Kudjal Maswin Mawanyidina Nawamp Pakad Kwishimek Kumekeshin Kalimish Kud Nzamb
1. Mutapu ik tukutwisha kumekesh kujikitish kwetu mulong wa chikumangan chetu cha distrik chezina kurutu oku?
Piswimp ap kamu tukez kwitapil dilau dia kwikal angendj a Yehova ku Chikumangan cha Distrik “Panany Uyaj Kud Nzamb” cha 2003. Tumujikitishin Yehova mud ik mulong wa kututazuk etu ku musambu winou wa muspiritu upitishina! Tukutwish kumekesh kalimish ketu kud ndiy ni kujikitish kwetu mulong wa yitenchik yend ya muspiritu kusutil ku mutapu wetu wa kudjal ni wa kwileng.—Kus. 116:12, 17.
2. Mulong wak chidia cha usey ku mutambu wetu kwikal ishitwila ni kwileng nawamp?
2 Ishitwila ni Akad Kanvundangesh: Mutapu wetu wa kumekan ufanyidin kumekesh yany ya Nzamb wetu, ndiy wishitwila ni wakad kanvundangesh. (1 Kor. 14:33; 2 Kor. 7:1) Untu wetu, nswich jetu, ni nzal jetu yifanyidin kwikal yishitwila, ni tufanyidin kudjal ni kwileng nawamp. Kwileng kwa upalakas kupalangen nakash ilel unou. Pakwez, ap anch muntu kanang ukweta katumb mu masinema ap mu spor udjit cha upalakas dined didiap kwau diyingishil kud mwin Kristu kudjal kwa upalakas. Ang twimburij milad yiyikatishina antu avud nakash, chikez kuyikasiken antu kuman kushalijan kudia pakach pa antu akata kumusadilang Nzamb wakin ni akad kumusadilang.—Mal. 3:18, NW.
3. Mutapu ik tukutwisha kwijik anch mutapu wetu wa kumekan wambaten nich chiyul chidia mu 1 Timote 2:9, 10?
3 Kudjal Kuyifanyidina Atushalapol in Kristu: Mupostol Paul pamufundinay kalam mwin Kristu Timote, ndiy wayikasikesha ‘amband niyau kudjal maswin mawanyidina nawamp pakad kwishimek. . . . mudi muchifanyidina kudi amband akata kwijimbul anch, amwitiyijin Nzamb.’ (1 Tim. 2:9, 10) Kwijik anch maswin metu madi marijekinau nawamp kwitining kushinshikin nakash. Maswin mafanyidin kwikal zwang, minangina, ni mamekeshina kwikepish—kangal mikal ma upalakas, ma kulangwish ap kusarumun maku mayimp.—1 Pi. 3:3.
4, 5. Yibabesh ik yifanyidinau kutesh amakundj ni amband in Kristu?
4 Paul wapana kand kubabesh piur pa ‘mulad wa kukas nswich, ap kudjal yileng ya utad wa or, ap usang, ap maswin makweta usey ukash.’ (1 Tim. 2:9) Kwikal isikena mu kusadil yikomu, usang, tuziy twa utad wa usey ukash, kwileng chifu mu mutapu umwing wa kupandakesh, ni yom yikwau ya kwileng nich yidi njil ya manangu kud amband in Kristu kulondul.—Jinsw. 11:2.
5 Chiyul chapanay Paul kud amband in Kristu chiyitadil kand amakundj in Kristu. Akadivar afanyidin kwipuk milad ya kudjal yimekeshina yitongijok ya mangand. (1 Yohan 2:16) Chilikej, mwi ngand kanang kudjal maswin majim, maswin mapandakena kujimb kupalangen nakash, pakwez mulad winou wa kudjal ukatap kumekesh chifu chifanyidina kud kashalapol wa Nzamb.
6. Ov mulong wak tufanyidina kulam yany ya piur nakash mu kudjal ni kwileng kwetu pituyila ni pitudiokila ku chikumangan, pitudia ku chikumangan, ni pa kupwa kwa yikunku ya program wa dichuku ni dichuku?
6 Pa Chisu cha Kwiswedish: Pa chisu chisadikina program, akadivar ni anambaz avud akat kusha chilikej chimwing chiwamp nakash pa mulong utadila kudjal ni kwileng. Pakwez, marapor malejen anch amwing akat kudiburilang mutapu wau wa kudjal payilau ni padiokilau ku chikumangan ap piswedishinau kupwa kwa program wa dichuku. Chakin kamu, kudjal ni kwileng kwetu—chikala pa chisu chisutishinau program ap pa yisu yikwau—kukwet usu pa mutapu ukatau antu akwau kuyiman antu a Nzamb. Mulong tudjiting yijingidij ya chikumangan chetu, tufanyidin chisu chin chawonsu kudjal mutapu uyifanyidina atushalapol in Kristu. Chinech chikat kuyibachik antu akwau kutujikitish ni kutufungwil njil ya kupan uman.—1 Kor. 10:31-33.
7. Yibudikin ik yikutwisha kwikal nich kudjal ni kwileng kwetu kuwamp pad antu akwau?
7 Mud kamu masip ma rukat makata kumekesh nawamp chifu cha untu wetu, chawiy chimwing kand kudjal kuwamp ni kwileng kuwamp kukat kushiman uruu tusendina pamwing ni dirijek tumekeshina. Antu amwing akutushinshika pa chisu cha Chikumangan cha Distrik “Panany Uyaj Kud Nzamb” muvu unou akutwish kwikal abachikinau kwiyipul mulong wak tushalijadina ni antu akwau ni pamwing ap akutwish kushiken kulond anch: “Tukuya pamwing ni yenen, mulong twateshin [ni kushinshikin] anch Nzamb udi pamwing ni yenen.” (Zak. 8:23, NW) Tumekeshany muntu ni muntu pakach petu kalimish ketu kud Yehova kusutil ku kudjal ni kwileng kwetu.
[Caption on page 1]
[Study Questions]
[Caption on page 5]
[Picture on page 5]
Mekesh Untu wa Kalimish
▪ Piudia mu weny
▪ Kwi ndond ya chikumangan
▪ Pa chisu cha kwiswedish