Sadin Nsangu Jidia pa JW.ORG mu Mudimu wa Kulejan

Pa paj wakusambish uding pa kapend ketu ka internet pading mitu ya milong ni mavideo makatau kurijek mulong wa kupukun michim ya antu akashinsh akad kwikal a tuman a Yehova. (Mid. 13:48) Yisu yimwing yikat kwisambin piur pa mitu ya milong ya nsangu jisu ap piur pa yom yitonginau antu ap yilondinau.

Mutapu ik ukutwisha kusadin paj wakusambish wa jw.org mu mudimu wa kulejan?

• Andamang pa kapend chisu chawonsu. Shinshikin yom yisu yidiap, ni man mutapu ukutwisha kusadin yom yiney mu mudimu wa kulejan. (Mulong wa kutan yom yikwau yisu shat pafundinau anch “Tal Yivud.”) Kwijik nawamp yom yidia pa kapend ketu kukukwash kwikal ni yitongijok ukutwisha kusadin mu mudimu wa kulejan.

• Sadin mitu ya milong ni mavideo madia pa paj wakusambish wa pa kapend ketu ka internet mulong wakusambish nich mambamb. Yom yiney yikutwish kutukwash kwikal ni chitongijok piur pa yom yitonginau antu a mu teritwar wetu.

• Yileja antu paj wakusambish wa pa kapend ketu. Lejan mitu ya milong ya pakampwil, ni muleja muntu mutapu wa kutan nsangu pa kapend.

• Yitumina antu malien. Antu amwing kakatiningap kwambamb netu mes ni mes, pakwez akat kwandam pa kapend ketu. Chawiy kangal kwidjidjek kuyitumin antu asangaredina malien ma pa kapend ketu ap malien ma mitu ya milong ya usey ap mavideo madiap.