Ukwash kud Ansalamudimu a ku Opital Arishina ni Yakamish

Bryn, ushicha Kwiyand kwa Caroline mwi ngand ya États-Unis, ud mu Komite wa Ukwash ku Milong ya Rupital, komite winou ukat kusal pamwing ni ma rupital kushalijan makata kuyok ayej adia Atuman a Yehova.

Mulong wa chipupu cha KOVID-19, ma rupital mavud mayikangeshin antu in kwez kutal ayej. Bryn wamutazuka mukurump ukata kutenchik chakwel ayej ni majuku mau atambula ukwash ni rongoj mulong wa kwijik mutapu ukutwishay kuyikwash ayej adia Atuman.

Bryn watwisha kwambamb ni nkwash wend. Mulong wa yijidik yikangeshina kwendin ma rupital, Bryn wipula anch kud mutapu wa kuyinkish ayej adia Atuman nimero wend chakwel atwisha kwambamb nend. Nkwash wend witiya.

Kupwa Bryn wayitongina antu akata kusal ku rupital. Wamuleja nkwash winou anch usangaredin mudimu usadinau amingang ni uchingejin anch ad kwau akash ku mujimbu. Kupwa waweja kand anch watangin piur pa mutapu uziyinau antu ndond jin jawonsu, pakampwil antu asadina ku ma rupital mulong wa chipupu cha korona viris.

Nkwash niyend wamuleja anch chipupu cha korona chasadin anch iyakamisha nakash kamu.

Chad Bryn wamuleja anch: “Kapend ketu kakwet jinsangu jikutwisha kuyikwash kurish ni kuziy mu manangu. Anch wandam pa jw.org ni wafund anch ‘kuziy mu manangu’ pa ndond ya kukimbijodin, ukutan mitu ya milong yimwing yikuyikasikesha ambay ney akwau a mudimu.”

Pading pambambinau, nkwash winou wandama pa kapend ketu, wafunda mazu “kuziy mu manangu” pa ndond ya kukimbijodin, ni wamana mitu ya milong yadingap. Wasangara nakash ni walonda anch: “Nikumulejamu mukurump wetu kapend kinak. Nimen kamu anch yom yiney yikuyikwash ambay nam a mudimu ni antu akwau. Nikubudish makopi kushalijan ni kuyangen.”

Kupwa kwa mbing jikemp, Bryn wisamba chad ni mukurump wend ni walonda anch andama pa kapend ka web ni wabudisha mitu ya milong kanang yisambidina piur pa kuziy mu manangu. Ayinkisha amingang ni in kusal mudimu akwau a ku rupital makopi mamwing.

Bryn walonda anch: “Mukurump winou wanjikitisha mulong wa mudimu wetu ni mulong wa mitu ya milong yading yikasikeshina. Walonda anch yading ya ukwash nakash.”