Mutapu Wabudishinau Mavideo ma Chitentam cha Rejon cha Muvu wa 2020 “Sangarany Machuku Mawonsu”!

Mavideo ma chitentam cha rejon makat kupukun michim yetu ni kutukwash kutesh nawamp mafundish ma Bibil. Chitentam cha Rejon cha muvu wa 2020 “Sangarany Machuku Mawonsu”! chading chikwet mavideo 114, kuwejaku ni madiskur 43 masadinau kud akadivar adia mu Chisak Chitakedila ni ankwash au. Ov, wiyipwilap kal piur pa usu ni nfalang jitina mulong wa kubudish mavideo minam?

Akadivar nau anambaz piswimp 900 a pa mangand mawonsu apana chisu chau ni ukaliweny wau mulong wa kukwash kubudish program winou. Mulong wa kupwish mudimu winou, asala asaa 100⁠000 ni kusut mu chirung cha mivu yaad. Chinech chading kand chitin kuwejinaku asaa 70⁠000 asutishau mulong wa kupwish filim wa aminit 76 ukweta mutu wa mulong anch Nehemiy: ‘Musangar wa Yehova Wawiy Usu wen.’

Mudi mutapu ukutwisha kutongin, chading chitin nfalang jivud mulong wa kuyidish in kwipan, pamwing ni kuyinkish yom ya kusal nich mudimu, ndond ya kulal ni in kuyikwash nich yom ya tekinoloji.

Mukadivar Jared Gossman, usadina ku Mudimu wa Mavideo ulondin anch: “Komite wa Malejan wa Chisak Chitakedila usangaredin nakash kutek antu a yaku ni a jingand kushalijan mu mavideo metu. Mutapu winou wa kusal umekeshin anch ukadivar wetu udi wa pa mangand mawonsu. Mulong wa kusal yom yiney, yisak 24 yidia mu jingand 11 yikat kusal pamwing mulong wa kuwanyish mudimu winou. Usu mud winou usadinau kud antu adia pa mangand mawonsu witin nfalang jivud, kutenchik ni kuutakel nawamp.”

Mulong wa kubudish mavideo metu mamwing, chitin kwikal ni yom ya kusal nich mudimu ni ya kuwapish nich ya pakampwil. Chilakej, mulong wa kusal filim piur pa Nehemiy, akadivar arijeka mukach mwa stidio wa Mount Ebo udia piswimp ni Patterson, mu New York. Akadivar asala usu chakwel filim ikala wakin kukwatijan ni yom ya pakur, ni asala kand usu wa kusadin yipan nawamp, chawiy asadina yom yikemp mulong wa kutung rubumbu ra musumb wa Yerusalem. Atunga rubumbu riner mu kusadin mbau ja ametre 6 pa kulep, ni alamikaku mousse mulong wa kuwapish nich chakwel jimekana mudi mayal. “Mbumbu” jinej jading jiswapel kujishemunin mulong wa kujitwal ku jindond jikwau ja kusadin masengan, chinech chakwasha kukepish yom yivud ya kuwapish nich. Ap mwamu, filim winou witang kusadin piswimp madolar 100⁠000 mulong wa kuland nich yom ya kupent ni ya kuwapish nich.a

Kwijik jinsangu jinej jawonsu kutukwaswin kwikal in kujikitish nakash mulong wa program wa chitentam cha rejon cha muvu winou. Tukwet kashinsh anch usu win wawonsu wasadinau mulong wa kubudish program winou ukuyibachik antu a pa mangand mawonsu kumutumbish Yehova. Tukujikitishany nakash mulong wa yipan yen yiukata kupanany mulong wa mudimu wa pa mangand mawonsu pa donate.jw.org ni kusutil mitapu yikwau.