Divumbuk Chom ik?

Chakul cha Bibil

Mu Bibil, dizu dikarumwinau anch “divumbuk,” didiokil ku dizu dia Grek a·naʹsta·sis, dirumburikina anch “kulank” ap “kwiman kand.” Muntu uvumbwilau ukat kulank kudiokal ku rufu ni kwikal kand mwom mud mutapu wadingay kurutu afa.—1 Korint 15:12, 13.

Ap anch dizu “divumbuk” didiap mu Mifund ya Hebereu, yitazukinau kand anch Manswik Makur, pakwez mafundish ma divumbuk madiamu. Chilakej, kusutil muprofet Ozey, Nzamb washilamu anch: “[Ni]kuyidiosh mwi nond ya afu. . . nikuyikamunin ku usu wa rufu.”​—Ozey 13:14; Job 14:13-15; Isay 26:19; Daniel 12:2, 13.

Antu akuyivumbwil kwisu? Antu amwing akat kuyivumbul mulong wa kuya mwiur chakwel ayikela mud ant pamwing ni Kristu. (2 Korint 5:1; Kujingunik 5:9, 10) Bibil utazukin divumbuk dined anch “kuvumbuk kwa kapamp ka kusambish” ni ‘divumbuk diakusambish,’ mazu minam maad mamekeshin anch kukwikal divumbuk dikwau dikwambakena. (Kujingunik 20:6; Filip 3:11) Divumbuk dikwau dined did mulong wa kushakam pa divu, antu avud nakash akuyivumbul mu divumbuk dined.​—Kuseng 37:29.

Antu akuyivumbul mutapu ik? Nzamb wamwinkishin kal Yesu usu wa kuyivumbul afu. (Yohan 11:25) Yesu ukuyivumbul “afu awonsu adia mwi nzay” kwikal kand aom, muntu ni muntu ukuvumbuk ni chifu chend, wuntu wend, mikadil yend ni manangu mend. (Yohan 5:28, 29) Antu akuvumbulau mulong wa kuya mwiur akuyinkish mujimbu wa mu spiritu, pakwez akuvumbulau mulong wa kushakam panap pansh akwikal ni mujimbu wa mbij ni akwikal ni ukash wa mujimbu uwanyidina.​—Isay 33:24; 35:5, 6; 1 Korint 15:42-44, 50.

Nany ukuvumbulau? Bibil ulondin anch “antu atentamina ni antu akad kutentam akez kavumbuk kwikal kand aom.” (Midimu 24:15) Antu atentamina ad amakundj ni amband ading amushinshamedina Nzamb, mud Nowa, Sara, ni Aburaham. (Disambishil 6:9; Hebereu 11:11; Jakobu 2:21) Antu akad kutentam ad antu akanganya kulimish mbil ja Nzamb mulong kikalap ni mutapu wa kwilej piur pa mbil jinej ni kujisadin.

Pakwez antu iyandjikina nakash mu kusal uyimp ni alikina kuswimp kakuvumbukap. Anch afa, akat kufa kamu chikupu mulong kakwetap ruchingej ra kuvumbuk.​—Mateu 23:33; Hebereu 10:26, 27.

Divumbuk dikusadik chisu ik? Bibil wasambela kulejan anch divumbuk dia antu ayila mwiur diafanyina kusambish pa chisu cha kwikalaku kwa Kristu, chisu chinech chasambisha mu muvu wa 1914. (1 Korint 15:21-23) Divumbuk dia antu akushakama panap pa divu dikusambish pa chisu cha Winyikel wa Mivu Kanan wa Yesu Kristu, pa chisu chinicha, divu diawonsu akudikarumun kwikal paradis.—Luka 23:43; Kujingunik 20:6, 12, 13.

Mulong wak choviken kwitiyij mu divumbuk? Bibil ulejen jinsangu ja antu chinan avumbulau, ni kwading antu avud imenap yom yiney. (1 Ant 17:17-24; 2 Ant 4:32-37; 13:20, 21; Luka 7:11-17; 8:40-56; Yohan 11:38-44; Midimu 9:36-42; Midimu 20:7-12; 1 Korint 15:3-6) Divumbuk dia Lazar wavumbulau kud Yesu dishimokishen nakash, mulong wading wafang kal kwasutang kal machuku manying, ni Yesu wasala chilay chinech kurutu kwa antu avud. (Yohan 11:39, 42) Ap akankuny a Yesu katwishap kutadik uyakin winou, chawiy akwata mpung mulong wa kumujip Yesu ni Lazar win​.—Yohan 11:47, 53; 12:​9-​11.

Bibil umekeshin anch Nzamb ukwet usu ni maswir ma kuyivumbul afu. Ulamin nawamp mu manangu mend makad musul jinsangu jawonsu ja muntu ni muntu ukuvumbulay kusutil usu wend wakad mimbu. (Job 37:23; Mateu 10:30; Luka 20:37, 38) Nzamb ukutwish kuyivumbul afu, ni usotin kusal mwamu! Pisambidinay piur pa divumbuk diezina kurutu oku, Bibil ulondin piur pa Nzamb anch: “Ukez kaswir kwinman kand, yam kamu mudimu wa makas mey.”​—Job 14:15.

Yitongijok ya makasu piur pa divumbuk

Makasu: Divumbuk kud kubombakesh kand mupim ni mujimbu.

Win yakin: Bibil ufundishin anch mupim ndiy muntu win wakabuj, kadiap chikunku kampand chikata kudandamen kwikal mwom anch muntu wafa. (Disambishil 2:7; Ezekiel 18:4) Anch muntu amuvumbul kakatap kubombakan ni mupim wend, akat kumutang kand kapamp kakwau mud mupim ukweta mwom.

Makasu: Antu amwing akat kuyivumbul ni kupwa akat kuyishesh kand kapamp kamwing.

Win yakin: Bibil ulondin anch “antu awonsu asala nayimp” akez ‘kayivumbul mulong wa kuyirumburish.’ (Yohan 5:29) Pakwez dirumburish dined dikwimen pa yom yikusalau kupwa kwa kuyivumbul, kadiap pa yom yasalau pakur. Yesu walonda anch: “Chisu chikez kez, . . . chikez kovau afu dizu diendendiy Mwan a Nzamb, chad awonsu akeza katesh mazu mend ni kumaziyil, akez kikal aom.” (Yohan 5:25) Antu ‘akuziyila’ ku yom yikuyilejau kupwa kwa kuyivumbul akufund majin mau mu “mukand wa mwom.”​—Kujingunik 20:12, 13.

Makasu: Muntu ukat kuvumbuk ni mujimbu mud wadingay kamu nich kurutu afa.

Win yakin: Anch muntu wafa, mujimbu wend ukat kuvund.—Mulej 3:​19, 20.