Mutapu Tukutwisha Kwikal—in Kwitiyij Akashinsh ni An a Ngand Akin

YOM ik yaad yading yimekeshina patok mudimu wa Yesu? Chakusambish, Yesu wasota kukarumun michim ya antu, kasotap kutenchik politik. Chilakej, tal yom yakasikeshay Yesu mu Malejan mend ma pa Mukandu. Kurutu kamu alonda piur pa maswir ma kwikal mudi mungu ni chimunyik, wayileja in kumutesh end anch kuyuk kwakin kudi kwa awiy ija anch “tukwet kuswir kwa yom ya Nzamb.” Wawejinaku anch: “Ayuk kwau antu itudishina, . . . adia zwang mu michim, . . . chisambu.” (Mateu 5:1-11) Yesu wayikwasha in kwilej end chakwel kuman usey wa kuswimp yitongijok ni yovil yau kulondulijan ni yany ya Nzamb piur pa yom yidia yiwamp ni yiyimp ni usey wa kumusadil Nzamb ni muchim wawonsu.

Cha kaad, pamanay Yesu mar ma antu, ranaken rend mulong wa ambay nend antu ramubachika kudutish mar mau. Pakwez, kasalap chinech kwikal rutong rend ra kudiosh mar mawonsu. (Mateu 20:30-34) Wayoka ayej, pakwez mayej kamajiyishap. (Luka 6:17-19) Wayikola adinga ameshinau mar, pakwez kasolikany kadandamena kulet mar. Wayinkisha antu adinga ovila nzal yakudia, pakwez kamungun kadandamena kuyikwat antu.—Marko 6:41-44.

Kukarumun Michim ni Kukepish Mar

Mulong wak Yesu wateka manangu mend pa kukarumun michim ni kukepish mar pakwez kangal pa kuswimp kwa yitenchik ap pa kudiosh kwa mar? Yesu wading wij anch Nzamb ukwet rutong ra kusadil Want Wend mu machuku ma kurutu chakwel adiosha winyikel wawonsu wa antu ni kushesh musul wawonsu wa mar. (Luka 4:43; 8:1) Chikwau kand, pa chisu chamukasikeshau Yesu kudi in kwilej end chakwel asutisha chisu chilemp mu kuyok ayej, Yesu wayileja anch: “Tufanyidin kuya ku mal makwau ma piswimp, chakwel nikayirumburil kand niyau mazu ma Nzamb. Wawiy mulong unezila.” (Marko 1:32-38) Yesu wakepisha mar ma ku mujimbu ma antu avud, pakwez chadinga cha usey nakash kudiay kwading kulejan ku kufundish dizu dia Nzamb.

Mu mudimu wau wa kulejan nlel, Atuman a Yehova ikasikeshin kumwimburij Yesu. Asadil usu wa kukepish mar kusutil ku kupan ukwash wakashinsh kudi antu adia mu maswir. Pakwez Atuman kakatap kusal usu chakwel adiosha kasolikany ka mangand. Itiyijin anch Want wa Nzamb ukez kudiosh musul wa mar mawonsu. (Mateu 6:10) Mudi Yesu, akasikeshin kukarumun muchim pakwez kangal yitenchik ya politik. Mutapu winou wa kusal udi wa manangu mulong milong yijim ya antu yidiap ya politik, pakwez ya yitiyij piur pa kuwap ni kuyip.

An a Ngand Akin

Pa chisu chawiy chimwing, Atuman a Yehova itiyijin anch chidi chisend chau cha in Kristu cha kwikal an a ngand awamp. Chawiy lel, akat kuyilimish anyikel atakedila. Kusutil ku mikand yau ni mudimu wau wa kupan uman, akat kuyikasikesh amutej nau chakwel kuziyil ku chijil. Pakwez, anch anyikel it yom yipwitijadina nich yitinay Nzamb, Atuman kakatap kuziyilang kwi mbil ya mutapu winou. Akat “kumuziyil Nzamb kupandikan kuyiziyil antu.”—Midimu 5:29; Rom 13:1-7.

Atuman a Yehova akat kuyendil antu awonsu a mu chisak chau chakwel kuyit kwilej nau Bibil chamwamu pakad kufut. Mudi chibudikin cha malejan minam, ma miliyon ma antu akarumuka. Muvu ni muvu, yitot ya tunan twa antu ayikwashin kulik yisal yiyimp mudi kuna ruwand, kukwachik kwa mar, kuna damb, masengan ma nfalang, ni masandj. Ikadil kal an a ngand asadila yom yiwamp mulong ileja kusadil yany ya Bibil mu mwom wau.

Chikwau, kwilej Bibil kukwashin yid ya majuku kukasikesh kalimish kau mulong wa muntu ni mukwau ni kuwapishin mutapu wa kwambamb—pakach pa ambay a uruw nich kand anvaj ni an ni pakach pa an ayinau. Chinech chidi chom chikasikeshina urund pakach pa antu awonsu mu dijuku. Chawiy lel, majuku makash, masadining chisak chikala chikash.

Kupwa kwa kuchirikin manans mashinshikidinau mu mitu ya milong yiney, chom ik utongina: Ov, Bibil uyitiyin antu iyandjikina mu milong ya relijon ni ya politik? Chakul chidi patok, bwat kakatap. Pakwez, ov, in Kristu akin afanyidin kwikal an angand akin? Mwaning, afanyidin. Mutapu ik ukutwishau kusal mwamu? Kusutil ku kulondul mbil ya Yesu ya kwikal mudi mungu ni mudi chimunyik pa mangand.

Antu ikasikeshina kulondul umutakel winou uwamp wa Kristu akez kwiletin ayinau ni majuku mau yiyukish—pamwing ni mu chisak mushichau. Atuman a Yehova a pol pen akusangar kukulej jinsangu jivud piur pa program wa dilejan dia Bibil udandamedina kusadik katat mu chisak chen.a

[Dizu didia Kwishin kwa paj]

[Tablo wa jinsangu udia pa paj wa 7]

Yesu wasota kukarumun michim, kangal yitenchik ya politik

[Tablo wa jinsangu udia pa paj wa 8]

Atuman a Yehova itiyijin chisend chau cha kwikal an a ngand awamp