Yom Yilondinay Bibil Piur pa Kukaninik kwa Chirungul pa Divu ni Machuku Metu ma Kurutu

“Kukaninik kwa chirungul chid chikokujol chikash nakash. Kurutu oku divu dikwikalap kand kwau chad ndond ya kushakam.”​—(The Guardian).

Antu akat kurish ni milong yikash ya kwikimbin. In siyans avud itiyin kal anch yom yisadinau antu yawiy yiletishina kukaninik kwa chirungul pa mangand. Kukaninik kwinoku kwa chirungul kukat kulet yibudikin yiyimp nakash mud:

• Kuvulijan kwa yinship yikash yidiokila ku kuswimp kwa chirungul mud mambek makweta chirungul nakash, chang chikash, rinkind mukash, ni yom yiney yikat kuletish kupumbok kwa mem ni kasu mu madit.

• Kwengurik kwa mem mikwatina.

• Kuvul kwa mem mu karung.

Kukaninik kwa chirungul kwameshin kal antu mar pa divu diawonsu. Kupwa kwa kufund piur pa mashakamin madingau nich antu mu jingand 193, rapor umwing wa New York Times walejana anch: “Divu dikat kutoy mulong wa kwit ukwash.” Mulong kukaninik kwa chirungul kwajipin antu ni kumeshikish antu avud mar, Organisation mondiale de la santé watazukin chom chinech anch “chid chikokujol chikash chibindishina ukash wa mujimbu chirishinau nich antu awonsu.”

Pakwez ap mwamu, tukwet mayingishin mawamp makwikal ni ruchingej ra machuku ma kurutu. Bibil wasambela kulejan yom tumena nlel unou, ni walejana kand mulong wak tufanyidina kumuchingej Nzamb anch kakuvungap makas, ni yom yikusalay mulong wa kutuking mu machuku ma kurutu.

Ov, kukaninik kwa chirungul kukat kuwanish uprofet?

Inge. Yibudikin ya mar yidiokila ku kukaninik kwa chirungul pa mangand yikwatijadin ni yinship yasambelay kulejan Bibil piur pa chirung chetu.

Uprofet: ‘Ijik anch, machuku ma kwisudiel makez kwikal ma mar nakash. Antu akez kikal in kwikat ayinau, in kukat nfalang, . . . akad kushinshaman, . . . akad kwovijan, . . . in kutungilijan matung, akad kubangaku antu akwau.’ 2 Timote 3:1-4.

Bibil wasambela kulejan yisal ni mikadil yiyimp yikwetau antu yishikijina ku kukaninik kwa chirungul. Maguvernema ni in kwisak atekin nfalang kurutu ni kakatap kutongijokin piur pa antu akushakama pa divu machuku ma kurutu. Ap anch akwat mupak wa kubombakan mulong wa kusal usu pamwing, pakwez kakatap kutanijan mu yom yifanyidinau kusal mulong wa kukangesh chirungul kukaninik pa mangand.

Uprofet winou umekeshin anch tufanyidinap kuchingej anch antu akutwish kuswimp yisal yau ni kuking divu. Pakwez, Bibil ulondin anch antu in kwitongin ayinau “akez kuya kurutu nakash mu kuyip.”—2 Timote 3:13.

Mulong wak tukutwisha kwikal nich kashinsh anch Nzamb ukusal chom kanang pa mulong winou?

Bibil umekeshin anch Yehovaa Nzamb ukwatin nich usey nakash divu ni yom yidiap. Tumananaku kwetu maverse masatu mamekeshina anch Nzamb ukusal chom kanang piswimp ap.

1. 1. Nzamb ‘katangap [divu] kwikal ndond yamwamu, pakwez waditanga chakwel antu ashakamap.’—Isay 45:18.

   Nzamb ukuwanyish rusot rend mulong wa divu. (Isay 55:11) Kakwitiyap anch Divu adishesha ap pashal pakad antu.

2. 2. “Itudishina akez kaswan ngand, akez kasangar nakash ni kuzangijal mu chisambu. Mwin kutentam mwawonsu ukez kaswan ngand, ukez kashakamamu chikupu.”—Kuseng 37:11, 29.

   Nzamb washidinamu kal anch antu akushakam pa divu chikupu mu chisambu.

3. 3. “Antu ayimp akez kayidiosh mu mangand.”—Jinswir 2:22.

   Nzamb washidinamu kal kuyishesh antu adandamedina mu uyimp, kuwejinaku ni antu akata kushesh divu.

Yom yikusalay Nzamb piur pa machuku metu ma kurutu

Mutapu ik ukuwanyishay Nzamb kushilamu kwend piur pa divu? Ukusal mwamu kusutin guvernema ukuyikela pa mangand mawonsu utazukinau anch Want wa Nzamb. (Mateu 6:10) Want winou ukuyikel kudiokal mwiur. Ukwikalap ni kuswir kwa kwambamb ni maguvernema makwau pa milong yitadina divu ni yom yidiap. Chinyim ni chinech, Want wa Nzamb ukuswinkan maguvernema mawonsu ma an a antu.—Daniel 2:44.

Want wa Nzamb rid rusangu ruwamp kud an a antu ni ku yitang yidia pa mangand. (Kuseng 96:10-13) Shinshikin yom yikusalay Yehova Nzamb kusutin Want wend.

• Ukuwapishiril yitang yidia pa divu

  Yom yilondinay Bibil: “Mpay yikez kasangar, ni yisalamb yikez katupuk mwi ngand yiumidila.”—Isay 35:1.

  Chirumburikina mazu minam piur pa machuku metu ma kurutu: Yehova ukuwapish divu, djat ni ku jindond jayipishau chipandakena kud an a antu.

• Ukudutish yinship yikata kuletish yirung yikash

  Yom yilondinay Bibil: “[Yehova] wanenetisha rinkind ni mambek, ni mem mikala kand zong.”—Kuseng 107:29.

  Chirumburikina mazu minam piur pa machuku metu ma kurutu: Yehova ukwet dikand dia kudutish usu wa yitang. Antu kakumanap kand mar madiokila ku yirung yikash.

• Ukuyifundish antu kulam nawamp divu

  Yom yilondinay Bibil: “Nikukulej ey ni kukwijikish njil yiufanyidina kulondul.”—Kuseng 32:8.

  Chirumburikina mazu minam piur pa machuku metu ma kurutu: Yehova wayinkisha antu chisend cha kulam nawamp divu. (Disambishil 1:28; 2:15) Ukutufundish mutapu uwamp wa kuwanyish chisend chinech mulong wa kulam nawamp yitang ni kulik kushesh yom yidia pa divu.