Tulejanany Rusangu Kudi “Antu a Mitapu Yawonsu”
1. Ov, mutapu ik udia in kulejan ayifuvu mudi ankaliweny in manangu?
1 Nkaliweny mwin manangu ukweting yom ya mudimu yivud, ni wij chisu ni mutapu wa kusadil chom ni chom. Chilik chimwing, chitudia in kulejan, tukwet yom ya mudimu kushalijan yikutwisha kutukwash chakwel tuwanyish mudimu wetu. Chilakej, abudisha mabroshir mavud makweta mitu ya milong kushalijan chakwel matukwasha kulejan rusangu kudi “antu a mitapu yawonsu.” (1 Kor. 9:22) Mu wenjil wa Mudimu Wetu wa Want winou achindinamu mamwing ma ku mabroshir minam, alejin kudi anany tufanyidina kumapan, ni amekeshinamu mutapu tukutwisha kumapan.
2. Ov, chisu ik tukutwisha kusadil mabroshir mu mudimu wa kulejan?
2 Chisu cha Kusadil Mabroshir: Nkaliweny ukusadil chom cha mudimu chisu chin chawonsu chisotilay. Chilik chimwing, tukutwish kupan broshir chisu chin chawonsu tutanina muntu kanang ukumusangera, chidiap ching kusu pa angond tupanininga mikand. Chilakej, anch mukand wa kupan udi Chifundishinay Bibil ni tulejen rusangu mwi ngand yakad kwikal in Kristu mudia antu amekeshina musangar ukemp wa Bibil, chikutwish kwikal chiwamp kupan broshir ufanyidina ni kumulej mutapu wa kusadil buku Chifundishinay Bibil, kupwa, twakudish kal musangar kudi muntu winou.
3. Ov, mulong wak tufanyidin kwikal nich ukaliweny wa kusadil yom ya mudimu wetu wa kupan uman?
3 Mifund yilondining nawamp piur pa antu a mushiku mu mudimu wau. (Jinsw. 22:29) Chakin kamu, kwikil mudimu upandakena usey kusut “mudimu utumbila wa rusangu ruwamp” nlel unou. (Rom 15:16, NW) Chakwel twikal mudi “mwin mudimu wakad kukwatishan usany,” tukez kusal usu wa kwikal nich ukaliweny wa kusadil yom yetu ya mudimu.—2 Tim. 2:15.