Yikwashany Antu Chakwel Amutesha Nzamb
1. Ov, mabroshir ik mabudika ku Chitentam cha Distrikt chadinga ni mutu wa mulong ulondina anch “Want wa Nzamb Weza!” ni chom ik chiyisadina kwikal yom ya mudimu wa usey nakash?
1 Ku Chitentam cha Distrikt chadinga ni mutu wa mulong ulondina anch “Want wa Nzamb Weza!,” kwabudika mabroshir maad masu madinga ni mitu ya milong yilondina anch Mutesha Nzamb ni Ikal ni Mwom Chikupu ni wa mu rudim riswapela, ulondina anch Mutesha Nzamb. Mulong makwet mifund yikemp, akutwish kumakarumun swa ni mu mutapu uswapela. Chakin, Mutesha Nzamb ni Ikal ni Mwom Chikupu amwitiya chakwel amukarumuna mu jindim 431.
2. Ov, nany ukeza kutaninamu kusutil ku mabroshir minam?
2 Ov, anany akeza kutaninamu pakampwil mu mabroshir minan? Tushinshikidinany mikadil yilondwilaku ey yishikininga yisu yivud mu mangand:
• Mwin kulejan umwing wisamba ni mwin chikumbu, kapamp ka kusambish ka minsamb ap ka kumuchirikin, ndiy wajingunina anch mwin chikumbu wading wakad kwijik kutang nawamp.
• Mwin kulejan umwing uyilejin antu alondina rudim ritwakarumuna mikand yikemp ap yakad kukarumun. Ap antu avud mu teritwar katwishinap kutang rudim rilondiningau nawamp.
• Mwin kulejan umwing usadidin rudim ra yijingidij chakwel alejan kudi kajikamatu udia mu teritwar wend.
• Nvaj uswiridin kulejan uyakin kudi mwanend ikundj wakad kwijik nawamp mutapu wa kutang.
3. Ov, mutapu ik wafundau broshir Mutesha Nzamb?
3 Mutapu Wamafundau: Broshir Mutesha Nzamb ukwet mifund yikemp nakash—yisu yivud mufund uswapela ni maverse ma Bibil madia kwishin kwa paj ni paj makasikeshina manans majim. Ov, mulong wak? Tonginany bil anch muntu kanang wakwinkish broshir ufundinau mu rudim rakad kwij ey kutang, pamwing ap ni yom yidi yisu kudi ey. Ov, ukutwish kukusangaresh, ap anch ukwet yipich ya ufun? Bwat kwau. Chilik chimwing, antu akad kwijik kutang aswapeling kwov wom anch ayinkish verse wa kutang. Chawiy lel, kwijik nawamp paj ni paj ukwet yipich yifwatwilau nawamp nich chijingidij chimekeshina mutapu wa kutakel misamb pa chipich chimwing ni chipich chikwau chilondwilaku.
4. Ov, mutapu ik wafundau broshir Mutesha Nzamb ni Ikal ni Mwom Chikupu?
4 Broshir Mutesha Nzamb ni Ikal ni Mwom Chikupu ukwet yipich ya chilik chimwing kand ni broshir Mutesha Nzamb. Amufunda mulong wa kwilej ni antu akad kwijik kutang nawamp ap antu ilejina kutang. Broshir winou akutwish kand kumusadin mudi umutakel kudi mulej chisu chilejinay ni muntu kanang usadidina broshir Mutesha Nzamb. Kwiur ku mutambu wa kamaku kwa mapaj maad kudi chipul chakwilau pa mapaj minam maad. Kuwejinaku yipich yirumburilau ni mifund yijimbwilau. Kwishin kwa mapaj mavud kudi mushet wa kushingun ukweta manans makwau ni maverse ma Bibil makutwish kwisambin, kwambatan nich ukaliweny wa mwin kwilej.
5. Ov, chisu ik ni mutapu ik tukutwisha kupan mabroshir minam?
5 Mutapu wa Kumasadin: Ukutwish kupan broshir mwin mwawonsu mu mudimu wa kulejan wa ku chis ni chis piwiyovila anch chidi cha usey kusal mwamu, ap anch mabroshir madiap ma kupan pa ngond. (Tal mushit “Mutapu wa Kumapan.”) Ukutwishany kumasadilany pa chisu ukumuchirikinanya muntu wamekesha musangar ni kumulej mu wiswimp anch tukwet chom kanang cha kumulej ni tukumwinkish broshir.
