Yehova Ukukatin Nakash!

1. Yom ik yikatay kushinshikin Yehova mud antu end?

YEHOVA NZAMB ukat kwov “musangar mu antwend.” (Kus. 149:4) Mazu minam matwovishin musangar nakash! Yehova ukat kushinshikin mikadil yiwamp tukweta; umen mutapu tukutwisha kwikal mu machuku ma kurutu ni ukat kutukwash chakwel twikal arund nend. Anch twashal ashinshamena kud ndiy, niyend ukwikal netu piswimp chikupu!​—Yoh. 6:44.

2. Mulong wak chiyikasikedining antu amwing kwitiyij anch Yehova uyikatin?

² Antu amwing akutwish kulond anch: ‘Nij anch Yehova uyikatin antu end mud chisak, pakwez mutapu ik nikutwisha kwikal nich kashinsh anch winkatin amwinam pakampwil?’ Yom ik yikutwisha kumushikij muntu ku kwiyipul chipul chinech? Oksanab wapamina mu mar nakash ulondin anch: “Nasangara nakash chisu chambatishau ni chisu nasambisha uchibol. Pakwez, kupwa kwa mivu 15, nasambisha kuvurik yom yiyimp yanshikena panading mwanikanch. Nasambisha kutong anch nikwetap kwam dilau dia Yehova ni niwanyidinap kwam kwinkat kud ndiy.” Yua, nambaz udia chibol warisha niyend ni milong yivud padingay mwanikanch ulondin anch: “Napana mwom wam kud Yehova mulong nading nikatin kumusangaresh. Pakwez, nading nich kashinsh anch kakutwishap kwinkat ap pakemp.”

3. Yom ik tukwileja mu mutu wa mulong winou?

³ Mud mutapu chading piur pa anambaz ashinshamena twajimbula kal kwiur oku, niyey umukatin nakash Yehova, pakwez pamwing ap widjidjekin anch niyend ukukatin. Mulong wak chid cha usey kwikal nich kashinsh anch Yehova ukukatin? Ni yom ik yikutwisha kukukwash anch wasambish kutong anch Yehova kakukatinap? El tushinshikinany yakul ya yipul yiney.

CHID CHA UBAJ KWIDJIDJEK ANCH YEHOVA UTUKATIN

4. Mulong wak chid cha ubaj kwidjidjek anch Yehova utukatin?

⁴ Muntu ukutwish kwikal ni usu nakash anch wikal nich kashinsh anch amukatin. Anch tukwet kashinsh anch Yehova utukatin ni utukwashin, tukwikal ni usu wa kumusadin nich muchim wetu wawonsu chikalap nchik yikokujol turishina nich. Ku mutambu ukwau, anch twidjidjek anch Yehova utukatin, ‘usu wetu ukukep.’ (Jnsw. 24:10) Anch twaziy ni twalik kwitiyij anch Nzamb utukatin, tukutwishap kujijaman anch Satan waturishikish.​—Efes 6:16.

5. Kwidjidjek anch Nzamb utukatin kwikala ni yibudikin ik pad antu amwing?

⁵ In Kristu amwing ashinshamena a mu chirung chetu aziya mulong ading idjidjekin anch Yehova uyikatin. James udia mukurump wa chikumangen ulondin anch: “Ap anch nading nisadidin ku Betel ni nading nilejen pamwing ni chikumangen cha dizu dia wingendj, nadingap nikweta kashinsh anch Yehova wading kamu witiyin yom nading nimusadidina. Chisu chimwing nasambisha ni kwiyipul anch Yehova uteshining kamu malembil mam.” Eva, udia niyend mu mudimu wa chisu chawonsu ulondin anch: “Namen kal anch chid cha ubaj kutong anch Yehova katukatinap, mulong kutong mwamu kukutwish kwikal ni usu pa yom yawonsu tusadina mu mudimu wend. Impu ya kumusadin Yehova yikutwish kukep, ni tukutwish kushadish musangar mu mudimu wend.” Michael, udia chibol wa rawonsu ni mukurump wa chikumangen ulondin anch: “Anch wasambish kutong anch Nzamb kakukatinap, ukutwish kupumbuk.”

