Mutapu Ukutwishay Yesu Kwakul

Antu avud amwovila Nzamb wom atongining anch relijon ufanyidin kwandam mu politik. Itiyijin anch relijon ukutwish kwikal nich mudimu wa usey wa kupwish milong ya antu. Pakwez, in kwitiyij akwau akashinsh atongin anch relijon ni politik yifanyidinap kwikal pamwing. Ov, chom ik utongina amwiney piur pa mudimu wa relijon mu politik? Ov yom yiney yikweta yikash yikutwish kusal pamwing?

YESU KRISTU amulejana mudi “muntu mujim nakash mu rusangu ra antu ra relijon.” Chawiy lel, tong bil anch twamwipul chipu ech, ov, relijon ufanyidin kwiyandjik mu politik? Ov, chom ik chikulonday? Padingay pa divu, ndiy wakula ku chipul chinech kusutil ku mazu ni ku yisal yend. Chilakej, mu Malejan mend ma pa Mukandu mijikena nawamp Yesu uyinkishin in kwilej end umutakel uyikwashina kujingunin mudimu ufanyidinau kusal mu chisak chau cha antu. Tushinshikinany manans mamwing mu mafundish minam ma pa mukandu.

Kwikal Nich Usu pa Mwom wa Antu Akwau

Yesu walejan mwikadil wafanyidinau in kwilej end kwikal nich pantaliken ni mangand. Walejen anch: “En udiany mungu wa mangand. Pakwez mungu anch washadish kutal kwau, kwikil kand mutapu wa kuutadish. Wikal kal uyimp, chawiy akuudjibul, chad antu akuudjatol. En udiany chimunyik cha mangand. . . . Chifanyidin uman wen ni yisalijok yen yimekan kurutu kwa antu chakwel amushiman Tatukwen udia mwiur.” (Mateu 5:13-16) Ov, mulong wak Yesu wayisikeja in kwilej end ni mungu kupwa ni chimunyik?

Mazu ma Yesu marumburikin anch in kwilej end adi mudi mungu, kangal kusu mulong wa kachisak kakemp, pakwez mulong wa antu awonsu. Awiy adi chimunyik kangal mulong wa uvud kanang wa antu, pakwez mulong wa antu awonsu asotila kuman nawamp. Mu kusadil mazu minam, Yesu walejana patok anch kasotap in kwilej end ishakamina ayinau kulemp ni antu akwau. Ov, mulong wak chidiap mwamu?

Shinshikin chilondwila ech: Mungu ukutwishap kulam yakudia anch kaubombilap nich yakudia. Mwend kakutwishap kudiosh mididim mu kapalikany anch autekin kulemp nich kapalikany kinak. Chawiy lel, chiswapel kutesh anch Yesu kapanap mbil ap pakemp kudi in kwilej end anch adiokala kuya kwindond kwa ayinau pa divu chakwel akasala kwindond yindjing chisak cha in kwitiyij. Ndiy kayikasikeshap kand in kwilej end anch ashakama kulimp ni mangand. Mulong mungu uswiridin kwikal pa yakudia ni chimunyik chiswiridin kudiosh mididim, chawiy lel in Kristu aswiridin kwikal nich usu kanang pa mwom wa antu akwau.

“Kadiap a Mangand”

Pakwez, malejan ma Yesu piur pa mutapu in kwilejend afanyidin kushakam ni antu akwau malangwishin chipul chimwing cha usey piur pa mwikadil wa in Kristu pantaliken ni politik. Mulong wak? Kurutu kwa rufu rend, Yesu walembila kudi Nzamb mulong wa in kwilej end anch: “Kiniyilembidilip chakwel ey uyidiosha mu mangand, pakwez ey uyilama ku tuyimp. Awiy kadiap a mangand, mudi am kinidip wa mangand.” (Yohan 17:15, 16, TMK) Chawiy lel, ov, mutapu ik in Kristu akutwisha kwipuk kwikal a mangand, ni kwikal nich usu mu chisak chau? Chakwel twijika, tushinshikinany bil pa yipul yiney yaad:

• Mutapu ik wamanay Yesu politik?

• Chom ik chifanyidinau in Kristu kusal nlel?