Mutukutwisha Kwikal Aurikina ni Mangand

1. Ov, chom ik chakasikeshinay Yesu uchuku wend wa nsudiel panap pansh pa divu mudi muntu?

UCHUKU wa nsudiel wa kwikalaku kwa Yesu pa divu mudi muntu, ndiy wamekesha mutapu wipanangay nakash piur pa yom yadinga yifanyidina kuyishikil in kwilejend. Ndiy wamulembila Tatukwend pa mulong winou ni walonda anch: “Kiniyilembidilip chakwel ey uyidiosha mu mangand, pakwez ey uyilama ku tuyimp. Awiy kadip a mangand, mudi am kinidip wa mangand.” (Yohan 17:15, 16, TMK) Mu malembil minam, Yesu wamekesha nich muchim umwing mutapu wadingay uyikatin in kwilejend ni wamekesha kand usey wadinga nich mazu mayilejay in kwilej amwing uchuku win wang anch: “En kiudianyap a mangand.” (Yohan 15:19, NW) Chimeken patok anch Yesu kadingap ukatin chakwel in kwilejend iyandjika mu milong ya mangand!

2. Ov, “mangand” misambinay Yesu chom ik?

² “Mangand” minam misambidinay Yesu malejen antu awonsu akad kumwifukwilang Nzamb, atakedilau kudi Satan ni adia aswik a maku ma mijimbu yau ni akweta chitongijok chidiokilinga kudiay cha kwisangaresh ni kwitutul. (Yohan 14:30; Efes 2:2; 1 Yohan 5:19) Chawiy, kwikal “murund wa . . . mangand kudi kwikal mukankuny wa Nzamb.” (Jakobu 4:4) Ov, mutapu ik antu awonsu asotina kwilam mu rukat ra Nzamb mukutwishau kushakam pa divu pakad kwiyandjik mu milong ya mangand? Tukwisambin mitapu yitan yilondwila ey: Kushal ashinshamena ku Want wa Nzamb udia ku umutakel wa Kristu ni kulik kwiyandjik mu milong ya chipolitik, kujijamen chiyul cha mangand, kwikal ikepishina mu mutapu wetu wa kudjal ni kwileng, kwikal ni mwom uswapela ni kudjal yom ya kurish nich njit ja Nzamb.

TUSHALANY ASHINSHAMENA NI AKAD KWIYANDJIK MU MILONG YA MANGAND

3. (a) Ov, mutapu ik wamanangay Yesu milong ya chipolitik ya pa chirung chend? (b) Ov, mulong wak tukutwish kulond anch in kwilej a Yesu azizidilau many adi antimesh end? (Tal mazu ma kwinshin.)

³ Pa ndond pa Yesu kwiyandjik mu milong ya chipolitik ya pa chirung chend, ndiy wipana nakash mu mudimu wa kulejan rusangu ruwamp ra Want wa Nzamb, guvernema wa mwiur wafanyidina kwikal ni Mwant uwanyidina. (Daniel 7:13, 14; Luka 4:43; 17:20, 21) Chawiy, chisu chadiay kurutu kwenday Pons Pilat, Mwant wa in Rom, Yesu wamuleja anch: “Want wamam kiudiap wa mangand minam.” (Yohan 18:36) In kwilejend ashinshamena amwimburijining pashadiningau ashinshamena kudiay ndiy ni Want wend ni palejiningau rusangu ruwamp ra Want winou mu mangand. (Mateu 24:14) Kambuy Paul walonda anch: “Chawiy etu panap tudi antimesh a Kristu, Nzamb amwinend ukat kukutazukinany en mu etu. Chawiy tukulembijekinany en mu dijin dia Kristu chakwel witiyany kuchakul nend Nzamb.”a​—2 Korint 5:20.

4. Ov, chom ik chisadininga in Kristu akin awonsu chakwel amekesh kushinshaman kwau ku Want wa Nzamb? (Tal mushet ukweta mutu wa mulong ulondina anch: “In Kristu a Pasak Kiyandjikangap mu Milong ya Mangand.”)

