Mukand Wa Chisak Chitakedina
Pitwasambisha kal mivu ya kusambish ya yitot 21, chidi cha musangar kukufundilany en, ‘chisak chawonsu cha akadivar’ pa mangand mawonsu, ni kukujikitishany mulong wa mudimu wen ukash. (1Pita 2:17) Pasutil kal piswimp mivu 2 000, Yesu wipula anch: “Pakez kwezay Mwan a Muntu, ov, ukez kutan ritiy mu mangand?” (Luka 18:8) Mudimu wen wa mushiku mu chirung cha muvu wasutina ou upanin chakul ku chipul cha Yesu nich dizu dia piur anch mwaning! Amwing pakach pen ading ni kuyiswingish ni kuyipipej mulong wa ritiy rau. Mu jindond jivud, wajijamenany kwikalap nchik njit, mar, mayej ap nzal. (Luka 21:10, 11) Twakujikitishany ku mushiku wen mulong wa midimu yitentamina, chitwishikin kand anch Yesu “ukez kutan ritiy mu mangand.” Chakin kamu kudi musangar mwiur mud ik mulong wa chinech!
Twij anch chiswapelap kujijaman. Shinshikinany yoziu ya akadivar netu adia mwi ngand yimwing ya kurand kwa Asia. Mu jindond jivud ja ngand yiney ading ni kuyipompat Atuman’a Yehova nich chisum. Katat kamu ak, ampurish avundangeshin chisambu cha chikumangan cha antu piswimp 700. Kujik mwi njil kwayikangesha antu akwau 1 300 kukumangan. Chisak chimwing cha antu adjita yom ya kujindjik nich yifu yau, amwing pakach pau adinga ampurish, chavundangesha ndond ya chikumangan nakash, kuyibul antimesh avud, ni kwakish kasu ku yitand a pol yatungau mulong wa chikumangan. Mu yisu yikwau, antu a relijon akata kulondul yijil chipandakena chisik ayibula nayimp akadivar netu nich nfimbu jikweta nzal ja misumad ku moj.
Mar ma mujimbu mud minam makat kusansan nakash pakwez makatap kutushimokish. Mupostol Paul amupepidila kufund anch: “Antu awonsu asotila kwikal nich mwom utumbila mu Kristu Yesu akez kuyizengol.” (2 Tim. 3:12) Mu mivu chitot ya kusambish, in Kristu ajijamana ku kuyizengol kwa kuyizengol ku kan ni kwa kuyimesh mar ma ku mujimbu, ni amwing ashikena ku kuyijip. (Midimu 5:40; 12:2; 16:22-24; 19:9) Chinech chading kand chakin mu mivu yitot 20, ni chakin mwamu kamu chikudandamena kwikal mu mivu yitot 21. Djat ni katat, Yehova ukat kutulej anch: “Ut wawonsu ukuchilau mulong wa kukurishish ukez kupandikanap bwat.” (Isa. 54:17, NW) Riner ridi ruchingej ripandakena kuwap mud ik! Chakin, tudi akweta usey ukash ku mes ma Yehova chakwel ku kan kwa muprofet wend Zakariy, ndiy walonda anch: “Muntu mwawonsu ukeza kukupukun ey wapukun kal kan a dis kam.” (Zak. 2:8, NW) Akankuny a in kumwifukwil Yehova kakutwishap kwikal nich chiyukish cha kupandakan kwa nsudiel. Difukwil dishitwila dikez kupandakan!
Chilikej, mwi ngand yijimbwilau kwisambishil, Atuman’a Yehova ashikedin uvud wa piur tupamp twaad mu uvud wa in kulejan mu chirung cha muvu wa mudimu wa 2001. Mwaning, akadivar netu akat kujijaman kwinikwa chikalap nchik mwikadil wa mar nakash, mud mukatau kusal kwawonsu. Mu mangand mawonsu muvu wa mudimu wasutina ou, rubing ni rubing kwading antu 5 066 abatishinau mud chijingidij cha kwipan kwau kud Yehova. Katat antu inay asu akwatin mipak, pamwing ni yetwetu ashadilaku, chakwel ‘kwikal antu afanyidina wakad kwidjidjek mu ritiy, in kuziyil ku rusot rawonsu ra Nzamb.’ —Kol. 4:12.
Shinshikinany kand, kuya kurutu kwa katat mu Grèce. Kwikalap nchik rupompat rikash ra Egliz wa Orthodox wa in Grek, Atuman’a Yehova ijiken katat ku guvernema mud “relijon witiyikina.” Mikand yimekeshina kwitiyik kwinoku yilondin anch chikumbu cha Betel mu Grèce yidi “ndond yitumbila ni yipaninau, yipaninau ku difukwil dia Nzamb.” Tukwet kand musangar wa kukulejany anch mu chirung cha muvu wa mudimu wasutina ou, tribinal mujim wapanin kwitiyin kwa yiyul ya guvernema yambatena nich difukwil dietu mu Allemagne, Bulgarie, Canada, États-Unis, Japon, Roumanie ni Russie. Tukat kumujikitish Yehova nakash kamu mulong wa kwazuril chis chijim mwi ngand jinej mulong wa mudimu!
Anch twashinshikin mitapu yikatay kuyikwash Yehova antwend mu chirung chinech cha machuku ma kwisudiel, tumen anch ndiy udia Murund upandikena kuwap tufanyidina kwikal nend. Tukat kusanger mu urund wetu ni ndiy, kwijikang anch ndiy utukatin, ukat kutufundish, ni kutupup. Mwaning, yoziu ya ritiy yikez kudandamen kutushiken. Pakwez ritiy rakad kuzal mudiay Yehova rikez kutukwash. Jakobu wafunda anch: “Anamakwam in Kristu, ovany musangar wakin piukumanany mar ma mitapu ni mitapu, mulong en wijany anch, kupak kwa ritiy ren kukat kumekesh muchim wa kudandamen.” (Jak. 1:2, 3) Chipandikenamu kand usey, kujijaman kwetu kumekeshin rukat retu mulong wa Yehova, ni chinech chikat kutuletin musangar ujim! Ikalany nich kashinsh, akadivar akatish anch, Yehova ukez kumukwash muntu ni muntu pakach petu. Anch twashal ashinshamena, ndiy ukez kutukwash wakad kuziy djat ni kwez kwandam mu mangand masu. Ndiy usotin etu tupandakana.
Chawiy lel, tukat kuyikasikesh akadivar ni anambaz, ansand ni amapal, kulam mu manangu yiyukish yipandikena kuwap yidia kurutu oku. Likany mwikadil wetu wa manangu wikala ufanikena ni wadingay nich mupostol Paul, muntu wafunda anch: “Nij nawamp anch, mar metu makemp mitumena katat kimilikenap nich uyaj ujim ukez kutwinkishay Nzamb.” (Ro. 8:18) Mukungamenany Yehova chisu urishinany nich mar ma mutapu win wawonsu. Jijamanany, ni kangal kulik. Ukezanyap kwinan ap pakemp. Dizu dia Nzamb ditwinkishin kashinsh anch: “Mulong wa mwin kutentam, nich kushinshaman kwend, ukushal mwom.” —Aba. 2:4, NW.
Akadivar nen,
Chisak Chitakedina cha Atuman’a Yehova