Kwikepish mu Kudjal ni Kwileng
1 “Amakundj awonsu, ap ansangarum, adjit nkol. Amband awonsu nau ayangadim, amakurump nau anikanch, adjit nkandj (yikwemb) ap jip. Kwikil antu adjita maloyis ( jeans) ap yikut pakad kujal nkol amekana kwinikwa. Muntu ni muntu pinap ukwet musangar nakash.” Mwamu mwalonda jurnal umwing. Ov wading ushimunin runtu ra mutapu ik? Ov kwading kukumangan kwa chipolitik? Chinship cha masengan? In kupangan maj ma rock? Bwat kwau! Jurnal winou wadinga ni kushimunin chisak chimwing cha akadivar ni anambaz adinga ku chikunguril chimwing chijim cha distrik cha muvu wasutina ou.
2 Mu musumb ukwau mwasadinau chikunguril, kabamb-a-nsangu umwing washimunina runtu ra Atuman anch: “Amakundj awonsu inangin ni adjit koch ni nkol. Amband adjit mutapu umwing uwamp nich kalimish.” Mwin kushinshikin mukwau, mpurish, walonda anch: “Udiany antu amwing akweta yaku yiwamp, kalimish, inangina, ni antu afanyidina. Chom namana kal chidi cha kusangaresh nakash. Mu mangand minam mikisina, ukat kusalany mudimu mulong wa kudiosh yishoshot!” Udi uman uwamp mud ik ku mutambu wetu! Ov, tudiap in kujikitish nakash pabazinau nakash ukadivar wetu mwamu? Mwawiy, antu in awonsu adinga mu runtu ra Atuman awejina ku rusangu riner ruwamp nich mutapu wau uwamp wa kudjal.
3 Twijiken mu mangand mawonsu mulong wa kwikal ashalijadina mu mutapu wetu wa kudjal. (Mal. 3:18) Mulong wak? Mulong tukat kulondul chiyul cha Mifund cha ‘kudjal maswin mawanyidina nawamp wakad kwishimek, . . . nich yisalijok yiwamp, mudi muchifanyidina kudi [antu] akata kwijimbul anch, amwitiyijina Nzamb.’—1 Tim. 2:9, 10.
4 Ov Mutapu wey wa Kudjal ni Kwileng Umekeshin Yom Ik? Maswin tukata kudjal ni mutapu tukata kumadjal yikat kupanang uman kanang piur petu—piur pa yitiyij yetu, mwikadil wetu wa manangu, ni yitongijok yetu. Milad tukata kutond yikat kulondang piur pa mutapu utudia ni ku mutambu wa nany tudia. Tufanyidinap ap pakemp kukasikesh yitongijok yiyimp ni ngikadil yipalangeshinau mu mangand. Kubangin kwetu kudiap kwa kwijik anch mulad kanang wawiy upandikena kuwap pakwez kudi kwa kwijik anch mulad winou ufanyidin kud muntu ukata kwijimbul anch udi kashalapol wa Nzamb. (Rom 12:2) Pa ndond pa kutond mutapu kanang wa kudjal umekeshina spiritu wa want ipau ap uletina yitongijok ya mwikadil wa mwom wa masandj, tusotin kumekesh anch chakin kamu tukat ‘kumushiman Nzamb.’—1 Pi. 2:12.
5 Yisu yimwing, muntu uchidia musu, wakad kwijik yom yivud, ap uziyila muspiritu ukutwish kwitiy chom chin chawonsu chipalangeshina mangand mu kudjal ni kwileng pakad bil kushinshikin mulad wa yitongijok uchiletina piur pa Yehova ni dirijek diend. Etu awonsu tukutwish kwishinshikin muntu ni muntu pa rend chakwel kuman anch twakwachikin kal nich usu wa yitongijok ya mangand ap bwat. Tukutwish kwisamb ni mukadivar umwing ulimishinau, ukudila muspiritu ap nambaz ni kumwipul mutapu umenay nich kashinsh kawonsu mulad wetu wa kudjal ni wa kwileng ni kushinshikin kamu nakash yiyul yitwinkinau.
6 Amwing itiyijin kamu kapamp kamwing anch afanyidin kubabal piur pa mutapu ukatau kudjal chisu chikumangenau ku chikunguril. Pakwez kand akat kupipesh yany yau chisu cha kwiswedish kupwa kwa program wa dichuku. Lamany yany ya piur yikutwisha kuyikwash atushalapol in Kristu. (2 Kor. 6:3, 4) Yikalap nchik ndond tuyila kudia antu, yijiken yetu ya chikunguril ni mutapu wetu wa kudjal ni kwileng yitwijikishin anch tudi Atuman’a Yehova. Chawiy lel, maswin metu mafanyidin kwikal chisu chin chawonsu minangina ni mawanyidina, mafanyidin kumekesh anch tudiap “mu uumwing nau in mangand.”—Yohan 15:19.
7 Tusalany yawonsu tukutwisha ku Chikunguril cha Distrik cha muvu unou “Antwarubil a Want Akweta Mushiku” mulong wa kumekesh anch tudi ‘antu atumbila a Yehova Nzamb wetu.’ Yibudikin yiwamp yikwikalaku yikuwejin ku ‘uyaj, ni katumb, ni kuwap ‘ kwa Yehova.—Kuv. 26:19.
[Caption on page 6]
[Picture on page 6]
Mutapu wa Kumutumbish Yehova:
[Caption on page 6]
[Picture on page 6]
■ Djalany mu mutapu ufanyidina wa kashalapol wa Nzamb.
■ Ipukany milad yilondwila
spiritu wa mangand.
■ Sadilany kwikepish, kukata kumekesh kwishitul
kwa manangu.