6. Yom ik tufanyidina kusal anch twasambish kutong anch Nzamb katukatinap?

⁶ Yilakej twamana kal ey yimekeshin mutapu ritiy retu rikutwisha kwikal mu ubaj anch twasambish kutong anch Yehova katukatinap. Chad, yom ik tufanyidina kusal anch twasambish kutong anch Nzamb katukatinap? Tufanyidin kapamp kamwing kudjibul kulemp yitongijok yiney! Mwita Yehova chakwel akukwash kuswinkesh yitongijok yiney yiyimp nich ‘chisambu cha Nzamb chikulama muchim wey ni manangu mey.’ (Fil. 4:6, 7) Ijik anch kud akadivar ni anambaz akwau ashinshamena arishina ni yitongijok ya mutapu winou. Ap atushalapol a Yehova a pasak arisha niyau ni yitongijok ya mutapu winou. Tushinshikinany yom tukutwisha kwilejin ku chilakej cha kambuy Paul.

YOM TWILEJIDINA KU CHILAKEJ CHA KAMBUY PAUL

7. Yikokujol ik yarishay nich kambuy Paul?

⁷ Ov, yisu yimwing ukat kwiyov anch ukwet yisend yivud nakash ni chikukasikedin kuyiwanyish yawonsu? Anch mwawiy, ukutwish kwijik mutapu wiyovay Paul. Wiyakamisha kadiap kusu mulong wa chikumangen chimwing, pakwez “mulong wa [yikumangen] yawonsu.” (2 Kor. 11:23-28) Ov, urishin ni mayej makash makushadishidina musangar wey? Paul wading urishin ni “rubwambu . . . mu mujimbu,” rading rimumeshina mar chisu chawonsu, pamwing ap mading mayej, ni wading ukatin anch amudioshar. (2 Kor. 12:7-10) Ov, yisu yimwing ukat kuziy mulong wa kuburen kuwanyin kwey? Mwawiy mwiyovay niyend Paul yisu yimwing. Wiyela amwinend anch “ntany,” mulong warishang chisu chawonsu nich kuburen kuwanyin kwend.​—Rom 7:21-24, TMK.

8. Yom ik yamukwasha Paul kujijaman chikalap nchik milong yend?

⁸ Paul wadandamena kumusadin Yehova chikalap nchik milong yiney yarishay nich. Yom ik yamwinkisha usu chakwel atwish kusal mwamu? Ap anch wading wij nawamp kuburen kuwanyin kwend kwading kurishinay nich, wading ni ritiy rikash mu difut. Wading wij nawamp kushilamu kwa Yesu kulondina anch “muntu mwawonsu ukumwitiyija [Yesu] . . . ukez kikal nich mwom wa chikupu.” (Yoh. 3:16; Rom 6:23) Paul wading pakach pa antu ading itiyijina mu difut. Wading nich kashinsh anch Yehova ukatining kuyilikishin ap antu akata kusal yitil yikash, anch akarumuk.​—Kus. 86:5.

9. Yom ik twilejidina ku mazu ma Paul madia mu Galatia 2:20?

⁹ Paul wading kand ni ritiy anch Nzamb umukatin nakash mulong wamutuma Yesu kufa mulong wendendiy. (Tang Galatia 2:20.) Kwinsudien kwa verse winou kud mazu mamekeshina kashinsh kadingay nich Paul. Walonda anch: “Mwan a Nzamb . . . wankata am, chad wapana mwom wend mulong wa kwingambat am.” Paul katongap anch ud muntu muyimp nakash mu chilik cha kulik kumukat kud Nzamb, katongap anch ‘Yehova ukutwish kuyikat akadivar nam, pakwez kakutwishap kwinkat am.’ Paul wayivurisha in Rom anch: “Pitwading etu akayitil Kristu watufila!” (Rom 5:8) Kwikil chom chikutwisha kumukangesh Nzamb kutukat!

10. Yom ik twilejina mu mukand wa Rom 8:38, 39?

¹⁰ Tang Rom 8:38, 39. Paul wading nich kashinsh kawonsu anch Nzamb utukatin nakash. Wafunda anch kwikil chom “chikutwisha kutwauril etu ku rukat ra Nzamb.” Paul wading wij mutapu Nzamb wayishimpishinay in Isarel muchim. Wading kand wij mutapu wamwovilau niyend riy kud Yehova. Tukutwish kwiswipish yitongijok ya Paul mutapu ou: ‘Mulong Yehova wamutuma Mwanend kufa mulong wamam, kinikwetap diyingishin ap dimwing dia kwidjidjek anch winkatin.’​—Rom 8:32.

