Irijekina “Nawamp Wakad Kurumbangan”
1 Chakwel anch tutwisha kusal chikunguril cha distrik nawamp, kufanyidin kwikal kubombakan kwa usu uvud. In kutakel chikunguril akat kurijek ndond ya chikumangan yifanyidina ni yom yikwau yifanyidina. Muntu ni muntu ni yirund ya majuku yikat kukasang weny wau ni kutongin ndond yikushikenau. Yikumangen yikat kutenchikang usu wa antu in kwipan kusal mudimu wa kwikatin chakwel kurijek madepartema mavud maswiridikina chakwel kusutish chikunguril. Rutong ridi kwikal ni “yom yawonsu ni kuyirijek nawamp wakad kurumbangan.”—1 Kor. 14:40.
2 Chiutenchikina usu wey nich usu wa antu arijekina chikunguril, vurik anch chifanyidin mulong wa kwirijek —angond—ni yisu yimwing ap mivu. Yitot ya akadivar akata kusutishang chisu chivud mulong wa kutenchik yom. Chinech chiwejidin kufutin ndond ya kusadil chikunguril, kukumangej yom ya mudimu, ni kukumangej in kusal mudimu. Kwirijek kwinoku kwa kurutu kwa chisu kuletining yiyukish ya muspiritu kud awonsu. Ov chom ik tukutwisha kusal mulong wa kupan ukwash?
3 Tumekeshany Yaku Yiwamp Mud Angendj: Tusotin kusadil pamwing nich mudimu wa ndond ya kulal. Anch tutongidin kushakam ni dijuku kampand didia mu uyakin, tufanyidin kwijikish kurutu kwa chisu, chakwel alika kutek dijin diey ku dipapel dikweta majin ma antu apanina ndond ya kushiken. Anch twit ndond ya kushiken ni atutek mu dijuku kanang, tufanyidin kulimish dirijek dined. Tufanyidinap kukarumun kand kupwa ni kwovijan ni muntu mukwau. Kusalang mwamu kukutwish kuziyish akadivar kuyak aeny mu machuku ma kurutu. Amwing pakach petu akweta anamakwau mu ul usadidinau chikunguril akutwish kusot kushiken kwa anamakwau. Chinech chimwinkin muntu chisu cha kupan uman piur pa uyakin, ni kuyit anamakwend kwez ku chikunguril. Ku mutambu ukwau chinech chikat kusha ndond ku yikumbu ya akadivar mulong wa kutambul antu ezina ni kukumangan akad kwikal ni anamakwau mu musumb usadidinau chikunguril.
4 Anch atwinkish chikumbu ni dijuku dimwing, anch kamu chikunguril chapwa, tusotinap kushal machuku mavud ku chikumbu cha muntu watwakina, ni kutek chad lel chisend chilimina pad akadivar. Chisu tushicha nau akadivar netu, tufanyidin kulimish yom yikwetau ni milong yiyitadila ayinau. Chitudia angendj chifanyidinap kukwatijol ndond yawonsu ni kuyisadil, ndond ya kutek mabuku ni yikwau yikwau pakad mbil ya mwin chikumbu. Chikwikalap chiwamp kwandam mu tupalikany twayen. Tufanyidin kuyital anetu palemp eza kuyipish ku mutambu winou. Tukumekesh kalimish nich kulik kulet masok, kulond nich dizu dijim nakash, kubul yis ni usu ni yikwau yikwau.
5 Anch twitapidil dilau dia kutwak kud akadivar netu, tusotinap kwikal chisend chilimina kud awiy. Chidiap chisend chau cha kutukimbin yitukweta nich kuswir ku mujimbu ching anch ayinau achisal. Muntu ni muntu ufanyidin kwitekin chipau chifanyidina ni kwirijek kurutu kwa kwez ku chikunguril mulong wa kudimukin nswir ja dijuku diend nich yakudia ni anch kudi kuswir mulong wa kurijek kwa nfalang ja weny. Mukadivar umwing walandisha chikunku cha divu diend mulong wa kufut ditike dia kuya ku chikunguril ni kwirijek mulong wa yom yikwau. Ndiy wasota kwipan nakash chakwel kukumangan ku chikunguril ni kulik kwikal chisend chilimina kud muntu ukumwaka.
6 Anch Chot cha Want achisadidil mud ndond ya kulal angendj, tufanyidin kumekesh kalimish mulong wa kuwap kwa antu awonsu adiap. Chikwikalap chifanyidina kumwit muntu mukwau kwez kushakam ku Chot wakad kutambul mbil kud akadivar atadila milong ya ndond ya kuladik angendj. Chot chifanyidin kwikal chinangina ni chakad kurumbangan. Etu awonsu tufanyidin kulimish kamu antu akwau akatina kupim, ni kwipuk kuzezik ni misamb djat mukach ka uchuku. Mend ya kasu yifanyidin kujim pa chisu chiwovijadinany en awonsu. Muntu ni muntu ukwet kuswir kwa kupim chakwel kwikal ni usu ni tayad mulong wa kulondul chikunku cha dichuku dikwau dilondwila. Anch kamu chikunguril chapwa, chot chifanyidin kwikal mud muchidinga chisu chawonsu mulong wa midimu ya chikumangen yikusambisha. Kurutu kwa kudiokal mu chot shinshikinany anch chidi chinangina ni chirijekinau nawamp kamu, chinech chikumekesh kalimish mulong wa akadivar netu ni katumb mulong wa Nzamb tukata kwifukwil.—1 Pita 1:15, 16.
7 Chitudia atushalapol a Yehova Nzamb, tukwet ndond jivud ja kumekeshin untu wend mu yom yawonsu tusadila. Chinech chirumburikin kusal yitenchik mulong wa kukumangan ku yikunguril kukatau kutumbish dijin dia Nzamb. Tuvurikany anch, ndiy “kadiap Nzamb wa kanvundangesh, pakwez udi Nzamb wa chisambu.” (1 Kor. 14:33) Chawiy lel, twikalany ajijamena chakwel in kututal awonsu ajingunin ngikadil yiney piur pa Yehova ku yimenau mudi etu—ngikadil yetu mud tuyitongidin kurutu ni kukumangan ku chikunguril cha distrik “Alej a Dizu Dia Nzamb.” Antu in kututal akweta michim yitentamina akez kwijik anch yikumangan ya antu a Yehova yiding yirijekinau “nawamp wakad kurumbangan.”—1 Kor. 14:40; Kus. 68:26.