6. Ov, mutapu ik tukeza kutakel dilejan dia Bibil pitusadidina mabroshir minam?
6 Mulong broshir Mutesha Nzamb kakwetap yipul, minsamb yikezap kwikal ya yikunku ya yipul ni yakul mudi usadining chisu chawonsu piukata kutakel dilejan nich buku Chifundishinay Bibil. Antu a michid yawonsu asangaredining kutesh jinsangu. Chawiy, sadilany yipich chakwel ulejanany jinsangu japepidilau anch ajifunda mu Bibil. Lejanany kurumburik kwa yipich yiney. Ikalany in musangar. Mwitany mwin kwilej alonda yom yimenay ni yitonginay. Tangany mifund yidia kwishin kwa paj, ni tongijokinany pamwing yom yisambidinau mu mabroshir minam. Mwipulany yipul chakwel wisambany nend ni kushinshikin anch uteshin yom umulejinanya. Anch usadidin broshir Mutesha Nzamb ni Ikal ni Mwom Chikupu, tangany pamwing mifund yambatena ni maverse chisu wisambidinanya pa chipich ni chipich.
7. Ov, mutapu ik tukutwisha kumukwash mwin kwilej Bibil chakwel aya kurutu?
7 Mukwashany Mwin Kwilej Kuya Kurutu: Ikalany nich ruchingej anch minsamb yen yikez kulangwish maku ma mwin kwilej chakwel ileja mutapu wa kutang mulong ndiy ukutwish kwikal ni ronganyin ra Yehova mu manangu mend. (Mat. 5:3; Yoh. 17:3) Anch minsamb yidi mu broshir Mutesha Nzamb, pamwing ap ufanyidinany kumulej mutapu wa kutang, kupwa ukutwishany kusadilany dilejan nich broshir Mutesha Nzamb ni Ikal ni Mwom Chikupu. Chikalap nchik broshir usadidinanya, mwin kwilej kakezap kwikal tayad chakwel ababatishau ap anch wapwishany kamu rawonsu broshir. Ufanyidinany kutakelany dilejan nich buku Chifundishinay Bibil ap mukand ukwau uwanyidina ukez kumuwejin ronganyin rikash ra mu Bibil.
8. Ov, mulong wak ujikitishinany piur pa yom yiney yisu ya mudimu tukutwisha kusadil mu mudimu wa kulejan?
8 Antu afanyidin kumutesh Mwant wa mangand anch asotin kwikal ni mwom wa chikupu. (Isay 55:3) Rusot ra Yehova ridi anch “antu awonsu apanda,” kuwejinaku antu akad kwijik kutang, akwilej mutapu wa kumutesh. (1 Tim. 2:3, 4) Kujikitish mud ik tukweta piur pa yom yiney yisu ya mudimu tukutwisha kusadil chakwel tuyifundisha antu mutapu wa kumutesh Nzamb!
[Kamushet kadia pa paj wa 3]
Mutapu wa Kumapan
Muleja mwin chikumbu mapaj 2-3, ni lond anch: “Ov, usotin kushakam mu mangand mamekeshinau mu mutapu winou? [Mulika akula.] Bibil ukanin [ap mukand winou utumbila ukanin] anch piswimp ap Nzamb ukez kusal mangand mikala ndond yiwamp, ya chisambu mukezap kwikal muntu ap umwing kazwendj ap muyej. Tal chom tufanyidina kusal chakwel tushakam mwindond yiney. [Tang Isay 55:3, ujimbwilau kwiur kwa paj wa 3.] Verse winou utulejin ‘tuya kudi’ Nzamb ni ‘tumutesha’. Ov, mutapu ik tukutwisha kumutesh Nzamb?” Buril pa paj wa 4-5 ni isamba nend pamwing chakul. Anch kakwetap chisu, mushila broshir ni irijeka chakwel umuchirikina ni ukwisambin chakul.