Wanyishany Maswir Men ma Muspiritu
1 Chikunguril chetu cha Distrik chikusadika kurutu oku “Antwarubil a Want Akweta Mushiku” chitwinkin chisu chimwing chipandakena kuwap cha kuwanyish maswir metu ma muspiritu. Mud yakudia yimwing yiwamp ya ku mujimbu yisangareshina, program ukez chakin kamu kutudish muspiritu “nich mazu ma ritiy.” (1Tim. 4:6) Chikututwishish kushejin piswimp nakash ni Yehova. Ni tukutwish kuchingejin kutambul yiyul ni dikasikesh yikutukwasha kujijaman yoziu mu mwom wetu. Yehova utulejin chakin anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.” (Kus. 32:8) Tuyukin mud ik kwikal nich umutakel wend wa rukat mu mwom wetu! Tushinshikinany jinzau jimwing jifanyidina jitukutwisha kusal chakwel kutambul kamu ukwash wa program wa chikunguril.
2 Tufanyidin Kurijek Muchim Wetu: Umwing ni umwing pakach petu ukwet chisend cha kwilamin muchim wend wa chijingidij. (Jinsw. 4:23) Chinech chitining kusadil kwikand kwa muntu ipend ni kwikal ni win-yakin nich yovil yetu ayinetu. Chikunguril chidi chisu cha kutongijokin piur pa urund wetu ni Yehova, chidi chisu chimwing cha “kwonganyin yijil yiwanyidina yikata kupan want ipau.” Chakwel kurijek muchim wetu mulong wa ‘kwitiyij dizu diandjikinaumu,’ tufanyidin kumwilembil Yehova atushinshikina, ijika “chom chiyimp” chidia mudi etu tuswiridina kurijek, ni kututakel ‘mwi njil ya mivu ni minang.’—(Jak. 1:21, 25; Kus. 139:23, 24)
3 Tuteshany ni Kutong: Yesu wamujikitisha Mariy mulong wa kuta matu nakash ku mazu mend, walonda anch: “Mariy watondang kal chom chiwamp, chakad kwez kumutambul.” (Luka 10:39, 42) Anch tukwet mwikadil wa manangu wa chilik chimwing, kitukezap kushil milong yakad usey ndond chakwel yituzuwola. Tukez kushinshikin kwa ufun anch tushich ni kutesh nawamp nakash pa chisu cha program mwawonsu. Tukez kwipuk misamb yakad usey ni kushemunok chamwamu ni tukez kuta muchim nakash chakwel kwipuk kuyizuwol antu akwau nich matelefon, yamu ya kukwat nich yipich ni makamera.
4 Chisu tuteshina madiskur, chiwapin kufundap milong yijim yiswimp yikutukwasha kushinshikin mutapu wisambidinau mutu wa mulong winou. Tufanyidin kwambatanish yituteshina nich yitwija. Chinech chikez kutukwash kutesh ni kulam yom. Chisu tuchirikidina yitwafundina, tufanyidin kuchisal nich chitongijok cha kusadil yom yiney. Muntu ni muntu pakach petu uwapidil kwiyipul anch: ‘Ov, yom yiney yikwatin nchik ku urund wam ni Yehova? Yikarumun ik nifanyidina kusal mu mwom wam? Mutapu ik nikutwisha kusadil rusangu riner mu mutapu wam wa kushakam nau antu akwau? Ov mutapu ik nikutwisha kuyisadil mu mudimu wam wa kulejan?’ Twisambinany pamwing ni antu akwau manans matusangareshina kamu nakash. Anch twasal yom yiney chikez kutukwash kulam mazu ma Yehova ‘mukach mwa muchim wetu.’—Jinsw. 4:20, 21.
5 Tusadilany Yitwilejina: Kupwa kwa kukumangan ku chikunguril cha distrik, mwin kukumangan umwing walonda anch: “Program wadinga umutadina kamu nakash muntu ni muntu, wadinga ni kumukasikesh muntu ni muntu kushinshikin ngikadil ya muchim wend ni wa yid ya dijuku diend, ni kupan nich rukat ukwash uswiridikina wa Mifund. Wangijikisha nawamp kamu chisend cham cha kupan ukwash nakash ku chikumangen.” Mwamu kamu mwiyovau avud pakach petu. Pakwez chiwanyidinap kud etu kudiokal kusu ku chikunguril ni kwiyov ukasikeshinau ni uvuvurishinau. Yesu walonda anch: “Katat en wijany yom yiney, chawiy wayukany anch wez wayisalany.” (Yohan 13:17) Tufanyidin kusadil nich mushiku jinsangu jitutadila kamu etu. (Filp. 4:9) Wawiy mutapu wa kuwanyish maswir metu ma muspiritu.
[Caption on page 5]
[Picture on page 5]
Tongijokin Yom
Uteshina:
[Caption on page 5]
[Picture on page 5]
■ Mutapu ik yikwatina ku urund wam ni Yehova?
■ Mutapu ik yikwikala nich usu mu mutapu wam wa kushakam nau antu akwau?
■ Mutapu ik nikuyisadila mu mwom wam ni mu mudimu wam wa kulejan?