch muntu wakwipul anch: “Ov, ukwet kamu kashinsh anch Yehova ukukatin?” Ov, ukutwish kwidjidjek pa kwakul ni kutong anch uwanyidinap kukukat kud Yehova? Nambaz umwing wading ni mwom ukash ku wanikanch wend ulondin anch: “Nij anch nimukatin Yehova. Nidjidjekinap ap pakemp pa mulong winou. Yom nikata kwidjidjek yid ya kwijik anch Yehova wikatin kamu.” Pakwez mutapu ik ukatay chakin kamu kwiyov Yehova piur peyey?

³ Yehova ukatin wikala ni kashinsh anch ukukatin. (Tang Jeremiy 31:3.) Uyakin ud anch Yehova ndiy wakusejisha piswimp ni ndiy. Ni chisu wipana kud ndiy ni kutambul dibatish, wakumekeshina chom cha usey nakash—rukat rend rushinshamena. Rukat riner rid rikurikina, ni rushichinga chikupu. Rawiy rikata kumubachik Yehova kuyitazuk atushalapol end ashinshamena—kuwejinaku niyey—anch “ayam a pakampwil.” (Mal. 3:17) Yehova ukatin anch wikal ni kashinsh mud kadingay nich kambuy Paul anch ukukatin. Mulong wa kashinsh kinak kadingay nich Paul, wafunda anch: “Nikwet kashinsh anch kwikil chom ap chimwing, rikala rufu, ap mwom, ap angel, ap maguvernema, ap yom yidaku katat, ap yom yikusadika kurutu, ap ukash, ap kulep, ap kukurik, ap chom chikwau chatangay Nzamb, kwikil chom chikutwisha kutwauril ku rukat rikwetay Nzamb mulong wetwetu.” (Rom 8:38, 39) Mu mutu wa mulong winou, tukuman mulong wak tufanyidin kwikal ni kashinsh anch Yehova utukatin ni yom yikutwisha kutukwash kukasikesh kashinsh kinak.

MULONG WAK TUFANYIDIN KWIKAL NI KASHINSH ANCH YEHOVA UTUKATIN?

4. Makasu ik makatinay Satan anch twitiy, ni mutapu ik tukutwisha kumurishikish?

⁴ Anch twikal ni kashinsh anch Yehova utukatin, chikutuswapel kurish ni “mipit” ya Satan. (Ef. 6:11) Satan ukudandamen kusal usu wend wawonsu mulong wa kutukangesh kumusadin Yehova. Mupit umwing pakach pa mipit yisadidinay Satan ud wa kupalangesh makasu anch Yehova katukatinap. Kangal wavuramen anch Satan ukimbining chisu chida chiwamp kud ndiy mulong wa kutupak. Yisu yivud ukat kutupakang chisu tuziyina—pamwing ap chisu tuziyina mu manang mulong wa yom yatushikena pakur, mulong wa yikokujol turishina nich katat, ap mulong twiyakamishin piur pa machuku ma kurutu. (Jnsw. 24:10) Satan ud mud ntambu ukatining kukwat annam aziyina. Chawiy ukat kusadin chisu tuziyina mu manang mulong wa kupakish kutubachik kulikap kumusadin Yehova. Pakwez anch twadandamen kukasikesh kashinsh ketu antu Yehova utukatin, tukwikal ni mutapu wa ‘kurish’ ni Satan pamwing ni mipit yend ya manang.​—1 Pi. 5:8, 9; Yak. 4:7.

5. Mulong wak chid cha usey kwiyov anch Yehova utukatin ni utukwatin ni usey?

⁵ Anch twikal ni kashinsh anch Yehova utukatin, chikutuswapel kumusejin piswimp. Man mulong wak tulondina mwamu. Yehova watutanga ni maswir ma kutukat ni kukatan. Chawiy anch twiyov anch Yehova utukatin nakash ni utukwatin ni usey, niyetu tukumukat nakash. (1 Yh 4:19) Ni anch twadandamen kumukat nakash, niyend ukudandamen kutukat nakash. Bibil utulejin anch: “Sejany piswimp ni Nzamb, ni ndiy ukusej piswimp niyenen.” (Yak. 4:8) Chawiy, mutapu ik tukutwisha kukasikesh kashinsh ketu anch Yehova utukatin?

YOM IK YIKUTWISHA KUTUKWASH KWIKAL NI KASHINSH ANCH YEHOVA UTUKATIN?

