Ov Terorizim Ukez Kapwa?

Anch kwasadik terorizim ukutwish kwiyipul anch: ‘Ov, Nzamb umen kamu yom yiney? Mulong wak yom yiney yishikedina? Ov, terorizima ukez kapwa? Mutapu ik nikutwisha kushakam nich wom winou novila?’ Bibil uletin yakul yisangareshina ku yipul yiney.

Mutapu ik umeningay Nzamb terorizim?

Nzamb ukisining chisum ni terorizim. (Kuseng 11:5; Jinswir 6:16, 17) Ap Yesu, watumau kud Nzamb, wayipupa in kwilejend pakimbau kusal yom ya chisum. (Mateu 26:50-52) Antu amwing akat kusal yom ya chisum ni kulond anch ayisadin mu dijin dia Nzamb. Pakwez, Nzamb kendiyap uyilejining kusal mwamu. Ni kakatap kutesh ap pakemp malembil mau.—Isay 1:15.

Nzamb ukat kuyibanginang antu awonsu amena mar, kuwejaku ni antu amena mar mulong wa terorizim. (Kuseng 31:8; 1 Pita 5:7) Bibil ulejen kand anch Nzamb ukupwish milong yawonsu ya chisum.—Isay 60:18.

Musul wa terorizim

Bibil ulejen musul wakin wa terorizim, palondinay anch: “Muntu umuyikedil mukwau mulong wa kumumesh mar.” (Mulej 8:9, NWT) Kudiosh kamu pakur, antu akweta ulabu akat kusadin terorizim mulong wa kuyimesh akwau mar. Akwau niyau akat kusadin terorizim mulong wa kufundakesh ku mar mayimeshinau.—Mulej 7:7.

Disudiel dia terorizim

Nzamb ukanin anch ukupwish wom ni chisum, ni ukutek chisambu pa mangand. (Isay 32:18; Mike 4:3, 4) Ukez:

Kajiyish musul wa terorizim. Nzamb ukuswinkesh mant ma an a antu nich Want wend ukuyikela pa mangand mawonsu. Yesu Kristu, Ntakel wa Want winou, ukuyisadin antu yom yitentamina, ukupwish chisum, ni kukwikalap kand muntu ukumumesha mukwau mar. (Kuseng 72:2, 14) Pa chisu chinicha, kwikil muntu ap umwing ukusadina kand terorizim. Antu “akez kasangar nakash ni kuzangijal mu chisambu.”—Kuseng 37:10, 11.
Kapwish yibudikin yawonsu ya terorizim. Nzamb ukuyok antu ku mujimbu ni mu manangu ku yibudikin ya terorizim. (Isay 65:17; Kujingunik 21:3, 4) Ukanin kand kuyivumbul afu, chakwel ashakam pa divu pakwikala chisambu.—Yohan 5:28, 29.

Yom yilondinay Bibil yitwinkishin kashinsh anch Nzamb ukuwanyish kushilamu kwinoku piswimp ap. Pakwez, wiyipwil pamwing ap anch: ‘Mulong wak ni katat Nzamb kapwishinap terorizim?’ Mulong wa kutan chakul, tal video Mulong Wak Ulikidinay Nzamb Mar?

a Yisu yivud, dizu “Terorizim” akat kudisadin mulong wa kwisambin kusadin chisum ap kumwovish muntu wom nich yom ya chisum—pakampwil pantaliken ni antu akad kwikal amasalay—mulong wa kuyovish wom chakwel kuwanyish yom kanang ya politik, ya chirelijon, ap ya antu avud. Pakwez kand kal kamu kwikal kwovijan kwakin mulong wa kwijik chisal cha mutapu ik chifanyidinau kutazuk anch terorizim.

Bibil uyikwashin antu

Bibil ulejen yom yaad ey yikutwisha kukukwash.

Mulembila Nzamb.—Filip 4:6, 7.
Shinshikin pa ruchingej ritwinkishinay Bibil.—Hebereu 6:19.

Ukutwish kutan yiyul yivud ya Bibil mu mutu wa mulong “Comment ne pas vous laisser submerger par l’inquiétude.”

Atuman a Yehova ajijamedina terorizim ayikwashin kand kud ambay nau mu ritiy. Shinshikin yilakej yaad:

Natalya ni mwanend ikundj wa mivu 9, Aslan, ading ku shikol ku Beslan mu Risi, chisu chayandaminau kud aterorist ni kusend antu 1 000 ni kusut mu winkwal. Cha ushon, yitot ya antu afa, ni avud pakach pau ading anakemp. Ap anch Natalya ni Aslan apanda, pakwez ashala mu wom nakash. Tal yom yayikwasha chakwel iyova nawamp.
Pablo ni Sophie afisha mwanau chisu cha terorizim wasadika ku yikumbu ya Tours jumelles mu New York. Tal video ou mulong wa kuman yom yayikwasha awiy ni antu akwau kand amana mar ma terorizim.