CHISHANY KU MES!

Relijon mwi Njit ja Ikren—Yom ik Yilondinay Bibil?

Shinshikin mazu malondwilaku am mamekeshina mwikadil wa antakel ajim a relijon piur pa njit jisadikina mu Ikren:

“Patriarche Kirill, udia mukurump wa Egliz Ortodoks mu Risi kalondinap chom ap chimwing mulong wa kufish nich njit jiletinay Risi mu Ikren. . . . Egliz wend upalangeshin jinsangu ja makasu piur pa Ikren, ni Putin ukat kusadin jinsangu jinej mulong wa kwiyingish nich.”—EUobserver, 7 Ngond wa 3, 2022.
“Patriarche Kirill . . . wamulondidin Risi kusutil kulond anch njit jinej jikwashin kurishikish chitil.”—AP News, 8 Ngond wa 3, 2022.
“Métropolite Épiphane wa mu musumb wa Kiev, udia ntakel wa Egliz wa Ortodoks mu Ikren, wayiyukishin antu a mu Egliz wend diakajikamu chakwel ‘ayirishikish amasalay a Risi’ . . . Walondin kand anch kuyijip amasalay a Risi chidiap kwau chitil.”—Jerusalem Post, 16 Ngond wa 3, 2022.
“Etu [Ditenchik dia ma Egliz ma mu Ikren (UCCRO)] tud ku mutambu wa amasalay a mu Ikren ni antu awonsu aturishidina, tuyukishin usu usadinau mulong wa kuchidij ngand ya Ikren ku akankuny netu, ni tukat kuyilembiil.”—Mazu ma UCCROa, 24 Ngond wa 2, 2022.

Utongin nchik? Ov, marelijon mafila mukan anch mamulondwil Yesu Kristu mafanyidin kuyikasikesh antu au kurish njit? Yom ik yilondinay Bibil?

Rusangu ra relijon mu yom ya njit

Jinsangu jimekeshin anch yisu yivud relijon ukat kwitiy, kuyingish, ap kand kukasikesh njit oku akat kutong anch asadin mwamu mulong wa kuletish chisambu. Kwasut kal mivu yivud kudiosh kusawilau Atuman a Yehova rubabek riner ra marelijon. Shinshikin yilakej yimwing yidiokila mu mikand yetu.

«Les croisades: une “illusion tragique”» umekeshin anch Egliz Katolik wa Rom ndiy wayinongishisha antu mu dijin dia Nzamb ni dia Kristu.
«L’Église catholique en Afrique» ulejen mutapu relijon wakanganyay kukangesh njit ja michid ni kunongish yisak ya antu.
Mitu ya milong «La religion est-elle responsable?», «Le rôle de la religion dans les guerres» ni «La religion prend parti» yirumburil mutapu antakel a Katolik, Ortodoks, ni a Protestant mwakwashau mitambu yawonsu yaad mu jinjit jivud.

Ov, marelijon ma win Kristu mafanyidin kukwash njit?

Yom yafundishay Yesu: “Mukata mukwen mudi muwikatila ey amwiney.” (Mateu 22:39) “Yikatany akankuny nen.”—Mateu 5:44-47.

Tong bil: Ov, relijon ukutwish kufa mukan anch uziyidin mbil ya Yesu piur pa rukat oku ukat kuyikasikesh antu end kurish njit ni kuyijip akwau? Mulong wa kutan chakul, tang mitu ya milong «Les vrais chrétiens et la guerre» ni «Est-il possible d’aimer ses ennemis?»

Yom yalonday Yesu: “Want wamam kiudiap wa mangand minam. Anch Want wam wading wa mangand minam, ing in kwilejam elang kurish chakwel kangal ampana.” (Yohan 18:36) “Muntu mwawonsu ukata kurish nich mpak ya musamun, akez kamujip kand kwi mpak ya musamun.”—Mateu 26:47-52.

Tong bil: Anch in Kristu kadingap kafanyidina kurish njit ap mulong wa kumuchidij Yesu, ov, kud diyingishin dikutwisha kuyibachik kurish njit? Tang mutu wa mulong «Peut-on concilier guerre et christianisme?» mulong wa kuman mutapu in Kristu akusambish mwalondulau nich kushinshaman chilakej cha Yesu ni mafundish mend.

Yom ik yikumashikena marelijon manungina chikas ku jinjit?

Bibil ufundishin anch Nzamb kitiyinap marelijon mafila mu kan anch mamumekeshin Yesu, pakwez maziyidinap ku mafundish mend.—Mateu 7:21-23; Titus 1:16.

Buku wa Kujingunik umekeshin anch ku mes ma Nzamb marelijon ma mutapu winou mawiy mayijipeshina kal “antu awonsu a pa mangand ajipau.” (Kujingunik 18:21, 24) Mulong wa kwijik mulong wak, tang mutu wa mulong «Qu’est-ce que Babylone la Grande?»
Yesu walejana anch marelijon mawonsu makadiay Nzamb kwitiy akumashesh mulong wa yisal yau yiyimp, mud mutapu mutond uvundina ukata kusong mabuj mavundina “akuukatul ni kuudjibul mu kasu.” (Mateu 7:15-20) Tang mutu wa mulong «La fin de la fausse religion est proche!» mulong wa kuman mutapu ukusadika yom yiney.

Atuman a Yehova Ashalijadin ni Marelijon Makwau

Atuman a Yehova a mu Risi, mu Ikren, ni pa mangand mawonsu akat kuziyil mbil ya Yesu ya kulik kwiyandjik mu politik ap mu jinjit. Chawiy, twiyandjikinap ap kukwash njit jinej ap jikwau jin jawonsu. Mulong tukwatin mupak wa kulamat ku mafundish ma Bibil, akat kutuzengol mu jindondj jimwing. (Yohan 15:19, 20; 2 Timote 3:12) Chilakej, guvernema wa Risi wayitekin Atuman avud mu jinkan, ni kuyimesh amwing mar nakash. Atambodin jindond jetu ja difukwil. Mulong wa kwijik jinsangu jivud, yang pa www.jw-russia.org.

Tal video wa aminit 4 ulondina anch Les Témoins de Jéhovah d’Irkoutsk restent fidèles malgré des perquisitions brutales mulong wa kuman mutapu uyizengodinau Atuman a Yehova mu Risi mulong wa ritiy rau.
Kudiosh pakur, Atuman a Yehova ayijing anch kakwiyandjikangap mu politik ap mwi njit. Tal video Fermes face à l’opposition mulong wa kuman mutapu walikau kwiyandjik mu politik ni mwi njit ap anch ayizengola nakash mu Allemagne nazie ni mu Union soviétique.

Yang amboku pa kapend ketu mulong wa kwijik yom yivud piur pa yitiyij yetu, ni yom yikaninay Bibil anch mu machuku ma kurutu kukwikalap njit. (Isay 2:4; Jeremiy 29:11) Kangal widjidjek amboku kutufundin mulong wa kwijik yom yivud.

Photo credits, kudiokal ku chikas cha kamaku kuya ku chikas cha katatuku: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mu UCCRO (Ditenchik dia ma Egliz ma mu Ikren) mud antu a marelijon 15 amekeshina Egliz Ortodoks, Katolik wa Grek, Katolik wa Rom, Protestant, ma egliz évangélique, ni antimesh a in Yuda ni a Mizilma.