Chitentam cha Distrik cha 2008 cha Atuman a Yehova
1. (a) Ov, mulong wak chiyul cha Paul kudi in Kristu in Hebreu achisadidil nich kuswakej kwa pakampwil nlel unou? (Tang Hebreu 10:24, 25.) (b) Ov, chisu ik chezina chitufanyidina kusadil chiyul cha Paul?
1 Kambuy Paul wayikasikesha in Kristu in Hebreu chakwel akumangana pamwing ni kwikasikesh umwing ni mukwau “chipandikenamu mudi” ading ija anch Dichuku dikat kusej piswimp. (Heb. 10:24, 25) Uman ukat kuvulijan anch “Dichuku” disambidinay Paul didi piswimp nakash! Chawiy lel, tuchingejin yisu ya kukumangan pamwing ni akadivar ni anambaz netu mulong wa malejan ma muspiritu makutwisha kututakel mu “machuku ma kwisudiel” madandamedina kuyip. (2 Tim. 3:1) Chisu mudi chinech chikwikalaku ku chitentam cha distrik cha 2008 chezina.
2. (a) Mulong wak chidi cha usey kukumangan mu machuku mawonsu masatu ma chitentam? (b) Mutapu ik tufanyidina kusambish kwirijek chakwel tukumangana?
2 Kumangan Machuku Mawonsu Masatu: Tukukasikeshin kukumangan machuku mawonsu masatu. Chakwel “kangal tulikany kukumangan kwetu ayinetu,” tukezap kuburen yakudia ya muspiritu ya usey. (Heb. 10:25) Sambish kwirijek kurutu kwa saa pichitwishikina. Ukusot kumulej mukurump wey wa mudimu kurutu kwa saa chakwel atenchika mutapu wawonsu uswiridina. Anch aney akwikal ku shikol pa chisu cha chitentam, yileja alej au piur pa program wey. Yijikisha anch chitentam chidi chikunku cha difukwil diey dia pichuku-pichuku. Ukutwish kwikal nich kashinsh ka chiyukish cha Yehova pa usu usadina mulong wa kutek yisakin ya Want pa ndond ya kusambish.—Mat. 6:33.
3. Ov, mwi njil ik tukutwisha kumekesh anch tuyilimishin antu akwau?
3 Yikwasha Antu Akwau Chakwel Akumangana: Paul wayikasikesha akadivar nend chakwel kutalijan “muntu ni muntu.” (Heb. 10:24) Ov, akadivar ni anambaz adia mu Dilejan diey dia Buku dia Chikumangen aswiridin kuyikwash chakwel akumangana ku chitentam? Ov, ukutwish kuyikwash antu ilejina ney Bibil chakwel akumangana ku chitentam pamwing ney, ap anch akutwish kwikalaku dichuku dimwing kusu? Piukata kuyilej yidi ya dijuku diey yakad kwitiyij piur pa program wa chitentam chen, yitazuka eza pamwing ney. Usu wey wa rukat ukutwish kulet yiyukish yakad kuchingejin.
4. Mulong wak tufanyidina kukumangan ku chitentam chitondinau mulong wa chikumangen chetu?
4 Kukumangan ku Chitentam Chitondinau Mulong wa Chikumangen Chen: Dipang dia jindond jawonsu ja chitentam akudilamik ku tablo wa jinsangu ja chikumangen kupwa kwa kushinshikin wenjil winou ku Chikumangan cha Mudimu. Chiyul chidi anch antu awonsu ashinshikin mu malembil ku chitentam ik kukutwishau kukumangan mu 2008. Pakwel kushinshikin anch kudi ndond jiwanyidina ja kushakam, mikand, tupalikany twa kulal tuwanyidina, ni yikwau, in kulejan ayikasikeshin kuya ku chitentam chitondinau mulong wa chikumangen chau. Pakwez, anch mikadil yey yikukangeshin kukumangan ku chitentam chitondinau mulong wa chikumangen chey, ikal ni want ipey wa kukumangan ku chitentam chikwau.
