Ov, Relijon Ufanyidin Kwiyandjik mu Politik?

Pa mangand mawonsu, antu avud afila mu kan anch ad in kwilej a Yesu Kristu iyandjikin nakash mu milong ya politik. Amwing akat kutakej yitiyij ap yaku ya chirelijon mulong wa kumukwash muntu kanang wa chipolitik ap chisak kanang. Antu a chipolitik niyau akat kusadin yom yikatinau antu avud mu marelijon chakwel ayitond kud antu a mu ma relijon. Mu jingand jimwing, tukat kuman antakel a chirelijon akat kupan niyau majin mau ku mavot chakwel ikal ni ndond kanang mu politik. Ni mu jingand jikwau kand, ukuman relijon ufila mukan anch ud wa “win Kristu” ukwet dilau dia pakamapwil, wijiken kwikal relijon wa want uyikedila.

Utongin nchik? Ov, in kwilej a Yesu Kristu afanyidin kwiyandjik mu politik? Ukutwish kutan chakul kusutil kushinshikin chilakej cha Yesu. Walonda anch: “Nakwinkishany kal chilik chakwel niyen ukez kasalany mudi munakusalanya kal en.” (Yohan 13:15) Chilakej ik chatushilay Yesu pa milong ya politik?

Ov, Yesu wiyandjika mu politik?

Bwat. Yesu kiyandjikap mu milong ya politik wa mangand.

Yesu kakimbap mwaz mu politik. Kitiyap kutakel mant ma antu pasotau kumwinkish kud Satan Djabul “mant mawonsu ma pa mangand.” (Mateu 4:8-10)a Dichuku dikwau, pajinguninau antu anch Yesu wading ukwet mikadil yifanyidinay kwikal nich ntakel muwamp, apakisha kumubachik kwiyandjik mu politik. Bibil ulondin anch: “Yesu wijika anch, asotil kwez amukwat ku usu chakwel amudish want. Chawiy ndiy waya kand ku mikandu amwinend.” (Yohan 6:15) Yesu kasalap yom yasotau antu anch ing wasalang. Kitiyap ap pakemp kwiyandjik mu yom ya politik.

Yesu kanungangap chikas ku yom ya politik. Chilakej, pa chirung cha Yesu in Yuda akisang nakash kufut yitad ya want wa in Rom, ni amanang anch kwading kamu kuburen kutentam. Pakimbau kumubachik Yesu chakwel alejan ndiy ud ku mutambu ik pa mulong winou, Yesu kiyandjikap mu mambamb minam ma chipolitik ma kusot kwijik anch chitentamin ap bwat kufut yitad. Wayileja anch: “Panany kudi Kaisar yom ya Kaisar, ni kudi Nzamb yom yidia ya Nzamb.” (Marko 12:13-17, TMK) Kanungap chikas ku mutambu ap umwing mu milong ya politik, pakwez wamekesha anch chitin kulambul yitad yading yitinau anyikel in Rom, amekeshina Kaisar. Pa chisu chawiy chimwing, wamekesha kand anch kuyiziyil anyikel kukwet mimbu. Muntu kafanyidinap kuyinkish anyikel a ngand yom yifanyidina kumwinkish ching Nzamb, mud difukwil ni rukat ripandakena kujimb.​—Mateu 4:10; 22:37, 38.

Yesu wanunga chikas ku Want wa Nzamb, guvernema udia mwiur. (Luka 4:43) Kiyandjikap mu politik mulong wading wij anch Want wa Nzamb wawiy ukuwanyisha rusot ra Nzamb mulong wa divu, kadiap maguvernema ma antu bwat. (Mateu 6:10) Wading wij anch Want wa Nzamb ukusadinap mant ma antu bwat, pakwez ukumaswinkan.​—Daniel 2:44.

Ov, in Kristu akusambish iyandjika mu politik?

Bwat. In kwilej a Yesu aziyila mbil ya Yesu ya ‘kulik kwiyandjik mu mangand.’ (Yohan 15:19) Alondula chilakej chend ni kiyandjikap mu milong ya politik wa mangand. (Yohan 17:16; 18:36) Pa ndond pa kwiyandjik mu politik, asalang mudimu wayilejau kusal kud Yesu​—kulejan ni kufundish piur pa Want wa Nzamb.​—Mateu 28:18-20; Midimu 10:42.

Chom chading cha usey nakash kud in Kristu akusambish chading kumuziyil bil Nzamb, pakwez ading kand ij anch afanyidin kuyilimish antakel a ngand. (Midimu 5:29; 1 Pita 2:13, 17) Aziyilang ku yijil ya ngand ni afutang yitad. (Rom 13:1, 7) Ap anch kiyandjikap mu politik, pakwez ataninangamu niyau mu midumu ni mwi mbil jatekay mburamatad mulong wa kuyichidij an a ngand.​—Midimu 25:10, 11; Filip 1:7.

Nlel in Kristu kakatap kwiyandjik mu politik

Bibil ulejen patok anch Yesu ap in kwilejend akusambish kiyandjikap ap pakemp mu yom ya politik. Chawiy, Atuman a Yehova pa mangand mawonsu kakatap niyau kwiyandjik mu yom ya politik. Mud in Kristu akusambish, Atuman a Yehova asadining mudimu walejanay Yesu—akat kulejan “rusangu ruwamp ra Want wa Nzamb.”​—Mateu 24:14.