“Mazu mawonsu ma Mukand wa Nzamb madiokila ku Spiritu wa Nzamb, makutwish kuyilej antu kuyibabesh ni kuyitenchik, ni kuyilej kwirijek mu kutentam, chakwel muntu wa Nzamb ukwikal uwanyidina mu kusal mudimu wawonsu uwamp.”—2 TIMOTE 3:16, 17.

MADI mazu ma usu mudi ik mafunday Paul piur pa usey ujim wa Bibil! Ndiy wading wisambidin chakin kamu piur pa chikunku cha Bibil chadingay nich pa chisu chinicha—mikand yikatau kutazuk antu avud anch Manswik Makur. Pakwez mazu minam misambidin kand mikand yawonsu 66 yidia mu Bibil, kuwejinaku yafundau mu mivu chitot ya kusambish ya C.C. kudi in kwilej ashinshamena a Yesu.

Ov, ukwatin Bibil ni usey nakash mudi mwasalay Paul? Ov, utongin anch in kufund Bibil adinga apepidilau chakin kamu nich spiritu wa Nzamb? In Kristu akusambish atonga mwamu. In Kristu akin itiyijin mwamu yisu yawonsu. Chilakej John Wycliffe mwimpel wa mu Angleterre wa mu chitot cha mivu cha dikum ni kanying, walonda anch Bibil udi “mudimu wimena dang wa uyakin.” Ndinguril The New Bible Dictionary, pisambinay mazu ma Paul majimbwilau kwinsambishil, ulejen anch “kupepidil kudi Nzamb, kumekeshin anch yawonsu yilondinay Bibil yidi yakin.”

OV YOM ik yasotay kambuy Paul kulond pafunday anch Bibil ‘udiokil ku [s]piritu wa Nzamb’? (2 Timote 3:16) Paul, pafunday mu rudim ra in Grek, wasadila dizu dirumburikin “kupepidil kudi Nzamb.” Pa chinech, Paul ulondin anch Nzamb wayitakela in kufund Bibil nich spiritu wend utumbila chakwel afunda yasotay kufund.