6. Yom ik ufanyidina kwit mu malembil mulong wa kwikal ni kashinsh anch Yehova ukukatin?

⁶ Muleja patok yom uswirikedina ni dandamen kumulembil. (Luk. 18:1; Rom 12:12) Anch chitwishikin—mulembila dichuku dawonsu tupamp tuvud—chakwel akukwash kwiman. Yisu yimwing, ukutwish kutong anch chikasiken kwitiyij anch Yehova ukukatin. Pakwez ufanyidin kwijik anch Yehova ud mujim nakash kusutamu muchim wey. (1 Yoh. 3:19, 20) Wij nawamp mikadil yey yiwamp ukweta apa anch amwiney uyijap nawamp. (1 Sam. 16:7; 2 Jsng. 6:30) Chawiy komb kangal widjidjek ‘kumwazuril’ muchim wey mulong wa kumulej, ni kumwit chakwel akukwash kuman anch ukukatin. (Kus. 62:9) Kupwa kwa kulembil, chid cha usey kusadin yiyul yilondwilaku ey.

7-8. Mutapu ik utukwashinay Kuseng kwikal ni kashinsh anch Yehova utukatin?

⁷ Itiyij yom yilondinay Yehova. Yehova wayipepila antu mulong wa kufund Bibil chakwel alejan mutapu uday chakin kamu. Chawiy nfund a kuseng David wamekesha mutapu ukatay Yehova kutubangin mu mutapu ushimwokishena. Wafunda anch: “[Yehova] udi piswimp nau awiy akweta michim yinenganena; ukat kuyipandish akweta michim yitudishila.” (Kus. 34:18, TMK.) Anch muchim wey unenganen, ukutwish kutong anch kwikil muntu ap umwing ukutwisha kwiyov mutapu wiyovila ap ukutwisha kukukwash. Pakwez Yehova ukukanin anch pa chisu chinicha, ukwikal ney piswimp mulong wa kukukwash, mulong wij nawamp yom uswirikedina kusutamu muntu mwawonsu. Mu kuseng mukwau David wafunda anch: ‘Tek mansoj mam mu mulond wey.’ (Kus. 56:9) Yehova umening chisu urishina ni yakamish ni ushon. Kakatap kusangar chisu umena mar nakash ni woviling kusansan nakash ku muchim wend. Ukat kutek mansoj mey mu mulond wend, charumburik anch umakwatin nich usey nakash. Tutangin mu Kuseng 139:3 anch: ‘Ey [Yehova] wij kal kwey jinjil jam jawonsu.’ Yehova umening jinjil jey jawonsu, pakwez ukat kushinshikin pa yom yiwamp ukata kusal. (Heb. 6:10) Mulong wak? Mulong usangaredining usu wey wawonsu usadininga mulong wa kumusangaresh.a

⁸ Kusutin maverse minam makasikeshina ni makwau kand mada mu Dizu dend, chid mud Yehova ukulejin anch: “Nikimbin wijika mutapu nikukatina nakash ni mutapu nikata kukubangin nakash.” Pakwez mud twamanang kwinsambishin, Satan ukatin witiyija anch Yehova kakukatinap kwey. Chawiy anch yisu yimwing ukwetap kashinsh anch Yehova ukukatin, ukutwish kutongin piur pa muntu witiyijina. Ukumwitiyij Satan uda ‘tatuku wa makasu’ anch ukumwitiyij Yehova “Nzamb wa uyakin”?​—Yoh. 8:44; Kus. 31:6.

9. Yehova upanin kashinsh ik kud antu amukatina? (Kubudik 20:5, 6)

⁹ Tongijokin pa mutapu wiyovilingay Yehova piur pa antu amukatina. Shinshikin yom yalonday Yehova kud Moses ni kud In Isarel. (Tang Kubudik 20:5, 6.) Yehova ushidinamu anch ukudandamen kumekesh rukat rushinshamena kud antu amukatina. Mazu minam matwinkishin kashinsh anch, mulong Yehova ushinshamen, kakutwishap kulik kuyikat atushalapol end amukatina. (Neh. 1:5) Chawiy, anch yisu yimwing wasambish kwidjidjek piur pa rukat rikwetay Yehova mulong weyey, chom ufanyidina kusal, chid kwiyipul anch: ‘Ov, nimukatin Yehova?’ Kupwa tongin pa chom ech: Anch ey umukatin ni ukat kusal usu wa kumusangaresh, ukwinkishin kashinsh anch ukukatin kamu nakash. (Dan. 9:4; 1 Ko. 8:3) Mu kulond kukwau, anch widjidjekinap piur pa rukat riukweta mulong wa Yehova, ov, mulong wak ukutwisha kwidjidjek piur pa rukat rikwetay ndiy mulong weyey? Tufanyidinap kwidjidjek ap pakemp piur pa rukat ni kushinshaman kwend.