⁴ Aruu ading antimesh a ngand mwingand yikwau, chawiy lel, awiy kiyandjikiningap mu milong ya ngand yishichingau bwat. Pakwez, aruu inay ading angaj a guvernema wau mwingand muyituminingau. Chom chimwing kand ni in kwilej a Kristu azizidilau many, ‘kwol kwau kudi mwiur.’ (Filip 3:20) Chilejeningau Want wa Nzamb nich kutakaman, awiy akwashining mamiliyon ma “amikoku akwau” a Kristu chakwel itiyij “kuchakul nend Nzamb.” (Yohan 10:16; Mateu 25:31-40) In mu chisak cha amikoku akwau ading niyau antimesh a Kristu mulong ayikwashining anamakwend a Kristu azizidilau many. In Kristu azizidilau many nau amikoku akwau asadining mu uumwing mulong wa kuchidij yisakin ya Want wa Mesia, chawiy lel, awiy kiyandjikiningap ap pakemp mu milong ya chipolitik ya mangand.​—Tang Isay 2:2-4.

5. Ov, mutapu ik ushalijadinau in Kristu ni in Isarel, ni mutapu ik umekeninga kushalijan kwinoku?

⁵ Kushinshaman kudiay Kristu kudiap kusu diyingish chakwel in Kristu akin alik kwiyandjik mu milong ya chipolitik. Tushalijadin nau in Isarel mulong Nzamb wayinkisha kachikunku ka divu, pakwez etu tudi mu mangand mawonsu. (Mateu 28:19; 1 Pita 2:9) Chawiy, anch etu twiyandjik mu yisak kanang ya chipolitik, tukezap kand kwikal atakamena kulejan Want wa Nzamb, ni tukezap kushal mu uumwing nau akadivar netu in Kristu. (1 Korint 1:10) Chikwau, anch kudi njit, tukurish nau akadivar netu in Kristu atulejinay Yesu kukat. (Yohan 13:34, 35; 1 Yohan 3:10-12) Yesu wayileja in kwilejend kulik kura njit ayinau. Ndiy wayileja kand kuyikat ni akankuny nau.​—Mateu 5:44; 26:52; tal mushet ukweta mutu wa mulong ulondina anch: “Ov, nidandamedin kwikal waurikina mu milong ya mangand?”

6. Ov, kwipan kwey kudiay Nzamb kukwet yibachikin ik pakach pey ni Sezar?

⁶ Chitudia in Kristu akin, twapanin mwom wetu kudi Nzamb, pakwez, tuupaninap kudiay muntu, ap ku dirijek dia antu ap ku muchid kanang. Bibil ulondin anch mu mukand wa 1 Korint 6:19, 20 anch: “En kiudianyap ant ipen. Akulandanya kal nich usey ukash.” Chawiy, chisu tumwinkishininga “Sezar” yom yend mudi: kalimish, kulambul yitad, kuziyil yany yend yikwatijadininga nich yany ya Nzamb, tulambwiling “yom ya Nzamb kudi Nzamb.” (Marko 12:17; Rom 13:1-7) Chinech chitin kuwejinaku kand kumwifukwil ching ndiy amwinend kusu, kumukat nich muchim umwing ni kumuziyil mu yom yawonsu. Yisu yimwing, twitiyijining rufu pichitwishikininga pa ndond pa kujiril yijil yend.​—Luka 4:8; 10:27; tang Midimu 5:29; Rom 14:8.

TUJIJAMENANY “MWIKU WA MANGAND MINAM”

7, 8. Ov, “mwiku wa mangand” chom ik ni mutapu ik ‘uyisadishininga’ antu yom?

⁷ In Kristu alikining kand kwiyandjik mu milong ya mangand chisu chijijamediningau mwiku muyimp wa manangu minam. Paul walonda anch: “Kitwatambulap mwiku wa mangand minam, pakwez twatambula [m]wiku [u]tumbila udiokila kudi Nzamb.” (1 Korint 2:12) Wayifundina kand in Efes anch: “Chisu chinicha en walondulanya yaku yiyimp ya in mangand. En wamuziyilanya mwin kutakel wa ayilembil ushicha pakach pa diur ni divu, ndiy kamu mwiku uyikedila antu akata kumubwambwil Nzamb.”​—Efes 2:2, 3.