11. Ap anch Paul wasala yitil mud yilejenau mu 1 Timote 1:12-15, mulong wak wading nich kashinsh anch Nzamb umukatin?

¹¹ Tang 1 Timote 1:12-15. Chimeken anch Paul wiyovang nayimp nakash anch wavurik yom yiyimp yasalay pasak. Chawiy, chishimokishenap pa kuman anch wiyela amwinend anch ud mukayitil “muyimp kupandakanamu awonsu”! Kurutu kwa kwilej uyakin, Paul waya mu misumb kushalijan kuyikimb in Kristu mulong wa kuyizengol, amwing wayiteka mu rukan, ni akwau witiya anch ayijip. (Mid. 26:10, 11) Chakin kamu, Paul wiyovang nayimp nakash anch wamusankan nsand mwin Kristu ukweta anvaj ajipeshishay? Paul wanenganana nakash mulong wa kurumbuk kwasalay, pakwez wading wij anch kakutwishap kuswimp chom. Witiyija anch Kristu wafa mulong wendendiy, ni wafunda nich kashinsh kawonsu anch: “Mulong wa ranaken ra Nzamb am nidi mudi munidia.” (1 Kor. 15:3, 10) Dilejan ik tudioshinaku? Itiy anch Kristu wafa mulong weyey ni wakufungwila njil ya kwikal ni urund uwamp ni wa pakampwil ni Yehova. (Mid. 3:19) Yom ya usey yimenay Nzamb yid yom usadina katat ni yiukusala mu machuku ma kurutu, kadiap kurumbuk wasala pasak, ap anch chisu warumbuka wading wikadin kal Kaman ap bwat.​—Isay 1:18.

12. Mazu mafundinau mu 1 Yohan 3:19, 20 makutwish kutukwash mutapu ik anch twiyov anch tukwetap usey ap tuwanyidinap kutukat?

¹² Anch watongin mutapu wafay Yesu mulong wa kubwik yitil yey, ukutwish kulond anch, ‘Nimen mud niwanyidinap difut dined.’ Mulong wak ukutwisha kwiyov mwamu? Mulong muchim wetu wakad kuwanyin ukutwish kutudimb ni kutushikij ku kwiyov anch tukwetap usey ap tuwanyidinap kutukat. (Tang 1 Yohan 3:19, 20.) Anch twikal ni yitongijok ya mutapu winou, tufanyidin kuvurik anch “Nzamb udi mujim kupandakanamu michim yetu.” Ap anch twiyov anch Yehova katukatinap ni kakutulikishinap, Tatukwetu wa mwiur ukudandamen kutukat ni kutulikishin. Tufanyidin kusal usu wa kwitiyij anch Yehova utukatin. Mulong wa kutwish kusal mwamu, tufanyidin chisu chawonsu kwilej Dizu diend, kulembil chisu chawonsu, ni kukumangan pakad kujing ni atushalapol end ashinshamena. Mulong wak chid cha usey kusal mwamu?

MUTAPU UKUTWISHA KUTUKWASH KWILEJ BIBIL, KULEMBIL, NI ARUND ASHINSHAMENA

13. Kwilej Dizu dia Nzamb kukutwish kutukwash mutapu ik? (Tal kand mushet ulondina anch: “Mutapu Dizu dia Nzamb Dikata Kuyikwash.”)

¹³ Ileja Dizu dia Nzamb dichuku diawonsu, ni ukwijik chad nawamp mikadil yipandiken kuwap ya Yehova. Mwamu ukwov chad kurumburik anch komb ukukatin nakash. Kutongijokin nakash pa Dizu dia Nzamb dichuku diawonsu, kukutwish kukukwash kuman yom zwang, “kuyitenchik” mu manangu ni mu muchim wey. (2 Tim. 3:16) Kevin udia mukurump wa chikumangen wiyovang mud kakwetap usey ulondin anch: “Kutang ni kutongijokin pa Kuseng 103 kwankwasha kuchirish manangu ni kujingunin mutapu winmenau kamu kud Yehova.” Eva, twajimbulang kwiur oku ulondin anch: “Kwinsudiel kwa dichuku nikat kwitekin chisu cha kutongijokin pa yom yidia ya usey ku mes kwa Yehova. Kusal mwamu kukat kwinkwash kwikal ni chisambu ni kukat kukasikesh ritiy ram.”

