Taninamu mu Chakupesh cha Yesu

Kapamp kamwing pa muvu, Atuman a Yehova pamwing ni mamiliyon ma antu adia pa mangand mawonsu akat kukumangan ku Chivurikish cha rufu ra Yesu, mud mwalonday. (Luka 22:19) Chinship chinech chikutukwash kwijik usey wa yom yasalay Yesu papanay mwom wend mulong wa antu. Chikutulej kand, mutapu chakupesh chend chikweta usu mu mwom wetu wa katat ni wa mu machuku ma kurutu.​—Yohan 3:16.

Anch ukukumangan ku Chivurikish cha muvu ou ap bwat, mutapu ik ukutwisha kutaninamu mu yakupesh ya rufu ra Yesu? Yesu wafundisha anch tufanyidin kusal yom yaad ey ya usey:

1. 1. Kwilej piur pa Nzamb ni Yesu. Pamulembilay Tatukwend wa mwiur, Yesu walonda anch: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.”​—Yohan 17:3.

2. 2. Kusadin yom wilejina. Yesu wakasikeshina pa usey wa kusadin yom twilejina mu mwom wetu. Chilakej, mu Mafundishin mend ma pa Mukandu wayilej antu ‘ading a muteshina anch afanyina kusadin yom yateshau.’ (Luka 6:46-48) Yisu yimwing walond kand anch: “Katat en wijany yom yiney, chawiy wayukany anch wez wayisalany!”​—Yohan 13:17.

Ov, ukukat kwilej yom yivud piur pa Nzamb ni Yesu? Ov, ukatin kusadin chiyul piur pa mutapu ukutwisha kusadin yom ukwileja? Pinap pad yom yimwing yikutwisha kukukwash kusal mwamu.

Kwilej Bibil

Kwilej Bibil pakad kufut nfalang kwayikwashin kal antu avud kwijik yom yilondinay Bibil ni mutapu wa kuyisadin mu mwom wau.

• Yang pa Internet pafundinau anch Ileja Bibil Pamwing ni Muntu Mukwau chakwel utana yom yivud piur pa mutapu wa kwilej.

• Tal video Wezaku ku Dilejan Diey dia Bibil chakwel usangera kwilej Bibil pamwing ni Atuman a Yehova.

Yikumangan ya Atuman a Yehova

Atuman a Yehova akat kukumangan tupamp twaad pa rubing pa ndond ya difukwil yitazukinau anch Chot cha Want. Ku yikumangan yiney, tukat kwisambinang piur pa Bibil ni mutapu tukutwisha kusadin yom twilejina mu mwom wetu.

Yikumangan yiney yidiaku mulong wa antu awonsu; yidiap anch ching Kaman ndiy ufanyidina kukumangan. Kukwatijan ni kwi ndond udia, ukutwish kukumangan mes ni mes ap kand kusutin videokonferens.

• Tal video Ov, Yom ik Yisadikininga ku Chot cha Want? chakwel wijika kurutu yom yisadikininga ku yikumangan yiney.

• Kimb chikumangan chidia piswimp ney kusutil kushinshikin paj ulejena Yikumangen ya Atuman a Yehova.

Tal mitu ya milong ni mavideo yidia pa internet

Mitu ya milong ni mavideo yidia pa internet yikutwish kukukwash wileja yom yivud piur pa mafundish ma Yesu ni usu ukweta chakupesh cha rufu rend.

Chilakej, chakwel wijika mutapu ukutwisha mamiliyon ma antu kutaninamu kusutil rufu ra muntu umwing, tal mutu wa mulong “Yesu Ukat Kupandishan—Mutapu ik?” ni “Mulong wak Yesu Wamana Mar ni Wafa?” ap tal video Mulong Wak Yesu Wafa?