⁸ Dizu “chipepil,” ap mwiku, yidi yom yakad kumekanang ku mes, pakwez, udi usu uyibachikininga antu kulik kumuziyil Nzamb ni kulondul ‘maku ma mujimbu wa mbij ni maku ma mes.’ (1 Yohan 2:16; 1 Timote 6:9, 10) Mwiku winou ukweting “umutakel” mulong uyibachikining antu ku kuwanyish maku ma mijimbu yau, uyisadishining yom ya pansh pansh, uyiling ni kukasikan ni uding pa ndond yin yawonsu mudi rinkind. Chikwau kand, ‘ukat kuyisadishang’ antu yom pachikata kuyibachikang pakemp pakemp chakwel ikala nich mikadil yiyimp mudi: kwibaz, kwitutul, ris ra kwitek piur, chitongijok cha want ipau ni wintomboj.b Tukutwish kulond mu wiswimp anch, mwiku wa mangand uyibachikining antu chakwel afanijana nend Djabul.​—Yohan 8:44; Midimu 13:10; 1 Yohan 3:8, 10.

9. Ov, mu jinjil ik tukutwisha kutambul mwiku wa mangand mu manangu ni mu michim yetu?

⁹ Ov, niyey ukutwish kutambul pamwing ap mwiku wa mangand mu muchim ni mu manangu mey? Mwaning, ukutwish kumutambul anch udimukinap. (Tang Jinswir 4:23.) Ukutwish kusambish kumutambul pakad kwijik, pamwingap chisu utila urund ni antu amekena mudi antu awamp pakwez, akad kumukat Yehova. (Jinswir 13:20; 1 Korint 15:33) Ukutwish kand kumutambwil kudi muntu mwin mwawonsu ap kusutil ku chom chin chawonsu chikweta chitongijok cha Satan ni ditenchik diend mudi kutang mikand yiyimp, kutal pornografi ap kutang malejan ma in kupumbwok pa Internet, kwipuwangesh mu mutapu uyimp, kutal ni kusengan masengan mayimp makata kumubachik muntu ching ku kuyiwin akwau.

10. Ov, chom ik tufanyidina kusal chakwel tumujijamena mwiku wa mangand?

¹⁰ Ov, chom ik tufanyidina kusal chakwel tumujijamena mwiku muyimp winou cha mangand ni kwilam ayinetu mu rukat ra Nzamb? Tufanyidin kuziyil ku yom yawonsu yitenchikinay Yehova chakwel twikala nend mu urund uwamp pamwing ni kumwit spiritu wend. Yehova umupandaken nakash Djabul ni ditenchik diend diyimp ditakedinay. (1 Yohan 4:4) Chidi cha usey mud ik kwikal piswimp ni Yehova mu malembil!

KWIKAL IKEPISHINA MU MUTAPU WETU WA KUDJAL NI KWILENG

11. Ov, mutapu ik chiyul cha mangand chikweta yibachikin yiyimp mu mutapu wa kudjal?

¹¹ Tumujingunining kand muntu ukweta chitongijok cha mangand ku mutapu wend wa kudjal, ku kwileng ni kwinang. Muyila mutapu wa kudjal ni kuyip mu jingand jivud, kabamb a nsangu umwing washika ku kulond anch mu machuku makemp am mukwikalap kand kushalijan pakach pa kudjal kwa amband a kusochik ni amband atena. Ap an ayangadim akweta mivu mwinshin mwa dikum atambwil niyau chaku chinech chiyimp cha “kumekesh mujimbu, kulik kwikal ni usany” mudi mwayimekeshau mu jurnal umwing. Kuding kand chaku chikwau cha kudjal mu mutapu wakad kuwanyin ap kudjal maswin makad kurijek nawamp, chaku chinech chimekeshining chitongijok cha wintomboj ap chitongijok cha kulik kwiman ni usey.

12, 13. Ov, yany ik tufanyidina kulondul mu mutapu wetu wa kudjal ni kwileng?