10-11. Yehova ukatin anch uman difut mutapu ik? (Galatiya 2:20)

¹⁰ Tongijokin pa difut. Difut dafutay Yesu Kristu kusutin kupan mwom wend chid chipan chijim nakash chapanay Yehova kud antu. (Yoh. 3:16) Ov, niyey chipan chinech chikutadin kamu pakampwil? Mwaning! Shinshikin chilakej cha kambuy Paul. Vurik anch wasala yitil yimwing yijim kurutu kwa kwikal mwin Kristu ni wading kand ukwet kuswir kwa kudandamen kurish ni kuburen kuwanyin kwend. (Rom 7:24, 25; 1 Tm. 1:12-14) Pakwez, wamanang difut mud chipan chamwinkishau amwinend kud Yehova. (Tang Galatiya 2:20.) Vurik kand anch Yehova ndiy wamupepila Paul chakwel afunda mazu minam. Ni yom yawonsu yafundau mu Bibil ayifunda mulong wa kutufundish nich. (Rom 15:4) Mazu ma Paul mamekeshin mutapu ukatinay Yehova anch niyey umana difut—mud chipan chikwinkishinau amwiney kud Ndiy. Anch waman difut mu mutapu winou, ukukasikesh kashinsh key anch Yehova ukukatin kamu amwiney pakampwil.

¹¹ Tumujikitishin Yehova mulong wamutuma Yesu pa mangand kufa mulong wetwetu. Pakwez diyingishin dikwau dezinay Yesu pa divu did da kuyilej antu akwau uyakin piur pa Nzamb. (Yoh. 18:37) Uyakin winou uwejidinaku kand mutapu ukatay kwiyov piur pa anend.

MUTAPU UTUKWASHINAY YESU KWIKAL NI KASHINSH ANCH YEHOVA UTUKATIN

12. Mulong wak tufanyidin kuchingejin yom yalonday Yesu piur pa Yehova?

¹² Padingay Yesu pa divu, wamekesha mutapu udingay Yehova. (Luk. 10:22) Tukwet mayingishin mavud ma kuchingejin yom yalonday Yesu piur pa Yehova. Chid mwamu mulong Yesu washakama mwiur pamwing ni Yehova mu chisu chilemp nakash kurutu kwa kwez pa divu. (Kol. 1:15) Yesu wading wij mutapu umukatinau nakash kud Tatukwend. Wamana kand mutapu wamekeshay Tatukwend rukat kud angel end ni anend amakundj ni amband ashinshamena ada pa divu. Mutapu ik ukatay Yesu kuyikwash antu akwau kwikal ni kashinsh anch Nzamb uyikatin?

13. Yesu ukatin anch tumuman Yehova mutapu ik?

¹³ Yesu ukatin anch tumuman Yehova mutapu umumenay ndiy. Mu ma Evanjil, Yesu umutazukin Yehova anch “Tatuku” tupamp 160 ni kusut. Ni pambambangay nau in kwilej end, wasadinang mazu mud “Tatukwen” ap “Tatukwen wa mwiur.” (Mat. 5:16; 6:26) Kurutu kwa Yesu kwez pa divu, atushalapol ashinshamena a Yehova amutazukang Yehova anch ‘Mwin Dikand Dawonsu,’ ‘Wa Piur Nakash,’ ‘Sakatang Mujim,’ ni yijiken yikwau kand. Pakwez Yesu wamutazukang yisu yivud anch ‘Tatukwetu.’ Dizu dined dimekeshin anch Yehova ukatin anch atushalapol end awonsu iyov anch ad piswimp ni Ndiy, mud mutapu ukatay kwiyov mwan anch ud piswimp ni tatukwend wa rukat. El tushinshikinany yilakej yaad musadidinay Yesu dizu “Tatuku.”

14. Mutapu ik wamekeshay Yesu anch umwing ni umwing wa pakach petu ukwet usey ku mes ma Tatukwetu wa mwiur? (Mateu 10:29-31) (Tal kand chipich.)

