Yikunguril​—⁠Chisu cha Musangar Ujim!

¹ Yikunguril ya Atuman’a Yehova yiding yisu ya musangar ujim nakash. Kusut kwa yitot ya mivu, yikumangan yiney yakwashin kuwejinaku kwa antu andamina mu dirijek dietu. Kudiokal ku disambishil dikemp, twamen yiyukish yipitishina ya Yehova mu mudimu wetu wa mangand mawonsu. Ku chikunguril chetu cha kusambish cha mu chirung chinech cha katat, mu Chicago, Illinois, mu muvu wa 1893, pa antu 360 akumangana pading antu 70 abatishau mud chijingidij cha kwipan kwau kud Yehova. Yikunguril ya Distrik “In Kusadil a Dizu Dia Nzamb” ya muvu wasutina ou yakumangejin mu mangand mawonsu uvud wa antu 9 454 055, nau antu 129 367 atambwila dibatish. Udi musul mud ik upandakena kuwap wa musangar!

² Ap mu yirung ya Baibel, yikumangan ya antu a Nzamb yadinga ni kulet mutapu umwing wa pakampwil mulong wa kupan mafundish ma Yehova. Mu chirung cha Ezra ni Nehemi, antu atesha kutang kwa Chijil “kusambish pamanch djat ni muten pa mutu.” (Neh. 8:​2, 3, NW) Mulong wa kutesh nawamp kurumburik kwa Chijil pa chisu chinech, antu ikala nich “musangar ujim.” (Neh. 8:​8, 12, NW) Niyetu kand tukwet musangar anch yikunguril yitwinkishining chisu chiwamp mulong wa kutambul mafundish mawamp ni yakudia ya muspiritu ya “pa chisu chiwanyidina” yidiokila kud Yehova kusutin “kashalapol wakin ukweta manangu.” (Mat. 24:45) Mulong Yesu walonda anch muntu ukwikal mwom anch “ukwet kuswir kwa mazu mawonsu makat kulonday Nzamb,” yikunguril yidi ya usey mulong wa kuwap kwetu kwa muspiritu.​—⁠Mat. 4:⁠4.

³ Chidi Cha Usey Kud Etu Awonsu Kusal Usu wa Kukumangan! Muntu ni muntu pakach petu ufanyidin kwitekin rutong ra kwikal ku Chikunguril cha Distrik “Alej a Dizu Dia Nzamb” cha muvu unou kudiosh kwisambishil djat ni kwisudiel. Tufanyidin kwirijek kushik kurutu kwa chisu dichuku ni dichuku ni kushakam djat ni pitukulondinang anch “Amen!” ku dilembil dia kwisudiel. Chakwel kuchisal tufanyidin kurijek program wetu. Kwikal ni chisu chifanyidina kudiokal ku mudimu wetu chakwel kukumangan ku chikunguril kukutwish kwikal ni matat kanang. Tufanyidin kwiman dang, wakad kushil chom ap chimwing chitukangesha. Anch tukwet kuswir kwa yom yifanyidina ap pa kwendil, tufanyidin kusambish kwirijek kurutu kwa chisu. Wikalap nchik usu tukusala ukez kwikal wa usey!

⁴ Antu a Yehova kakutwishap kwisikesh yiyukish ya kukumangan ku chikunguril nich usey wa kuvul kanang kwa nfalang. Shinshikin yilikej ya antu amwing adinga ajijamena kuya ni kukumangan ku Chikumangan cha Mangand Mawonsu, chadinga ni mutu wa mulong, Rusot ra Nzamb, chasalau Atuman’a Yehova mu New York City, mu muvu wa 1958. Mukadivar umwing wafunga mudimu wend wa kwisak mbing jaad mulong wa kupan ukwash wend nich kusal mudimu wa kwikatin ni kukumangan ku chikumangan. Mukadivar umwing, mu masang ma Virginie walandisha yikunku yitan ya mahekitar ya chir chau chakwel anch dijuku diend diawonsu dia antu musamban ditwisha kuya ni kukumangan. Ambay amwing a uruu achidia ansand alandisha motak wau chakwel anch awiy atwisha kusend anau awonsu asatu, akweta chimbu cha kuvadik kusambishin pa angond aad djat ni ku mivu sambwad, kuya nau ku chikumangan. Anamaku asatu a mu Californie ayileja anch ang ajing ku midimu yau, midimu yiney yikwikalap kand iyau pakuchirikau. Pakwez, chinech chatwishap kuyikangesh awiy kuya ku chikumangan chinech chakadau kuvuramen.

⁵ Yehova Ukat Kufut Usu Wetu wa Kashinsh: Yehova umen ni kuyukish usu wa antwend. (Heb. 6:10) Chilikej, ku Chikumangan cha mu muvu wa 1950, chadinga ni mutu wa mulong, Kwiwejinaku kwa Uteokras, in kutesh atesha diskur dimwing dia usey ujim dikweta muntu wa mulong “Yitenchik Yisu ya Yom.” Mukadivar Frederick Franz wavuvurisha kusanger kwa awonsu nich kwipul anch: “Ov chikumangan chinech cha mangand mawonsu chikutwish kwikal ni musangar wa kwijik anch pinap, urel unou, pakach petu, padi uvud wa antu kanang achingejina kwikal ant a divu disu?” Kusut kwa mivu 50, tuchikwet ni katat musangar mu kutokish kwinoku kwa kutesh kwetu kwa Kuseng 45:⁠16.

⁶ Kupwa kwa kukumangan ku Chikunguril cha distrik cha muvu wasutina, mutu umwing wa dijuku ukweta muchim wa kujikitish wafunda anch: “Akadivar, ukutwishanyap kutesh mutapu wadinga chikunguril chinech chipandishina mwom. Dijuku diam diashemunika mu musumb mulong wa mudimu, mulong kusu wa kutek ngikadil yetu ya muspiritu mu chak. . . . Twadiburila yisend yetu ya Ukristu. Twimika kand ap kukumangan ni kusal mudimu wa kulejan pamwing. . . . Chikunguril chinech chatukasikeshin, ni chikwau kand tukat kwitekin rutong ra muspiritu ni kusambish kwirijek mulong wa kuriwanyish.”

⁷ Yehova utukwashin nich yakudia ya muspiritu tuswiridina. Ndiy wizwishin too tebur nich yakudia ya muspiritu ku yikunguril yetu. Kusanger kwetu mulong wa yakudia yiney kukutwish kutubachik kulond mud mwalonday Korney chisu chezay mupostol Pita kwolikwend anch: “Katat etu awonsu tudi kurutu kwa Nzamb, tukat kuchingel yom yawonsu yikulejinay Nsalejetu kutulej etu.” (Midimu 10:33) Twitekinany rutong ra kwikal “kurutu kwa Nzamb” ku yikunku yawonsu ya Chikunguril cha Distrik “Alej a Dizu Dia Nzamb” cha muvu unou ni kwikal ni musangar ujim!