¹² Chitudia atushalapol a Yehova, tusadining usu chakwel mutapu wetu wa kwileng wikala uwamp, chawiy kulond anch kudjal nawamp ni kwileng mu mutapu wakad kuyipwakesh antu akwau pa ndond yishichau. Kwileng kwetu kufanyidin yisu yawonsu kumekesh mutapu tukweta kalimish ap kufanyidin kwikal “kwakad kwimekesh ni kwibaz” pamwing ni “yisalijok yiwamp” yiwanyidina antu in awonsu​—amakundj ap amband “akata kwijimbul anch, amwitiyijina Nzamb.” Rutong retu rijim ridiap ra kusal mwamu chakwel atumana bwat, pakwez, ridi ra ‘kwilam [ayinetu] mu rukat ra Nzamb.’ (1 Timote 2:9, 10; Jud 21) Tusotining kurijek nakash ufun wa “untu uwamp ujingamina mu muchim . . . , kwawiy kuwap kwa usey ukash ku mes kwa Nzamb.”​—1 Pita 3:3, 4.

¹³ Twijikany kand anch, mutapu wetu wa kudjal ni kwileng ukutwish kuyishikij antu ku kutambul difukwil dietu diakin nich usey ap ku kudises. Pisambidinau piur pa dizu dia Grek dikarumwinau anch “kwisikan” mu yaku, dilejen kalimish, wom ni kulimish mutapu wa kuman wa antu akwau. Pa ndond pa kusal yom ching mutapu tusotina ayinetu mulong tukwet mbil ya kusal, tufanyidin kulimish kom ka antu akwau. Tusotin kumwinkish Yehova ntumb pamwing ni antu end pakad kumwovish usany, ni kumekesh mutapu tudia atushalapol a Nzamb asadininga “yawonsu mulong wa kulet uyaj kudi Nzamb.”​—1 Korint 4:9; 10:31; 2 Korint 6:3, 4; 7:1.

14. Ov, yipul ik tufanyidina kwiyipul piur pa kudjal ni kwileng kwetu?

¹⁴ Tufanyidin kudjal, ni kwileng nawamp, ni kwikal inangina, nakash chisu tudia mu mudimu wa kulejan ap chisu tuyiling ku yikumangan. Ukutwish pamwing ap kwiyipul anch: ‘Mutapu wam wa kudjal ni kwileng uyibachikiningaku antu ku kwintal nakash? Uyovishiningaku antu akwau kusansan mu michim yau? Ov, nisadidining want ipau nikwetinga mu milong yiney nich usey kusut mutapu nipanininga chakwel nikala nich chisend mu chikumangen?’​—Kuseng 68:6; Filip 4:5; 1 Pita 5:6.

15. Ov, mulong wak Bibil katulejinap kachom ni kachom kin kawonsu piur pa kudjal ni kwileng?

¹⁵ Bibil kayilejinap in Kristu kachom ni kachom kin kawonsu kafanyidinau kusal piur pa kudjal, kwileng ni kwinang bwat. Yehova kasotinap kututambul want ipau tukweta wa kwitondin yom ya kusal ap kusal mudimu nich manangu metu. Pakwez, usotin twikala antu akudila, ashinshikidininga yitongijok yau pa mazu ma mu Bibil ni “akata kwauril kuwap ni kuyip.” (Hebereu 5:14) Usotin kand nakash nakash etu tusalang yom kwambatijan nich rukat ritumukatina ni rituyikatina nich amutej netu. (Tang Marko 12:30, 31.) Ap anch tusadidining yiyul yiney, twijikany amboku anch kudi mitapu yivud ya kudjal ni kwileng. Chawiy, antu a Yehova adia pa divu diawonsu adjadining maswin ma ulombu kushalijan ni mitapu kushalijan chisu chitanijaniningau.