¹⁴ Cha kusambish, shinshikin mazu ma Yesu malejenau mu Mateu 10:29-31. (Tang.) Amiswesu ad atujil akemp ni kakwetap mutapu wa kumukat ni kumwifukwil Yehova. Pakwez Tatukwetu uyikwatin ni usey nakash mu chilik cha kuman muswesu win mwawonsu upalikina pansh. Komb tukutwish kwikal ni kashinsh anch umukwatin nich usey ni umubangidin nakash kashalapol wend mwawonsu ushinshamena ni umusadidina nich rukat! Yesu walonda kand anch Tatukwetu wij uvud wa nsuk jikwetay muntu ni muntu. Mulong Yehova wij ap kachom kakemp katutadina, tufanyidin kwikal ni kashinsh anch utubangidin kamu nakash. Chakin kamu, Yesu ukatin anch twikala ni kashinsh anch umwing ni umwing wa pakach petu ukwet usey ku mes ma Tatukwetu wa mwiur.

15. Mazu ma Yesu mada mu Yohan 6:44 makufundishin ik piur pa Tatukwey wa mwiur?

¹⁵ Man chilakej cha kaad musadidinay Yesu dizu “Tatuku.” (Tang Yohan 6:44.) Tatukwey wa mwiur wakupwitina ku uyakin. Mulong wak wasala mwamu? Mulong wamana anch ukwet muchim uda mu mwikadil uwanyidina. (Mid. 13:48) Palonday Yesu mazu mada mu Yohan 6:44, wading pamwing ap wisambidin piur pa mazu mada mu Jeremiy 31:3. Mu verse winou, Yehova wayileja antwend anch: ‘Nakupwitinanya kud am chawiy nidandamedil kukumekeshinany rukat ram rudimukina’

16. (a) Yom ik yading yikimbinay Yesu kutulej, ni mulong wak tufanyidin kuchingejin mazu mend? (b) Mutapu ik ukutwisha kukasikesh kashinsh key anch Yehova ndiy kamu Tatuku uswirikedina? (Tal mushet “Tatuku Tuswiridina Etu Awonsu.”)

¹⁶ Pamutazukinay Yehova anch Tatukwetu, chid mud Yesu utulejin anch: “Yehova kadap kusu kwend Tatukwam amwinam, pakwez niyen ud Tatukwen. Ni nikwinkinany kashinsh anch umukatin ni umubangidin nakash muntu ni muntu.” Chawiy anch yisu yimwing wasambish kwidjidjek piur pa rukat rikwetay Yehova mulong weyey, ufanyidin kwiyipul anch: ‘Ov, nifanyidinap kuchingejin mazu malonday Mwan umwija nawamp nakash Tatukwetu ni ukata kulond uyakin chisu chawonsu?’​—1 Pi. 2:22.

DANDAMEN KUSAL USU WA KULAM KASHINSH ANCH YEHOVA UKUKATIN

17. Mulong wak tufanyidin kudandamen kukasikesh kashinsh ketu anch Yehova utukatin?

¹⁷ Chid kamu cha usey kudandamen kukasikesh kashinsh ketu anch Yehova utukatin. Mud mutapu twamanang kwinsambishin, mukankuny netu Satan ukudandamen kusal usu wa kutukangesh kumusadin Yehova. Mulong wa kushiken kusal mwamu, ukudandamen kutubachik kutong anch Nzamb katukatinap. Tufanyidinap kwitiy makasu ma Satan!​—Job 27:5.

18. Mutapu ik ukutwisha kukasikesh kashinsh anch Yehova ukukatin?

¹⁸ Mulong wa kudandamen kukasikesh kashinsh anch Yehova utukatin, tufanyidin kudandamen kumulembil chakwel atukwash kwiman ayinetu mud mutumenay ndiy. Tongijokin nakash piur pa mutapu warumburilau rukat rakin ra Yehova kud antu afunda Bibil. Vurik anch kakatap kuyidiburil antu amumekeshidina rukat, pakwez niyend ukat kuyimekeshin rukat. Tongijokin kand pa yom yifanyidina kukubachik kuman difut mud chipan chapanau pakampwil mulong weyey. Ni chingejin kashinsh kakwinkishinau kud Yesu anch Yehova ud Tatukwey wa mwiur. Chawiy anch muntu wakwipul chad anch: “Ov, ukwet kamu kashinsh anch Yehova ukukatin?” ukumwakul pakad kwidjidjek anch: “Mwaning, winkatin! Dichuku dawonsu niyam nisadining usu wa kumekesh anch nimukatin!”