CHISHANY KU MES!
Kukaninik Nakash kwa Chirungul pa Mangand Mawonsu—Bibil Ulondinap ik?
Mwi Ngond wa 7, 2022, ijikishin piur pa kukaninik kwa chirungul pa mangand mawonsu:
“Ngand ya Chine yirishin ni chirungul chikash ngond winou, pakwez antakel ijikishin anch kukwikal kand kukaninik kwa chirungul nakash mu misumb piswimp 70.”—25 Ngond wa 7, 2022, CNN Wire Service.
“Mulong chirungul chikaninikin nakash mu Erop mwawonsu, kasu kanyukwishin madit kwikil mutapu.”—17 Ngond wa 7, 2022, The Guardian.
“Diarubing, mu misumb yivud ya mu Etats-Unis mwakaninikin chirungul chikash chakadingap kal kushiken, pa chisu chawiy chimwing, kud chirungul chikash chikata kwez pa chirung cha marungul ku mutambu wa Kwingangel ni ku jindond jikwau ja Kurul ni ja Pakach pa Etat-Unis.”—24 Ngond wa 7, 2022, The New York Times.
Yom yiney yawonsu yirumburikin ik? Ov, kurutu oku chikukasikan kushakam pa divu? Bibil ulondinap ik?
Ov, chirungul chinech chiwanyishin uprofet wa Bibil?
Mwaning. Kukaninik kwa chirungul pa mangand mawonsu kukwatijadin ni yom yasambelay Bibil kulejan yikusadika pa chirung chetu. Chilakej, Yesu wasambela kulejan anch tukuman “yom yikwamushena yikwatishena wom.” (Luka 21:11) Kukaninik kwa chirungul pa mangand mawonsu kuyishikijin antu avud kwov wom anch yom yisadinau antu yikuyipish divu ni chikukasikan kushakamap.
Ov, pa divu pakez kashal pakad muntu?
Bwat. Nzamb watanga divu kwikal ndond yikushakamau antu chikupu. (Kuseng 115:16; Mulej 1:4) Kakwitiyijap anch antu adishesh. Pakwez ukez “kuyishesh awonsu akata kushesh mangand,” mud mwashilayamu.—Kujingunik 11:18.
Shinshikin kusu uprofet waad umekeshina yom yikwau yakaninay kal Nzamb:
“Mpay yikez kasangar, ni yisalamb yikez katupuk mwi ngand yiumidila.” (Isay 35:1) Nzamb kakwitiyijap anch divu dishal mankur, pakwez ukurijek jindond jawonsu jayipishinau kal.
“Yey ukata kwez kutal pansh ni kwichilap mem, ukat kwizwish divu nich dipit.” (Kuseng 65:9) Kusutin chiyukish cha Nzamb, divu dikwikal paradis.
Anch ukimbin kwijik yom yivud yimekeshina anch kukaninik kwa chirungul kuwanyishin uprofet wa Bibil, tang mutu wa mulong “Yom Yilondinay Bibil Piur pa Kukaninik kwa Chirungul pa Divu ni Machuku Metu ma Kurutu.”
Mulong wa kwijik yom yivud piur pa yom yikaninay piur pa kurijek divu, tal mutu wa mulong “Qui sauvera la terre ?”