Yisal ya Kujipan ni Mat Yisadikina Pa Mangand Mawonsu—Bibil Ulondinap ik?

Kwasadikin yisal ya kujipan nich mat pa mangand mawonsu mwi Ngond wa 7, 2022:

• “Amujipin Ikundj umwing Shinzo Abe Ikundj wijikena nakash mwi ngand ya Japon [wading Premier Ministre, kujipan kwinoku kwayisadin antu a pamangand mawonsu nayimp, pakampwil mwi ngand ya Japon mukepina milong ya chisum ni mudia mbil jikangeshina kulandish mat.”—Japan Times machuku ma ngond 10 Ngond wa 7, 2022

• “Antu a mu Danmark ovil nayimp palozinay ikundj umwing antu asatu pa ndond ya kulandishin antu avud mu Copenhague.”—machuku ma ngond 4 Ngond wa 7, 2022, Reuters.

• “Mu Afrique du Sud: Amakundj amwing adia ni mat alozin antu 15 adia anila maar mu bar ap ndond yijim ya kunil maar mu musumb wa Soweto township.”—machuku ma ngond 10 Ngond wa 7, 2022, The Guardian.

• “Rubing ra 4—5 ngond wa 7, 2022 alozin antu 220 ni kusut mu États-Unis. CBS News.

Ov kud ruchingej anch yisal yiney yawonsu ya chisum yikez kupwa? Bibil ulondinap ik?

Yisal ya Chisum yikupwa

Bibil utazukin chirung chetu anch “machuku ma kwisudiel,” mukwikalau antu avud in chisum nakash, charumburik anch akusal yom yiyimp nakash ni ya chisum. (2 Timote 3:1, 3) Yisal yiney ya chisum yisadin anch Antu ova wom. (Luka 21:11) Pakwez, Bibil ukanin anch yisal ya chisum yikez kupwa kamu rawonsu ni “antu a Nzamb akez kashakam wakad kwakam, ni yikumbu yau yikez kikal ndond ya kwikangin nich chisambu.” (Isay 32:18) Mutapu ik ukupwa yisal ya chisum?

Nzamb ukuyishesh antu ayimp awonsu ni ukushesh mat mawonsu.

• “Antu ayimp akez kayidiosh mu mangand.”—Jinswir 2:22.

• “[Nzamb] ukat kukatwish njit ni kwisudiel kwa mangand; Ndiy ukat kubukon mat, ukat kukatwol mirumbu yikunku yikunku, ukat kwosh matemb mu kasu.”—Kuseng 46:9,TMK.

Nzamb ukudiosh misul yawonsu ya chisum ni kuyifundish antu kushakam mu chisambu.

• “Kukez kikalap chom cha ubaj ap chom chiyimp ku Sion, wawiy mukandu utumbila wa Nzamb. Ngand yikez kizul nich ronganyin ra [Yehova], mud mukata kwizul mem mu karung.”—Isay 11:9.

• Kusambish katat, Nzamb ukat kuyifundish antu a pa mangand mawonsu kwipuk yom ya chisum ni kulik kusadin mat, ni anch antu “akez kachil jimpak jau ja misamun jikala jinkasu, ni mirumbu yau yikal jimpak ja kukatul nich yakwangul.”—Mike 4:3.

Anch ukatin kwijik yom yivud piur pa kushilamu kulejenay Bibil piur pa ngand mwikwikala antu akad kov wom, tang mutu wa mulong “Affranchis de la peur : est-ce possible ?”

Anch ukimbin kwijik yom yivud piur pa mutapu ukupwa yisal ya chisu rawonsu, tang mutu wa mulong “Enfin la paix sur la terre !”