14. Malembil makutwish kutukwash mutapu ik?

¹⁴ Lembil chisu chawonsu. (1 Tes. 5:17) Urund pakach pa antu aad ukat kukasikan nakash anch akat kwambamb chisu chawonsu ni kulejijan yom patok. Chid kand mutapu umwing piur pa urund wetu ni Yehova. Anch twamulej mutapu twilyovila, twamulej yitongijok yetu ni yakamish yetu kusutil malembil, tumekeshin anch tumuchingejidin ni twij anch utukatin. (Kus. 94:17-19; 1 Yoh. 5:14, 15) Yua, twajimbulang kwiur oku ulondin anch: “Pinikata kulembil nikat kusal usu wa kulik kwimen kwau pa kumulej Yehova yom yasadikang chisu cha muten. Nikat kumulej kamu mutapu niyovila ni yitongijok yam. Mu kusut kwa chisu, nashikena kumuman Yehova mud Tatuku uyikatina chakin kamu anend, kadiap mud mukurump wa mudimu utakedina chapu kanang.”​—Tal mushet ulondina anch: “Ov, Wamutangin Kal?”

15. Mutapu ik ukatay Yehova kumekesh anch utubangidin pakampwil?

¹⁵ Ikal piswimp ni arund ashinshamena; ad chipan chidiokila kud Yehova. (Jak. 1:17) Tatukwetu udia mwiur ukat kumekesh anch utubangidin pakampwil kusutil kutwinkish dijuku dia mu spiritu dia akadivar ni anambaz akata kutumekeshin “rukat machuku mawonsu.” (Jnsw. 17:17) Mu mukand wend wayifundinay in Kolosay, Paul wajimbulamu in Kristu amwing amukwasha, ni walonda piur pau anch akat “kwinkasikesh am nakash.” (Kol. 4:10, 11) Ap Yesu Kristu niyend waswirikena ukwash ni wayijikitisha nakash arund nend amukwasha, ikalap nchik angel ap antu.​—Luka 22:28, 43.

16. Mutapu ik ukutwishau arund ashinshamena kutukwash kumusejin Yehova?

¹⁶ Ov, ukat kukimb kamu ukwash wa arund ney ashinshamena adia mu chikumangen ni kwitiy ukwash winou? Kumulej murund uswila yakamish yetu kumekeshinap anch tuziyin; pakwez kukutwish kutuchidij. James twisambinang kwiur oku ulondin anch: “Kuta urund uwamp nau in Kristu aswila kwankwashin kal nakash. Anch yakamish yampandiken, arund inay akatish akat kwintesh nich kushimpish muchim ni akat kwinvurish anch ankatin. Pakatau kusal mwamu, nikat kujingunin anch Yehova winkatin ni wimbangidin.” Chid cha usey nakash anch tukudish urund wa piswimp ni akadivar ni anambaz netu ni tulam urund winou!

SHAL MU RUKAT RA YEHOVA

17-18. Tufanyidin kumutesh nany, ni mulong wak?

¹⁷ Satan ukatin anch tulik kudandamen kusal usu wa kusal yom yiwamp. Ukatin tutonga anch Yehova katukatinap kwetu, anch tuwanyidinap kwetu kutupandish. Pakwez, mud mutapu twamana kal, yitongijok yiney yid ya makasu.

¹⁸ Yehova ukukatin. Ukwet usey nakash ku mes kwend. Anch wamuziyin, ‘ukushal mu rukat rend’ chikupu mud Yesu. (Yoh. 15:10) Chawiy, kangal wamutesh Satan ap watesh muchim wey ukufishina nich. Pakwez, mutesha Yehova ukata kuman uwamp udia mu muntu ni muntu. Ikal nich kashinsh anch Yehova ukat kwov “musangar mu antwend,” pakad kukudioshaku ey!