Takelany Mausu Men Nich Manangu
1. Ov, mutapu ik tusadidininga 1 Korint 9:26 mu mudimu wa kulejan?
1 Kambuy Paul wafunda anch: “Nikat kubambil mau mes kurutu, matadil kwisudiel. Nidi kand mudi mwin kubulan yinkany, kinikat kubulap chamubudil.” (1 Kor. 9:26) Paul wisambinanga pa mutapu ufanyidinay kudandamen kulondul yisakin yend chakwel amusadil Yehova nawamp. Pakwez, mazu mawamp minam amasadidining kand mu mudimu wa kulejan. Chawiy lel, tusotin kutakel “yinkany” yetu ap mausu metu nich manangu chakwel tuwanyish yom yipandakena kuwap. Ov, mu mutapu ik?
2. Ov, mutapu ik tukutwisha kumwimburij Paul ni in kulejan akwau a mu mivu chitot ya kusambish patutondininga chisu ni kwindond tufanyidina kulejan?
2 Kuya Kwindond Kudia Antu: Paul ni in kulejan akwau a mu mivu chitot ya kusambish ayanga kulejan kwindond kwadinga antu. (Mid. 5:42; 16:13; 17:17) Chawiy, anch antu avud a mu teritwar wetu ading ku yikumbu urel, chinech chikutwish kwikal chisu chipandakena kuwap cha kusal mudimu wa ku chikumbu ni chikumbu. Ov, ukusal nchik anch motak wa pol pen ap mashuw mezining nakash nakash pamanch ni kupwa kwa midi chisu chiyilingau antu ku mudimu ap chichirikiningau ku yikumbu? Ov, chikwikal nchik anch usadining mudimu wa kwisak mu teritwar wizwila nich antu? Kupan uman wa mu mikombil kukutwish kusong mabuj mapandakena kuvul nakash pa yisu mudi yiney.
3. Ov, mutapu ik tukutwisha kutakel mausu metu nich manangu chisu tusadininga mu teritwar wetu?
3 Kusal Mudimu mu Teritwar ni Manangu: Chifanyidin kand kutakel yinkany yetu ni manangu mu mutapu tusadininga mudimu mu teritwar wetu. Chilakej, pa ndond pa kutek chisak chijim cha in kulejan mu teritwar umwing, chikwit chisu chivud ni usu chakwel chirijek ni chisal mudimu, chawiy, chikutwish kwikal chiwamp nakash kwangan chisak. Chawiy chimwing kand, chisu tusadininga mudimu mu teritwar wa andim, tukez kumuwanyish teritwar winou pakad kulab ni tukez kwikal ni chisu chivud cha kulejan anch tutenchikinap in kulejan akemp kuya ku motak. Ov, tukutwish kutambul teritwar udia piswimp ni chikumbu chetu, chakwel tukepisha chisu tuswirikedina kuya mu weny?
4. Ov, chom ik chikeza kutukwash chakwel twikal “ayibind a antu” apandakena kuwap?
4 Yesu wayikadisha in kulejan “ayibind a antu.” (Mar. 1:17) Rutong ra chibind wa ansh ridiap kusu ra kuta mand mu mem bwat pakwez ridi ra kukwat ansh. Chawiy, ayibind awamp a ansh ayiling kwindond ni pa chisu chifanyidinau kutan ansh, ni asambishining kuta pakad kulab. Mwaning, atakedining mausu mau nich manangu. Tukutwish kusal chom chimwing ni mushiku mu mudimu wetu wa kulejan.—Heb. 6:11.