Ov, in Kristu Afanyidin Kwiyandjik mwi Njit?—Yom Yilondinay Bibil

Mud mutapu twamanang kusutil njit ja mu Ikren, antakel avud a marelijon ma win Kristu akat kuyikasikesh antu kunung chikas kwi njit. Tal mutapu antakel a marelijon amwing mununginau chikas ku mitambu kushalijan mwi njit:

• Métropolite Épiphane wa mu musumb wa Kiev walondin anch: “Tuyijikitishin nakash amasalay etu arishidina Ikren, ngand yau ya chivadik . . . Tudandamedin kukuvurikany, kukulembilany nich muchim wawonsu, ni kukukwashany.” (The Jerusalem Post, wa 16, Ngond wa 3, 2022)

• “Mukurump wa Egliz Ortodoks mu Risi wasadin Diarubing chikumangan cha pakampwil mulong wa amasalay a mu Risi, ni wayikasikeshin kurishin ngand yau ‘mulong awiy ayinau an a ngand ya Risi afanyidina kusal mwamu,’ padandamedinay Moscou kurish mu Ikren.” (Reuters, wa 3, Ngond wa 4, 2022)

Ov, in Kristu afanyidin kwiyandjik mwi njit? Bibil ulondinap ik?

Yom ik yilondinay chakin kamu Bibil?

Bibil ulejen anch antu amulondwila chakin kamu Yesu kakatap kwiyandjik mwi njit.

• “Chirish mpak yey mu chilal, mulong muntu mwawonsu ukata kurish nich mpak ya musamun, akez kamujip kand kwi mpak ya musamun.”—Mateu 26:52.

  Ov, tukutwish kulond anch muntu ukwashina ap urishina njit uziyidin chakin kamu ku mazu minam ma Yesu?

• “Katat nakulejany kal chijil chisu anch: ‘Katijanany muntu ni mukwau. Chifanyidin en kukatijanany muntu ni mukwau mudi am chinakukatana en. Anch niyen wakatijanany mwamu, chawiy antu awonsu akez kijik anch, en udiany in kwilejam.’”—Yohan 13:34, 35.

  Ov, tukutwish kulond anch muntu ukwashina njit ukwet rukat ralonday Yesu rifanyidinau kwikal nich in kwilejend?

Mulong wa kwijik yom yivud, tang mutu wa mulong “Peut-on concilier guerre et christianisme ?”

Ov, nlel in Kristu afanyidin kurish njit?

Ov, nlel in Kristu akutwish kamu kulik kwiyandjik mu milong ya njit? Mwaning. Bibil wasambela kulejan anch mu chirung chetu, chitazukinau anch “machuku ma kwisudiel,” kukwikal antu a michid yawonsu ni “kakez kilejap kand kurish njit,” mud mutapu wafundishay Yesu.—Isay 2:2, 4.

• Mulong wa kwijik yom yivud, tang mitu ya milong yidia mu Chinong cha Kalam chilondina anch “Mutapu ik Umeningay Nzamb Njit?”

Piswimp ap Yehova,a “Nzamb ukata kutwinkish chisambu,” ukusadin Want wend wa mwiur mulong wa kuyikol antu “ku kuzengol ni ku chisum.”—Filip 4:9; Kuseng 72:14.

• Mulong wa kuman mutapu ukusalay mwamu, tal video Want wa Nzamb Chom Ik?