Mushet Wetu Ukweta Yom ya Kulejan Nich
1. Mutapu ik udiau in kulejan in Kristu mudi ansongamabay?
1 Ansongamabay asadidining yom kushalijan ya mudimu. Kuding yom yimwing ya mudimu yisadidiningau ching anch akwet midimu yimwing ya pakampwil, pakwez kuding yom yikwau yikatau kusadin yisu yivud. Ansongamabay akweta ukaliweny akweting yom yau ya mudimu ya pakampwil mu mushet wau, yom yiney yawiy yikatau kusadil nawamp. Bibil umukasikeshin mwin Kristu mwawonsu chakwel ipana mu mudimu wa kulejan ni ikala “mwin mudimu wakad kukwatishan usany.” (2 Tim. 2:15) Ov, chom ik chikweta usey nakash pakach pa yom ya mudimu yidia mu mushet wetu? Didi Dizu dia Nzamb—diawiy chom cha kusambish cha mudimu tukata kusadil mulong wa ‘kwikadish in kwilej.’ (Mat. 28:19, 20) Chawiy lel, tufanyidin kusal usu nakash chakwel twikala nich ukaliweny wa “kulejan dizu dia uyakin nich kutentam.” Pakwez, kudi kand yom yikwau ya mudimu tukata kusadin chisu ni chisu mu mushet wetu wa yom ya kulejan nich, yifanyidinau in Kristu awonsu kwilej mutapu wa kuyisadil nich ukaliweny mulong wa kuyifundish antu uyakin.—Jinsw. 22:29.
2. Yom ik ya kulejan nich ya pa dishin tukata kusadil?
2 Yom Yetu ya Kulejan Nich ya pa Dishin: Kuwejaku Bibil, yom ik yikwau ya mudimu tufanyidina kusadil? Chom chakusambish tufanyidina kusadil mulong wa kulejan uyakin udia mu Bibil udi buku Chom ik Chakin Kamu Chifundishinay Bibil? Kupwa kwa kwilej buku winou ni mwin kwilej, tufanyidin kwilej kand buku mukwau “Ilamany mu Rukat Ra Nzamb” mulong wa kumufundish mutapu wa kusadil yany ya Bibil mu mwom wetu wa pichuku-pichuku. Chawiy lel, tufanyidin kusadil nawamp ma buku minam maad. Mabroshir mamwing mafanyidin ni mawiy kwikal mu mushet wetu wa yom ya Kulejan Nich. Broshir Rusangu Ruwamp Ridiokila Kudi Nzamb! udi umwing wa yom ya kusadil ya pakampwil mulong wa kusambish malejan ma Bibil. Anch mu teritwar wetu mudi antu akad kwijik kutang nawamp ap alondina jindim jakad kwikal jifundinau mu mikand yetu, tukutwish kusadil kand ma broshir Mutesha Nzamb ap Mutesha Nzamb ni Ikal ni Mwom Chikupu. Broshir wa pa dishin utukwashina kuyilej in kwilej piur pa dirijek dietu udi Ov, Anany Asadina Rusot ra Yehova Nlel Unou? Mavideo matukwashining kwikadish in kwilej, mudi Mulong wak Kwilej Bibil?, Ov, Chom ik Chikata Kusadik ku Chot Cha Want?, ni Ov, Nzamb Ukwet Dijin?, yidi yom ya mudimu tufanyidina kwilej kand mutapu wa kuyisadil nawamp.
3. Mitu ya milong ya machuku ma kurutu ya Mudimu Wetu wa Want yikez kutukwash kusal ik?
3 Mitu ya milong ya machuku ma kurutu ya Mudimu Wetu wa Want yikez kutukwash chakwel tutwisha kusadil nawamp mikand yetu ya pa dishin yidia mu mushet wetu wa yom ya kulejan nich. Pitusadina usu wa kusadil nawamp yom yiney ya mudimu, tufanyidin kulondul chiyul chinech chapepilau chilondina anch: “Babal ey amwiney, babal kand ku malejan mey. Dandamen mu yom yiney, mulong anch ey wasal mwamu ukez kwipandish ey amwiney pamwing nau antu akuteshila.”—1 Tim. 4:16.