Kwishitul Kuletin Untu wa Kalimish
1. Mu kwirijek mulong wa chikumangan cha distrik, mulong wak tufanyidina kutongin pa kudjal kwetu?
1 Ku chikumangan cha distrik cha muvu wadiap ou ikundj umwing utadila hotel walonda piur pa akadivar ni ampanyetu anch, “Atuman’a Yehova adi antu apandakena kuwap! Antwen adi awamp ni adjit nawamp nakash ni akwet kalimish nakash.” Ku chikumangan chikwau cha distrik, mband usadining ku hotel washimunina anch: “Chimeken patok anch antwen adjit mulong wa kumusangarish Nzamb.” Inge, in kukumangan akat kuyishinshik kud antu akwau. Chawiy tusotil kudjal “mu katumb kafanyidina rusangu ruwamp,” ni chinech chisu chawonsu chikat kuyibachik antu akad kwikal atuman kutubaz ni kumekesh patok anch tudi in mudimu a Nzamb. (Fil. 1:27, NW) Pitwirijekina mulong wa chikumangan cha distrik, chikwikal chiwamp tutongina kurutu kwa chisu pa kudjal kwetu.
2. Ov mulong wak chidi chikash kudjal ni kwileng mu mutapu wa kwishitul?
2 Kambuy Yakob wafunda anch, “manangu madiokila mwiur madi zwang.” (Jak. 3:17, MM) Kumekesh kwishitul mu kudjal kwetu kukutwish kwikal kukash. Mangand mayimp ma Satan makat kuyibachik antu ikal akad kwitudish, ku mujimbu, ni milad yivuzangena yakad kufanyin. (1 Yohan 2:15-17) Pa chinech, chisu tukwatina mipak yitadila kudjal ni kwileng, tuswiridin kudimukin nakash chiyul cha Bibil chakwel “tudjibul yom yiyimp ni kulik yom ya mangand, ni kushakam ni michim yitudila ni yitentamina . . . mu mangand minam.” (Titus 2:12) Tusotinap ap pakemp kupwakesh antu akwau kusutil ku kudjal kwetu, ikalap nchik akadivar netu, antu adia ku hotel ni ku madil (restaurant), ap akwau akutumana.—1 Kor. 10:32, 33.
3. Yipul ik yikutukwasha kushinshikin mutapu wa kudjal kwetu ayinetu?
3 Kwitudish, Maswin Mawanyidina: Pitwirijekina mulong wa chikumangan, iyipula amwiney anch: ‘Ov maswin mam madi ma kwidutish bil anch manlangwishidin yitong yiyimp? Ov mamekeshin kalimish mulong wa yovil ya antu akwau? Ov buluz wam ubudishin makij pol anch udi wa chidabidab? Ov maswin mam madi mud kanying bil anch kalamat? Ov minangin bil anch manunkin? Ov pinidila yakudia chisu cha midi ku hotel ap piniswedishina kupwa kwa chikumangan, ov nimeken uwanyidina, winangina mud mwin mudimu bil anch maswin mam madi makad kuwanyin, masika kal, makad kufanyin, ni mavuzangena ma mwin kukumangan udjita badj? Ov maswin nidjita chisu cha kwiswedish mangovishin usany wa kupan uman wa chikashimwish?’—Rom 15:2, 3; 1 Tim. 2:9.
4. Ov mutapu ik antu akwau ukutwishau kutukwash chakwel tumekesh kwishitul mu kudjal?
4 Tukutwish kutaninamu ku yiyul ya in Kristu aswila kal. Amband afanyidin kuyipul anfumwau mutapu ik ukumekana maswin mau kud antu akwau. Anvaj in Kristu akutwish kuyikwash anau ansangarum nau ayangadim pa mulong winou. Chikwau kand, anambaz amakurump ilimishina akutwish “kuyilej amband achidia ayangadim . . . mwakwikal ni michim yitudila, [zwang MM]” mu kudjal kwau “chawiy dizu dia Nzamb kakudisaalip.” (Titus 2:3-5) Yichap yetu yimekeshin yilakej ya ukwash ya kwitudish, ya kudjal maswin mawanyidina.
5. Ov mutapu ik tukutwisha etu awonsu kumushiman Yehova pa chisu cha chikumangan?
5 Mushimanany Yehova: Chikumangan cha distrik chitwinkishin etu awonsu chisu chiwamp cha kumushiman Yehova, chidiap kusu kudiau in kusut ku program. Chakin kamu, chaku chetu cha win Kristu ni kulond kwetu yikumutumbish ndiy. Pakwez chom cha kusambish chikatau kuman in kushinshikin chidi kudjal kwetu ni kwileng. Elany komb etu awonsu tumushimanany Yehova kusutil ku kwishitul kwetu, kuletina untu wa kalimish.—Kus. 148:12, 13.
[Caption on page 1]
[Study Questions]
[Caption on page 6]
[Picture on page 6]
Yitukwashina Kwikal nich Untu wa Kalimish
◼ Dizu dia Nzamb
◼ Kwishinshikin ayinetu
◼ Yiyul ya akwetu
◼ Yichap ya win Kristu