Kukwashijan Kwa Pakampwil
1 Dichuku ni dichuku dikata kusut antu a Yehova akat kurish nich yoziu ya ritiy rau. Chijay anch kwamushadil kal chisu chikemp, Djabul ukat kusarumun kansudiel chakwel abukuna kushinshaman kwetu kud Yehova. (Kuj. 12:12) Chidi cha usey anch ‘twikasikeshina mudiay Nsalejetu, mu ukash wa dikand diend dipandakena’ chakwel anch ‘dichuku diyimp diashik tukutwish kumukangesh mukankuny netu, chad tukez kudandamen kwiman dang.’—Efe. 6:10, 13.
2 Kukumangan pamwing nau ambay netu akaritiy didi ditenchik didiokila kud Yehova mulong wa kutukwash kutambul dikand. Mupostol Paul watesh kurumburik kwa chom chinech. Wasota kamu nakash kwikal pamwing nau akadivar nend in Kristu chakwel awiy atwisha ‘kukwashijan pamwing’ ni ‘kukukasikeshijan.’ (Rom 1:11, 12, note, NW.) Chakwel kutukasikesh kusal rusot ra Nzamb, Chisak Chitakedila chatenchikin kal nich rukat kutwinkish yisu ya kuman ukwash udiokila ku kukwashijan kusutin kukukasikesh ku Chikunguril cha Distrik “Antwarubil a Want Akweta Mushiku” chikusadika kurutu oku.
3 Ikalanyaku Mulong wa Kutambul Ukwash: Itekinany rutong ra kwikalaku machuku mawonsu masatu. ‘Tumening ayinetu ukwash’ anch twashik kurutu kwa muminy wa kusambish ni kushal djat kamu ni pitukwakwila nich muchim wetu wawonsu anch “Amen” ku malembil ma kwisudiel. (Isa. 48:17, 18, NW) Antu avud afanyidin kurijek nawamp program wau wa mudimu kurutu kwa chisu chakwel ikalap ni chisu chifanyidina cha kukumangan ku machuku mawonsu masatu. Chakin kamu, chikutwishap kwikal chiswapela kumwitiyijish mukurump wey wa mudimu chakwel akwinkisha konje, pakwez tukwet ruchingej mudiay Yehova anch ukutukwash kusal rusot rend. (1 Yohan 5:14, 15) Anch kand kal twirijeka, katat chawiy chisu chifanyidina kwitenchik mulong wa nfalang ja kufutin weny ni ndond ya kulal, ni kulik kuchingejin anch chom kanang chikusadik achinach ku kuyuk. Tukutwish kwikal nich ruchingej anch Yehova ukez kuyukish usu wetu wa kukumangan machuku mawonsu masatu.—Jinsw. 10:22.
4 Sambelany Kutongin Dikasikesh: Ov wadiokalap kal ku chikunguril cha distrik, ni kulond anch “Chading chikunguril chimwing chipandaken kuwap!” Mulong wak washikena kwiyov mwamu? Chidi mulong chitudia antu akad kuwanyidin tukutwish kuziy, ni kuman ayinetu kuswir kwa dikasikesh dia muspiritu. (Isa. 40:30, NW) Nambaz umwing warumburila anch: “Ditenchik dined dikat kwinziyish, ni yikunguril yikat kwinkwash kushinshikin kand pa mwikadil wam wa muspiritu, yikat kwinginkish ukash wa muspiritu niswiridina. Chimeken mud dikasikesh dikat kwezang kamu pa chisu nidiswiridina kamu nakash.” Niyey wikalap kal ni yitongijok ya chilik chimwing.
5 Tukat kutambul dikasikesh tuswiridina chidiap kusu kusutin ku madiskur ni ma interview pakwez kand kusutin ku milong yikwau ya muspiritu yipitishina. Mukadivar umwing washimunina anch: “Yidi yijidik ya Baibel yovikena patok, yifanyidina chakin kamu nikata kusanger nakash. Mwawiy, madram makwet usey ukash mu kulejan mutapu tukutwisha kutan ukwash udiokila ku yilikej ya pakur, yiwamp ni yiyimp. Mikand yisu yidi yom yimwing yinikata kuchingejin chisu chawonsu, nikat kuyisanger chisu chilemp kwinyim kwa kuchirik ku chikumbu.”
6 Yikunguril yidi yitenchik yimwing ya ukwash yirijekinay Yehova mu chirung chinech cha ‘machuku minam ma kwisudiel madia ma mar nakash.’ (2 Tim. 3:1) Yikat kutukwash kutesh chiyul chipepidilau chilondina anch: “Babalany, imanany dang mu ritiy, jijamanany, ikalany akash.” (1 Kor. 16:13) Chawiy lel, tukwatany mupak wa kukumangan ku chikunku ni chikunku ni kusanger kukwashijan nakash kukasikeshina ku Chikunguril chetu cha Distrik “Antwarubil a Want Akweta Mushiku!”
[Caption on page 3]
[Picture on page 3]
Irijeka Chakwel Kukumangan Machuku Mawonsu Masatu
[Caption on page 3]
[Picture on page 3]
■ It konje ku mudimu.
■ Sambel kukwatin ndond ya kulal ku musumb kukusadikina chikunguril.
■ Irijeka mulong wa nfalang ja kufutin weny wa kuya ku chikunguril.