Nsand umwing ukat kutal antu ayila ku Chot cha Want

YIPUL YIKATAU ANSAND KWIYIPUL

Ov, Chid Kamu cha Usey Kukumangan Ku Chot cha Want?

Tupamp twaad pa rubing, Atuman a Yehova akat kukumangan ku jindond jau ja difukwil jitazukinau anch Yot ya Want. Yom ik yikata kusadikang kwinakwa ni mutapu ik ukutwisha kutaninamu anch wez kukumangan?

Yom ik yikata kusadikang ku Chot cha Want?

Chot cha Want yid ndond ya kwilejin malejan mawamp mimedina pa Bibil. Yikumangan yikata kusadik ku Chot cha Want yikutwish kukukwash:

kwilej uyakin piur pa Nzamb.
kwov kurumburik kwa yom yisadikina katat mu mangand.
kwikal muntu muwamp.
kwikal nau arund awamp.

Ov, wij? Ndond yikatau Atuman a Yehova kusadin yikumangan ayitazukin anch Chot cha Want mulong akat kwisambinamu nakash piur pa Want wa Nzamb.—Mateu 6:9, 10; 24:14; Luka 4:43.

Mulong wak ufanyidin kwez kukumangan?

Yom ukutesha yikukukwash. Mbil ja Bibil jikatau kwisambin ku yikumangan ya Atuman a Yehova jikukukwash kwikal ni “manangu.” (Jinswir 4:5) Chinech chirumburikin anch Bibil ukutwish kukukwash kukwat mipak yiwamp mu mwom wey. Ukutwish kand kukukwash kwakul ku yipul yijim, mud:

Ey yawiy mitu ya milong yimwing ya madiskur makatau kusal ku yikumangan yetu ya kwinsudiel kwa rubing:

Mulong wak Bibil Ufanyidin Kututakel?
Kwisu Tukutwisha Kutan Ukwash mu Yisu ya Mar?
Yom Yitusadidinau Kud Want wa Nzamb.

“Murund nam umwing wa ku shikol weza ku yikumangan yetu. Washakama pamwing ni dijuku diam ni twamwinkisha mabuku mulong wa kulondul nawamp yikumangan. Kupwa wanleja anch wasangera nakash yakul ya antu mu yikunku ya antu kwakul. Wanleja kand anch mu egliz wau antu kakwetap kwau mikand ya kwilej nich mud etu.”—Brenda.

Ov, wij? Kwandam ku Chot cha Want kud kwamwamu ni kakufutishangap nfalang ap kusal musang.

Antu akwau in kukumangan akukukasikesh. Bibil ulondin anch in Kristu afanyidin kukumangan mulong wa “kukasikeshijan muntu ni mukwau.” (Hebereu 10:24, 25) Chid chiwamp nakash kutanijan nau antu amutekina Nzamb ni antu akwau pa ndond ya kusambish kusutamu ayinau mu mangand minam mudia antu avud itongidina nakash ayinau.

“Kupwa kwa kusutish dichuku dilemp, yisu yimwing nikat kwov ushon ni kuziy nakash, pakwez antu nikata kutanijan nau ku Chot cha Want akat kwingovish nawamp. Pinikata kuchirik kwol kwam kupwa kwa yikumangan, nikweting musangar ni nikweting usu wa kusambish kand dichuku dikwau.”—Elisa.

Ov, wij? Kud yikumangen 120 000 ni kusut ya Atuman a Yehova pa mangand mawonsu, ni akat kukumangen mu jindond 60 000 ni kusut. Muvu ni muvu, tukat kutung Yot ya Want piswimp 1 500 mulong wa kuwanyish maswir ma in kukumangan.a

Yom yitonginau akwen

“Pinading ku shikol yijim, changadim umwing wa mu kalas ketu weza kukumangan niyam ku yikumangan yetu, ni wasangera nakash pa kuman anch antu a mivu kushalijan akat kwilej Bibil pamwing. Machuku ma kwinyim, mukurump wam wa mudimu niyend wezin kukumangan ni washimwoka nakash pa kuman anch tukat kusadin Bibil yisu yawonsu. Pinamana mutapu wasangeray yikumangan, niyam nayisangera kand nakash!”—Jessica.

“Namen kal anch yikumangan yikat kwinginkishang usu wa kujijamen yakamish ni yikokujol ya dichuku diawonsu. Tukat kwilej mutapu wa kwikal ni mwom usangareshina, mutapu wa kwikal antu awamp ni yom yivud kand. Nikat kwiyovang nawamp, ni nikweting usu pinikata kudiokal ku Chot cha Want.”—Timothy.

“Ikundj umwing natazuka ku yikumangan walonda kupwa kwa kukumangan anch: ‘Nezang kwam kukumangan mulong wa kuman mayingishin ma kumekesh nich anch yitiyij yen yid ya makasu. Pakwez naman kal anch yamam yawiy yidia ya makasu!’ Washimwoka kand piur pa mutapu wamwakau kud Atuman a Yehova. Walonda anch: ‘Ap anch nading kand kal nimanijanangap niyenen, pakwez wansadinanya yom mud wading wangijikinany kal kudiosh pakur!’”—Jacob.

“Kud yisu yimwing natonga anch: ‘Nikubudik kamu kapamp kamwing anch yikumangan yapwa kwau.’ Pakwez pa chisu cha yikumangan, yovil yiney yapwa. Kupwa kwa yikumangan, nikat kwambamb nau antu avud ni nikatap kand kuvurik mulong wak nading nisotin kubudik kamu kapamp kamwing. Nafanyinap kwikal nau arund awamp mwamu anch nalikang kuya ku yikumangan.”—Madison.

a Mulong wa kuman ndond ya kukumangen, yang pa paj pafundinau anch “Yikumangan ya Chikumangen ya Atuman a Yehova” ni shat pafundinau anch “Kimb Ndond Yidia Piswimp Ney.”