5. Ov, manans ik ma usey tufanyidina kulam mu manangu anch tukwet kuswir kwa ndond ya kulal, ni mulong wak?
5 Jindond ja Kulal: Anch usotil ndond ya kulal mu chikumbu cha muntu (cha mukadivar), ap mu Chot cha Want, tuyudil anch kalam wa ujindj asala kurutu kwa chisu dipang dia in kulejan asotila ndond ya kulal ni kuditum ku Departema wa Kuladikan ku musumb kukusadikina chitentam. Ufanyidin kulejan dijin, kulejan anch udi ikundj ap mband, mivu, kuvarikan mu dijuku kwa mwin kulejan mwawonsu pa dipang dined. Chinech chikuyinkish akadivar akweta chisend mu Departema wa Kuladikan chisu cha kukimb ndond ja kulal mulong wa antu awonsu. Komite wa Mudimu wa Chikumangen ufanyidin kushinshikin yaku ya in kulejan kurutu kwa kutum kwit kwinoku ku Departema wa Kuladikan. Anch atwinkish ndond, chikutwishap kwikal chiwamp kwovijan ku ujindj mulong wa kushakam kand ni mukadivar mukwau ap ni murund. Chinech chikutwish kuvundangesh yom mulong wa akadivar akweta chisend cha Departema wa Kuladikan. Pakwez, anch muntu watong kushakam mu chirung cha chitentam mu dijuku dia mukadivar nend wakad kwikal mukadivar mu spiritu, ndiy kafanyidinap kupan dijin ni kuditumin pa dipang dia kwit ndond ya kulal.
6. (a) Ov, yitenchik ya mutapu ik yifanyidina kusal anch akadivar ni anambaz ayitekin mu Chot cha Want? (b) Ov, manans ik mamwing mafanyidina kushinshikin nich chitongijok cha kukumangan ku Chitentam cha Distrik? (Tal mushet “Manans Mamwing ma Kushinshikin . . .”)
6 Tukat kulejan pinap yany kanang pa mutapu wa kusadil Jindond ja Chot cha Want. Komite wa Chitentam cha Distrik ukutond mukurump ukutakela ditenchik dined. Ukwikal ni nkwash, nakash mukurump mukwau ap nkwash a mudimu uwanyishinau mu spiritu. Chot afanyidin kuchangan mu yikunku yaad: chikunku chimwing mulong wa anambaz nau anau akemp, nau ayangadim, chikunku chikwau mulong wa akadivar ni an akwau amakundj. Chot cha Want chifanyidin kuchisadil mulong wa kulal kusu. Dichuku didiau awonsu kwi ndond ya chitentam, kukwikal kutenchik chakwel kwikala atulam akuswinkanijana mulong wa kwipuk kwiy yom ya antu. Atulam akusadilau afanyidin kwikal akadivar akudila mu spiritu, akashinsh. Chifanyidinap kwisukin yakudia mu Chot cha Want. Akutwish kutung kapish mu rupang kakusadilau mudi ndond ya kwisukin mu chirung cha chitentam kusu. Kupwa kwa chitentam, akez kukawupul. Chidi cha usey kulam chot pamwing ni rupang, yinangina ni pakad kanvundangesh. Chifanyidin kutal anch kangal ayipish chom ap chimwing. Antu ashichamu afanyidin kusal usu wau wawonsu wa kumekesh mwikadil ufanyidina wa in Kristu akin umwing ni mukwau pamwing kand ni amutej nau—1 Kor. 10:31.
7. (a) Ov, mwi njil ik tukutwisha kumutumbish Yehova pitukata kukumangan ku yitentam yetu? (b) Ov, yik yalondau antu avud adinga ni kututal ni mukurump wa otel, mulong wa midimu ni ngikadil yiwamp ya akadivar netu?
