“Yisu Yawonsu en Sotany Mutapu wa Kusal Kuwap”
1 Mutapu wa mwom wa mwin Kristu urumburikin ‘kusal chisu chin chawonsu yidia yiwamp kudi antu awonsu.’ (1 Tes. 5:15) Chisu tukumangena ku yikunguril yetu ya distrik, tukwet mitapu yivud ya kuyisadil antu akwau chom kanang chiwamp. Mu yisu yiney, tudi kurutu kwa antu avud, ni antu in awonsu akutwisha kutuman, akutwish kwikal nich yitongijok kanang padi etu yengamidina pa mutapu tuyisadidila. Chakwel kulam ntumb yiwamp chitudia Atuman’a Yehova, tufanyidin kumekesh nich yisalijok yetu anch ‘tuyilimishin antu awonsu.’ (1 Pita 2:17) Chinech chitin anch “muntu ni muntu atala nawamp ku yom ya mwom wa mukwau, wakad kutal nawamp ching kusu ku yom ya mwom wend amwinend.” (Filp. 2:4) Tushinshikinany mutapu uchambatena nich ditenchik dia yikumbu ya kulal ku chikunguril.
2 Chisu tukata kukumangan ku chikumangan antu avud akweting chaku cha kusal yitenchik pamwing ni akadivar au. Pakwez, akwau akutwish kutond kushakam pamwing ni anamakwau nich rutong ra kuyishimunin rusangu ruwamp ni ap kuyitazuk kwez pamwing nau kukumangan ku chikumangan. Chinech chidi chakin kamu cha kujikitish. (1) Mu mutapu win wawonsu, tusotinap kwikal chisend kud mwin kutwak pantaliken nich milong ya nfalang. Kurutu kwa kuya ku chikumangan, chikwikal cha manangu ku mutambu wetu kukwat yiyul mulong wa kudimukin maswir metu, mud yakudia ni nfalang ja kufut nich weny anch chiswiridikin. (2) Kitusotinap kwandamin pa kutwak kwau chakwel tumenaku ukwash ni kushakam chisu chilemp chakad kufanyidin kwinyim kwa chikumangan. Mwi njil yiney tukez kumekesh kalimish mulong wa kuwap kwa muchim wau. (3) Tusotin kulam mu manangu anch tudi angendj, ni kumekesh kalimish mulong wa yom yikwetau ni kulik kusadil yom yau pakad kutwinkish mbil ya kuyisadil. Chijidik chidia mu Mateu 7:12 chifanyidin kamu kututakel.
3 Kuyifundish an Kusal Yiwamp: Pa chisu chinech, an akata kushal pakad muntu mukurump wa kuyishinshikin ku chikumangan kapaninap chilikej chiwamp bwat. (Jinsw. 29:15) Yisu yimwing, anvaj akat kuyishilang anau want ipau wa kutumbok ni kuyisha pakad kuyishinshikin. Mud chibudikin an amwing akat kuwayiway chisu chisutishinau program, pakad kuta matu, end alet masok chamwamu. Chifanyidinap kuyishil ndond kuya ni kuchirik chisu chawonsu ku musalany chisu chisutishinau yikunku. An afanyidin kwikal pamwing ni anvajau ni afanyidin kwikal nich Baibel wau pamwing ni pa kufundin milong yijim, chinech chikez kuyikwash kutesh ni kwilej kumwov Yehova wom. (Kuvurik Yijil 31:12) Ap anch dijuku dishich ku chikumbu chashikedinau pa chisu cha chikumangan, an afanyidin kuyilam kud anvajau, afanyidin kumekesh ngikadil yifanyidina ya in Kristu ansand, ni kulet chad lel kushiman pa dijin dia Yehova.
4 Anvaj, chikez kwikal cha ukwash kurutu kwa kuya ku chikunguril, anch wasutishany chisu kanang ni anen mulong wa kuchirikin mulad wa mwakadil wa Ukristu uyichingejidinau awiy kumekesh mu yisu yawonsu ni mu jindond jawonsu. (Efe. 6:4) Chilikej, yilejany kamu patok anch rukat rakin ra mwin Kristu “kirukwetap dichim, ap kwitong, kirukwovangap ujim swa.” (1Kor. 13:5) Antu amakurump akutwish kukasikeshin mazu minam anch apan chilikej chifanyidina mulong wa awonsu kuman. An, ukutwishany kudandamen kusal yom yiwamp anch waziyilany kud anvajen, anch wamekeshany kalimish mulong wa yom yayen, ni kuyilimish antu adia piswimp nen. (Kol. 3:20) Chitwikasikeshina etu awonsu mu uumwing mulong wa kusal yom yiwamp kud antu awonsu, ‘chawiy mwamu mu yom yawonsu tukat kumekesh katumb ka malejan ma Nzamb Mupandish wetu.’—Titus 2:10.
5 Mwikadil wetu uwamp ukwet yibudikin yiwamp chidiap kusu padi in kututal pakwez kand padi antu akweta runyinyit mulong wa yiyingish kushalijan piur petu. Mu yom yawonsu tusadila ku chikunguril ni mu musumb musadidinau chikunguril—chikala pituyila ni kwend mwi njil, kudia pamwing ni arund, kwiswedish ku chikumbu cha mwin kutwak, ap kwisakin yisu chakwel kupan uman wa kukashimwish—mutapu wetu wa kulond wa Ukristu ni yisalijok yifanyidin kumekesh anch tusotin kusal yom yiwamp.
[Caption on page 4]
[Picture on page 4]
Vurik Amboku:
[Caption on page 4]
[Picture on page 4]
■ Ikal mwin kushimpish muchim ni kalimish kajim pantaliken nau akadivar ni mwin kukwak.
■ Londul umutakel upaninau kud antu akweta chisend, mulong wa ukwash wa in kukumangan awonsu.
■ Kangal wasadil mutapu uyimp mwikadil wa kupan ni kwakan kwa mwin kukwak.
■ Shinshikin nawamp yisalijok ya aney.