Amishoner “Djat ni ku Jindond ja Kulemp Nakash pa Divu”

Yesu wayileja in kwilejend anch: “Ukwikalany atuman am . . . djat ni ku jindond ja kulemp nakash pa divu.” (Midimu 1:8) Nlel unou, Atuman a Yehova akat kuwanyish nich mushiku mudimu winou. Pakwez kud jindond jimwing pa mangand, kuwejaku ni jindond mudia antu avud nakash, kand kal alejanamu kud Atuman. Chikwau kand, mu jingand jimwing mud kwau Atuman akemp. (Mateu 9:37, 38) Yom ik tukata kusal mulong wa kulejan kud antu avud nakash?

Mulong wa kuziyin kwi mbil ya Yesu, Komite wa Mudimu wa Chisak Chitakedila cha Atuman a Yehova ukat kuyitum amishoner ku jindond kudia maswir pa mangand mawonsu. Kushik katat, kud amishoner 3 090 alejena ku jindond kushalijan pa mangand mawonsu.a Avud pakach pau atambwil kufumb ku mashikol ma Bibil, mud Shikol ya in Kulejan a Want. Amishoner inay akat kwipan kamu mu kudiokal kwol kwau ni kuya ngand yindj. Kusutil kukul kwau kwa mu spiritu, kufumb kwau ni ukaliweny wau, amishoner inay ashinshamena akat kukwash kupalangesh rusangu ruwamp ni akat kuyishil in kwilej asu chilakej chiwamp.

Kuyikwash Amishoner Chakwel Niyau Ayikwasha Antu Akwau

Ku biro wa mutiy mwawonsu, kud biro umwing utadina mudimu wa atushalapol adia mu chingand (Departema wa Mudimu) ukat kusal pamwing mu kwovijan ni Komite wa Mutiy mulong wa kubangin maswir ma amishoner, mud milong yitadina nfalang ja kwend nich ni ja kwiyokish nich, ni karufalang kakemp mwamu mulong wa kuwanyish maswir ma dichuku diawonsu. Mu muvu wa mudimu wa 2020, Atuman a Yehova asadidin mamillion 27 ma adolar mulong wa kuyikwash nich amishoner. Kusutil ukwash winou, amishoner akutwish kwipan nich mushiku mu mudimu wa kulejan, kuwejaku kukasikesh yikumangen mudiau.

Yibudikin ik yaletinau amishoner adia mu chingand pa mudimu wa kulejan? Frank Madsen, usadina mu Komite wa Mutiy wa Malawi, ulondin anch: “Kusutil mushiku ni ukaliweny wau, amishoner akwashin yikumangen yivud kulejan mu ma teritwar makash, mudia yikumbu yikinginau nakash ni kwi ndond kulondinau mazu mindj. Chikwau kand, usu usadinau nakash mulong wa kwilej dizu dindj ni kwijidin yaku yikwau ukat kuyishil antu akwau chilakej chiwamp nakash, ni akwet chibachikin chiwamp nakash pad ansand akweta ntong ja kusal mudimu wa chisu chawonsu. Tumujikitishin Yehova nakash mulong wa amishoner adia mu chingand.”

Mukadivar umwing udia mu Komite wa Mutiy wa ngand yikwau ulondin niyend anch: “Amishoner ad kamu yilakej yiwamp yimekeshina anch antu a Yehova ad mu uumwing pa mangand mawonsu. Ap antu akad kwikal Atuman akat kuman kamu anch twaurikinap mulong wa yinshakur, pakwez mafundish ma Bibil matukwashin kal kwikal mu uumwing.”

Mutapu ik ukatau amishoner kuyikwash in kulejan a mu chikumangen? Paulo, wa mu Timor oriental, ukwet musangar nakash mulong mu chikumangen chau mud ambay a uruw adia amishoner. Ulondin anch: “Ndond tushicha kuding marungul nakash kamu. Pakwez ap anch amishoner inay adiokala kwi ndond kuding mashik, kalikap anch yom yiney yiyikangesha kulejan. Ukuyitan chisu chawonsu pamanch ku chikumangan cha mudimu wa kulejan. Nikat kuyimanang akat kuya kuyichirikin antu chisu cha muten, chisu kudia marungul nakash ni urel kand. Ayikwashin kal antu avud nakash kwilej uyakin, kuwejaku niyam win. Nich mushiku ni musangar, akat kusadin mwom wau wawonsu mulong wa kumusadin Yehova, ni chinech chikat kukasikesh chikumangen chawonsu kumusadin Yehova chipandakena nakash.”

Ketti, nambaz udia chibol wa rawonsu mu Malawi, ulejen piur pa mutapu wayikwashau kud ambay a uruw amishoner. Urumburil anch: “Chisu chayiletau ambay a uruw amishoner mu chikumangen chetu, nading kwam amwinam mud Kaman mu dijuku dietu. Pakwez amishoner inay ankwasha nakash ni ikala kamu piswimp ni dijuku diam. Chilakej chau chiwamp chayikwasha anam kuman anch kumusadin Yehova kwawiy kukata kulet mwom uwamp ni wa musangar. Kusutil chilakej chiwamp cha amishoner, anam amband asatu ad katat ayibol a rawonsu ni nfumwam wasambishin kukumangan ku yikumangan.”

Kwisu kukata kudiokal nfalang jikatau kuyikwash nich amishoner? Jikat kudiokal ku yipan ya pa mangand mawonsu, yivud akat kuyipan kusutil donate.jw.org. Tukat kusanger nakash yipan ya kwikatin mud yiney.