Yakul Ku Yipul Yen

◼ Mutapu ik wa kudjal ufanyidina pituyila ni kutal yikumbu musadidilau mudimu wa Yehova?

Pa mangand mawonsu, Yot ya Want, Yot ya Yitentam, yikumbu ya Bethel, ni ya mitiy yidi jindond japanau kal mulong wa mudimu wa Yehova. Yidi yiswapela, yinangina, ni yilaminau nawamp, yilejen kalimish. Kudi kushalijan nakash nich yimekena mu ditechik dia Satan. Antu ayilinga kwendil ku jindond jimusadidinau Yehova mudimu afanyidin niyawiy ijikana anch adi a Yehova, antu asadila rusot rend.

Chitudia in Kristu, “tusotil kwimekesh mudi in mudimu a Nzamb” mu yom yawonsu, ni mu kwinang kwetu, mu kudjal ni mu kwileng kwetu. (2 Kor. 6:3, 4) Tufanyidin kand kwikal ni chaku chiwamp. Yisu yawonsu kudjal ni kwileng kwetu kufanyidin kumekesh kwisikan ni kalimish kayifanyidina atushalapol a Yehova Nzamb. Chom chinech chidi chakin pakampwil pituyila kwendil yikumbu ya mitiy yijim yidia mu New York pamwing ni mitiy yidia mu mangand.

Pisambidinay usey wa kudjal ni kwileng nawamp, buku Atenchikinau Chakwel Kusal Rusot ra Yehova urumburil piur pa kwinang ku mujimbu, kudjal kwisikena ni kwileng kuwamp pituyila mu mudimu wa chingand ni ku yikumangan ya Ukristu. Kupwa, pa paj wa 138, paragraf wa 3, ulondil anch: “Vurikany anch, dijin Bethel dirumburikin ‘Chikumbu cha Nzamb.’ Chawiy lel, kudjal kwetu, kwikil ap kwileng kwetu, ni mwikadil wetu yifanyidin kwikal yin yikatau kutuchingejin pitukata kukumangan mulong wa difukwil ku Chot cha Want.” Atutwambil a Want awonsu ashichinga piswimp ni akulemp ayila kutal Bethel afanyidin kusadil chijidik chinech chijim. Pa chinech, antu inay ezina akumekesh kusanger ni kalimish kafanyidina.—Kus. 29:2.

Yidjal yetu yifanyidin ku twijikish, anch tudi “amwitiyijina Nzamb.” (1 Tim. 2:10, MM) Kudjal ni kwileng kufanyidina kukwet usu uwamp pamutapu umenau antu akwau difukwil diakin dia Yehova. Pakwez, chameken anch payilingau akadivar ni anambaz amwing kutal yikumbu musadidilau mudimu wa Yehova, adjiting nayimp, ap kudjal maswin mamekeshina mujimb wau. Masun ma mutapu winou mayiwanyidinap in Kristu ap pakemp. Pa mulong winou, ap pa yom yikwau ya mwom wetu wa in Kristu, tuswirikedin kulam yijidik yijim yimekeshina kushalija pakach pa antu a Nzamb ni a mangand, kusal yom yawonsu mulong wa kulet uyaj kudi Nzamb.—Rome 12:2; 1 Kor. 10:31.

Pituyila kutal mitiy yijim ni mutiy udia mu New York ap yikumbu yikwau ya mitiy, kwikala kwa kutenchik ap pitudia mu konje iyipula anch: ‘Ov, yidjal yam ni kwileng kwam yimekeshin kwisikan, kwinang, ni kalimish ka ndond yituyila? Ov, kumekeshin nawamp difukwil dia Nzamb wam? Ov, antu akwau akuzuwol ap anch akujiman pa kwimanau?’ Kusutil ku kudjal ni kwileng kwetu, chawiy etwawonsu tumekesh chisu chawonsu “katumb ka malejan ma Nzamb Mupandish wetu”!—Tit. 2:10, MM.