7 Midimu Yiwamp: Kuziyil ku chijil cha Yehova cha kukumangan kwetu ayinetu mulong wa kwifukwil ‘kutukwashin.’ Cha usey nakash, kutwinkishin yisu ya kutumbish dijin dia Yehova. (Is. 48:17) “Midimu [yetu] yiwamp yikata kumekan” kudi antu avud ku chitentam cha distrik, ni amwing asota kulejan yovil yau. (1 Tim. 5:25) Padingay ni kuyital akadivar arijekina ndond ya chitentam muntu umwing walonda anch: “Pinamana yipich ya paradis mu mikand yen, chisu chawonsu nading nitongin amwinam anch ‘Atuman adi in kulat ajim’. Pakwez katat nikutwish kuman anch akutwish kukarumun divu dikala paradis!” kupwa papanay manung maad ma yisalamb walonda anch: “Sendany amboku, chakwel ni am ni kukwashan mu kusal mwamu.” Mu musumb umwing mwadingau ni kusal yitentam mu mivu yivud, mukurump umwing wa otel walonda anch: “Jinsangu jivud piur pa Atuman a Yehova ni kurumburik kwa chitentam chen japalangana mu ul. Twij mutapu en wadingany ni kutokish chot cha yitentam, ni tukat kukumanany mu kutokish parking wawonsu. Chidi chom chisangareshina kwikal pamwing nen pa chirung chetu cha chishipu. Tukwet ruchingej anch tukutwish kudandamen nich urund wetu mu muvu ukweza.” Ngikadil ya akadivar netu yashikija ku kulond kwinoku ni mazu mavud ma mutapu winou mafanyidin kusangaresh muchim wa Nzamb wetu, Yehova!
8. Mutapu ik Mateu 4:4 ukasikeshin pa usey wa kuta matu nakash ku chikunku ni chikunku cha program?
8 Yesu walonda anch mwom wetu wawonsu wimedin pa kutesh “dizu diawonsu dikubudika mukan mwa [Yehova].” (Mat. 4:4) Ku yitentam yetu ya pa muvu, Yehova utwinkishin “yakudia [ya muspiritu] pa chisu chau,” yarijekau kal kudi “kashalapol ushinshamena ni kubabal.” (Mat. 24:45) Asadin mudimu ukash mulong wa kurijek ni kupan musambu winou wa muspiritu. Mekeshany amboku kujikitish kwetu mulong wa ukwash wa rukat wa Yehova kusutil ku kwikalaku ni kushinshikin chikunku ni chikunku cha program.
[Picture on page 3]
Program
Diakatan ni Diampos
9:20 pamanch - 4:55 kupwa kwa midi
Diarubing
9:20 pamanch - 4:00 kupwa kwa midi
[Picture on page 4]
Manans Mamwing ma Kushinshikin Nich Chitongijok cha Kukumangan ku Chitentam cha Distrik:
1. Anch usotil kukas weny ulemp mulong wa kukumangan ku chitentam, sambish kulam nfalang jifanyidina mulong wa weny wey ni dijuku diey, ni ja kuland nich yakudia.
2. Tongin kand kukwash yirijek ya chitentam nich milambu yey ya kwisotil. ‘Kangal muntu ap kusu umwing kwez kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Chisu cha chitentam, tukat kutumbish dijin dia Yehova kusutil ku mwikadil wetu uwamp ni kudjal maswin minangina ni mafanyidina.—1 Kor. 10:31.
4. Sadil mu kovijan pamwing nau in kwakan ni akadivar akweta chisend cha kwandjik ni kushichik antu. Kangal wakwatin jindond chamwamu, ching kusu mulong wa yid ya dijuku diey ap antu wezina nau pamwing.
5. Mulong wa kwisakin sens yikunku ya kupwa kwa midi, diang yakudia yipipela kupwa kwa chikunku cha pamanch. Yakudia yivud ap yilimina yikutwish kuletish tul.—Luka 8:18.
6. Kwinang kukat kumulimish Yehova. Kwisudiel kwa chikunku ni chikunku, muntu ni muntu ukutwish kusal usu wa kusha ndond ya chitentam yinangina mu kunonol mapaper ni yishoshot ni kuyidjibul mwi ndond yitekinau mulong wa yishoshot.—1 Pi. 1:15, 16.