TWIKALANY NI ‘MWOM USWAPELA’

16. Ov, mutapu ik chiyul cha mangand chidia chakad kwovijanang ni dilejan dia Yesu ni yipul ik tukutwisha kwiyipul?

¹⁶ Chiyul cha mangand chiyidimbining antu avud ni chiyibachikining ku kutong anch anch ikal ampich akweta nfalang ni yom yivud ya kumujimbu akutwish kwikal nich musangar. Pakwez, Yesu walonda anch: “mwom wakin wa muntu kiudiap mu yom yikwetay.” (Luka 12:15) Yesu kayilikishap antu chakwel ikal ampich ap kuyibachik chakwel amana mar bwat, pakwez, wafundisha anch: ‘chifanyidin kwikal ni kuswir kwa yom ya Nzamb mu michim yau’ mulong wa kwikal ni musangar mu mwom, ni antu akweta mwom ‘uswapela,’ akata kutongijokin pa yom ya muspiritu. (Mateu 5:3; 6:22, mazu ma kwinshin) Ukutwish wiyipul anch: ‘Ov, chakin kamu nitiyijining dilejan dined dialejanay Yesu bil anch “Tatuku wa makasu” winrumbangeshining mu yitongijok yam? (Yohan 8:44) Ov, mazu mam, jintong jam, yom yam nitekininga pa ndond ya kusambish ni mashakamin mam ma katat mamekeshin anch nidi muntu wa mutapu ik?’​—Luka 6:45; 21:34-36; 2 Yohan 6.

17. Ov, yiyukish ik yitambwilingau antu alamina mwom uswapela?

¹⁷ Yesu walonda anch: “manangu ma Nzamb makat kumekan anch madi makin ku yisalijok yau.” (Mateu 11:19) Tal yiyukish yimwing yitambwilingau antu alamina mwom uswapela. Mudimu wa Ukaleng wa Nzamb uyinkishining chisambu chakin. (Mateu 11:29, 30) Ipukining kuwil mu yoziu ni kufil mu mupit wa maku mayimp ma usup. (Tang 1 Timote 6:9, 10.) Asangaredining yom yau yikemp yidingau nich, chawiy, atanining chisu cha kushakam ni yidi ya mu majuku mau pamwing kand ni ambay nau in Kristu. Akutwish kulal nawamp win kamu, ku matu zoong. (Mulej 5:12) Atanining musangar uvud mulong asadining usu wa kupan yom kukwatijan nich mutapu utakedilau. (Midimu 20:35) Kupwa, awiy ‘ajimbil mu ruchingej’ ni akwet chisambu cha muchim nich musangar. (Rom 15:13; Mateu 6:31, 32) Kwikil yiyukish yikwau yitukutwisha kufanyikesh nich yiyukish mudi yiney!

DJALANY “YOM YA NJIT YAWONSU YA NZAMB”

18. Ov, mutapu ik umumekeshinay Bibil mukankuny netu, ni mipit yend ni mutapu wa ‘njit’ jetu?

¹⁸ Antu ilamininga mu rukat ra Nzamb atanining kand yiyukish ya diking dia muspiritu diyikingininga in Kristu ku yipwichik ya Satan, mukankuny usotina kuyikangesh musangar ni mwom wa chikupu. (1 Pita 5:8) Paul walonda anch: “Kiturishinap nau antu a mijimbu ya mbij, pakwez tukat kurish nau in kutakel, nau in ulabu, nau akish ayikedila pa mangand minam mu chirung chinech cha mididim, ni yizwepwepu yikweta ukash mwiur.” (Efes 6:12) Dizu dikarumwinau anch ‘kurish’ dilejenap kurish kwa palemp nau akankuny netu bwat, pakwez dilejen anch kudi kamu kurish kwa piswimp nau. Kupwa, mazu makarumwinau anch “ant, antakel” ni “antakel a mangand” malejen anch njit jiturishiningau kudi aspiritu ayimp jidi njit jitenchikinau.

19. Rumburil yom ya njit ya mwin Kristu.

¹⁹ Chikalap nchik kuburen kuwanyin ni kuziy kwetu, tukutwish kuwin jinjit jinej. Ov, mutapu ik? Kusutil ku kudjal “yom yawonsu ya njit ya Nzamb.” (Efes 6:13, NW) Mu Efes 6:14-18 Paul ujimbwil yom yiney ya njit palondinay anch: “Chawiy tumbukany, djalany may men nich uyakin, djalany rikibu ra kutentam pa ntul yen, djalany yisapat ya kwirijek kwa kulejan rusangu ruwamp ra chisambu ku mend yen; ni piur pa yom yawonsu, tambulany kand rikibu ra ritiy, chakwel ukez kwakany nich jinseu jiyimp ja Satan jikweta kasu kakasidilauku. Tambulany mpup ya dipandish ni mpak ya musamun ya [s]piritu, diawiy dizu dia Nzamb; ni kudandamen kulembilang ku tupamp twawonsu mu [s]piritu.”

