Chom ik Chifanyidinau in Kristu Kusal Nlel?
NLEL unou, in Kristu akin kakutwishap kwandam mu politik. Ov, mulong wak? Mulong alondwil chilakej cha Yesu. Walonda piur pa amwinend anch: “Am kinidip wa mangand.” Piur pa in kwilej end, walonda anch: “kiudianyip a mangand.” (Yohan 15:19; 17:14, TMK) Shinshikinany mayingish mamwing masadil anch in Kristu alika kwandam mu milong ya politik.
1. Ukaliweny wa antu ukwet mipak. Bibil ulejen anch antu kakwetap ukaliweny ap kand mbil ya kwiyikel ayinau. Muprofet Jeremiy wafunda anch “Kwikil muntu ukutwisha kutakel mwom wend amwinend.”—Jeremiy 10:23.
Mulong antu kayitangap mulong wa kutwish kwiyendish ni usu wau ayinau, chawiy lel kayitangap chakwel atwisha kwiyikel ku usu wau ayinau. Mu kulond piur pa mipak ya winyikel, David Fromkin mwin kwilej rusangu ra pasak wafunda anch: “Winyikel autakedil kudi antu; chawiy lel katwishinap ni dikez diau didiap dia kuchingejin. Akat kusadil usu kanang, pakwez pa antu kusu akemp.” (La question du gouvernement [angl.]) Choviken mud ik anch Bibil utubabeshin anch tufanyidinap kumuchingejin muntu!—Kuseng 146:3.
2. Nlel unou ayilembil akwet chibachikin kanang. Satan pamulejay Yesu winyikel wa mangand, Yesu katadikap anch Djabul wading ni usu wa kumwinkish mant minam mawonsu. Chakin, chisu chikwau, Yesu wamutazuka Satan anch “mwin kutakel wa mangand minam.” Kwinyim kwa mivu kanang kambuy Paul walonda anch Satan udi ‘nzamb wa mangand minam.’ (Yohan 14:30; 2 Korint 4:4) Paul wayifundila ambay nend in Kristu anch: “Kurish kwetu . . . kudi kwa kurish ni mant ni mausu, ni ant a mangand ma mididim, tukat kurish ni mizwizwimb yiyimp ya mu jindond ja mwiur.” (Efes 6:12) Kwinyim kwa chinech, Satan ni ayilembil awiy anyikel akin a mangand minam. Ov, chom chinech chifanyidin kwikal nich chibachikin ik pa mutapu wetu wa kuman politik?
Tongin bil pa kwisikej kwinoku: Mudi kamu mukatau kubachik tumaat tukemp kudi mambek makash ma karung, ditenchik dia politik dia antu adibachikin kudi usu, wa Satan ni ayilembil. Ni mudi kamu mukutwishau in kwauk adia mu tumaat twinetu kusal pakemp chakwel kuswimp chibachikin cha mambek minam makash, in kusal politik akutwish kusal pakemp chakwel kuswimp chibachikin cha Satan ni ayilembil. Satan ni ayilembil akwata kal mupak wa kuyijondish antu ni kutek “riyind pa mangand.” (Kujingunik 12:12) Chawiy lel, kuswimp kwakin akutwish kukulet kurutu oku ching kusu kudi muntu ukweta dikand nakash kuyipandakanamu Satan ni ayilembil end. Muntu mwinou udi Yehova Nzamb amwinend.—Kuseng 83:18; Jeremiy 10:7, 10.
3. In Kristu akin akat kuziyil ching kusu ku Want wa Nzamb. Yesu ni in kwilej end ading ij anch pa chisu chatekay kal, Nzamb amwinend ukutek winyikel mwiur chakwel kuyikel piur pa mangand mawonsu. Bibil utazukin winyikel winou anch Want wa Nzamb ni ulejen anch Yesu Kristu amuteka kal kwikal Mwant wa Want winou. (Kujingunik 11:15) Mulong wakwel anch Want winou wikala nich usu pa antu awonsu, Yesu wasala anch “Rusangu Ruwamp ra Want wa Nzamb” rikala mutu wa mulong wa kusambish wa malejan mend. (Luka 4:43) Ndiy wayifundisha kand in kwilej end kulembil anch: “Want wey weza.” Ov, mulong wak? Mulong kusutil ku Want winou, rusot ra Nzamb rikez chakin kamu kusadik mwiur ni pa divu.—Mateu 6:9, 10.
Chawiy lel, ov, chom ik chikeza kuyishiken winyikel wa antu? Bibil wakwil anch winyikel wa “mangand mawonsu” akez kuushesh. (Kujingunik 16:14; 19:19-21) Anch muntu witiyijin chakin anch Want wa Nzamb udi piswimp ni kudiosh ditenchik dia antu dia politik, ukwipuk chakin kupan ukwash ku ditenchik dined dia politik. Kupwa, anch wapim kupan ukwash ku winyikel wa antu ufila nich, mudi chibudikin, ukwikal chakin mukankuny wa Nzamb.
[Tablo wa jinsangu udia pa paj wa 6]
Atuman a Yehova asadil usu wa kukasikesh Want wa Nzamb, kakatap kukasikesh ditenchik dia politik bwat