Mutapu ik Wamanay Yesu Politik?

IN KUFUND Rusangu Ruwamp alejana yom yivud yamushikena Yesu mu mudimu wa kulejan yamuteka piswimp ni politik. Chilakej, machuku makemp kupwa kwa dibatish dia Yesu padingay ni mivu 30, Djabul wamuleja mwikadil wa winyikel wa mangand. Kupwa mu mudimu wend wa kulejan, chisak chasota kumutek ikala mwant wau. Kupwa, apakisha kumushindil chakwel andama mu mujikit wa politik. Mutapu ik wasalay Yesu? Tushinshikinany yinship yiney.

Winyikel wa mangand. Rusangu Ruwamp rilejen anch Djabul wasota kumwinkish Yesu winyikel wa “mant mawonsu ma pa mangand.” Tong bil pa yom yiwamp yelay Yesu kuyisadil antu amena mar anch ndiy wasadila usu wend mulong wa kuyikel mangand! Muntu ik wileja politik ni usotin chakin kamu anch antu aya kurutu ukutwisha kulik chipan chinech? Pakwez Yesu walika kuchitambul.—Mateu 4:8-11.

Mwant. Antu avud a pa chirungu cha Yesu ading akimbin ntakel ukeza kupwish milong yau ya nfalang ni ya politik. Pamanau ukaliweny wa Yesu, antu asota anch Yesu andama mu milong ya politik. Ov, chom ik chasalay? Mwin kufund Rusangu Ruwamp Yohan ulondin anch: “Yesu wijika anch, asotil kwez amukwat ku usu chakwel amudisha want. Chawiy ndiy waya kand ku mikandu amwinend.” (Yohan 6:10-15) Chakin kamu, Yesu walika kwiyandjik mu milong ya politik.

In kusal politik. Shinshikin yom yasadika mu machuku kanang kurutu kwa kumujip Yesu. Atubwebu a Afaris, adinga asotila kutambul want ipau pantaliken ni Want wa in Rom, pamwing ni Herod, chid cha chisak cha politik chakata in Rom, ambamba ni Yesu. Asota kumushindil chakwel ikala ku mutambu wa politik. Amwipula anch in Yuda akutwish kufut yitad ku Rom.

Marko wafunda chakul cha Yesu anch: “‘Ov, mulong wak wintentinany pa kan? Nletilany bil rufalang nirital.’ Awiy amuletila rufalang rumwing, chad ndiy wayipul anch: ‘Ov, chifu chinech ni dijin dined yidia pa rufalang riner yidi ya nany?’ Awiy amwakula anch: ‘Yidi ya mwant wa in Rom.’ Chawiy Yesu wayileja anch: ‘Chiwamp, lambulany yom ya mwant wa in Rom kudi mwant wa in Rom, lambulany kand yom ya Nzamb kudi Nzamb.’” (Marko 12:13-17) Mu kurumburil piur pa diyingish dia chakul cha Yesu, buku Les chrétiens et le monde ulondil anch: “Walika kwikal mwant wa in Yuda wa chipolitik ni walejan nich kubabal mipak yidia pakach pa mwant wa in Rom ni Nzamb.”

Palikay kwandam mu politik, Kristu kamekeshap anch walika kamu kuyikwash anch mu mar mau, mudi uzwendj, mafef, ni kuburen kutentam. Chakin kamu, Bibil ulejen anch ndiy wayovila riy nakash antu adinga mu mar. (Marko 6:33, 34) Chikwa kand, Yesu kasambishap kusal ma kampany mulong wa kudiosh kuburen kutentam mu mangand, ap anch antu amwing apakisha kumutek mu milong ya kupwitijan ya pa chirung chinicha.

Chakin, mudi kamu mulejenau yilakej yiney, Yesu walika kwiyandjik mu milong ya politik. Pakwez chidi nchik piur pa in Kristu nlel? Chom ik chifanyidinau kusal?