20. Ov, mutapu ik mushalijadina njit jetu ni ja amasalay?

²⁰ Mulong yom ya njit ya Nzamb yiney yidiokiling kudiay Nzamb, chawiy, tufanyidin kuwin anch twayidjal dichuku diawonsu. Etu in Kristu tushalijadin nau amasalay mulong awiy akutwish kusal machuku mavud pakad kurish njit, pakwez, etu turishining njit chisu chin chawonsu chitekininga mwom wetu mu chak, ni njit jinej jikez kupwa ching pakezay Nzamb kushesh mangand ma Satan ni kuyidjibul mu dibuku aspiritu ayimp awonsu. (Kujingunik 12:17; 20:1-3) Chawiy, pikil kulik kurish nich kuziy kwey ap nich maku mey mayimp ma mujimbu, mulong etu awonsu tukat ‘kwimesh’ ayinetu mar nakash chakwel tuman mutapu wa kushal ashinshamena kudiay Yehova. (1 Korint 9:27) Chakin kamu, twoviling wom pa chisu twakad ni njit!

21. Ov, chom ik tukutwisha kusal chakwel tuwin njit jiturishina ni aspiritu ayimp?

²¹ Pakwez, tukutwishap kuwin njit jinej nich usu wetu ayinetu. Chawiy, Paul utuvurishin anch: chidi chiwamp kumulembil Yehova “yisu yawonsu mu [spiritu].” Yisu yimwing, tufanyidin kand kumutesh Yehova pitwilejininga Dizu diend ni pitwinungininga nau ambay “amasalay” netu yisu yivud mulong turishiningap njit jinej ayinetu! (Filimon 2; Hebereu 10:24, 25) Antu ashinshamena mu yom yiney yawonsu akez kuwin jinjit jinej ni akez kwikal awanyidina kwakul ku yipul ya muntu mwin mwawonsu uyipwila piur pa ritiy rau.

IRIJEKANY CHAKWEL UCHIDIJANY RITIY REN

22, 23. (a) Ov, mulong wak tufanyidin kwikal irijekina yisu yawonsu chakwel twakula ku yipul yitwipwilingau piur pa malejan metu, ni yipul ik tufanyidina kwiyipul? (b) Ov, yom ik yikwisambina shapitre ukulondula?

²² Yesu walonda anch: “mulong kiudianyip a mangand . . . chawiy chikukisilanyau kudi mangand.” (Yohan 15:19) Chawiy, in Kristu afanyidin kwikal irijekina chisu chawonsu chakwel amanang mutapu wa kwakul ku yipul yiyipwilingau piur pa malejan mau, ni afanyidin kwakul nich kalimish, ni kwitudish. (Tang 1 Pita 3:15.) Chawiy lel, ukutwish kwiyipul anch: ‘Ov, natesh kal mulong wak yisu yimwing Atuman a Yehova alikining kusal chom chibaziningau kudi antu avud? Pinilikininga kusal chom chibaziningau kudi antu avud, ov, niding ni kashinsh anch chilondinay Bibil ni chilondinau kudi kashalapol ushinshamena ni kubabal chidi chakin? (Mateu 24:45; Yohan 17:17) Chisu chiswirikedininga kusal chom chitentamina ku mes kwa Yehova, ov, nitiyijining kwikal ushalijadina nau antu akwau pamwing ni kwov musangar wa kuchisal?’​—Kuseng 34:2; Mateu 10:32, 33.

²³ Yisu yivud, rusot retu ra kulik kwiyandjik mu milong ya mangand riding chikokujol chijim chijingamina kujingunin. Chilakej, mudi mwayilejanau kal omu, Djabul ukimbining kwandjik Atuman a Yehova mu milong ya mangand kusutil ku kwipuwangesh. Ov, mutapu ik tukutwisha kutond kwipuwangesh kuwamp kukutwisha kutukwash kutambul kand usu wa kulam kom kadia zwang? Shapitre ulondwilaku ou ukwisambin mulong winou.