Chitentam cha Distrik cha 2009 cha Atuman a Yehova
1. (a) Yiyukish ik tukusangera anch twakumangan machuku mawonsu masatu ku chitentam cha distrik? (b) Yitenchik ik yitufanyidina kusal katat?
1 Etu awonsu tuchingedin chitentam cha distrik cha muvu wa 2009 ni yisu yikwau yisu ya kukumangan pamwing nau akwetu akata kumutumbish Yehova, “ija anch: ‘tukwet kuswir kwa yom ya Nzamb mu michim yetu.’” (Mat. 5:3) Mudi mushejina swa swa dichuku dia Yehova, tumukasikeshin muntu win mwawonsu chakwel asala usu wa kukumangan machuku mawonsu masatu chakwel ataninamu chipandakena mu urund wa chirungul wa ukadivar ni kukasikeshijan muspiritu chakwel tushala iminya mu ritiy. (Sof. 1:14) Ijikishany alej ni amakurump a mudimu anch chitentam chidi chikunku cha usey mu difukwil dien. Salany yitenchik yey kurutu nich kutakaman ni kimbany yiyukish ya Yehova; ikal nich kashinsh anch ukukukwash.—Isay 50:10.
2. Yiyukish ik ya michid yawonsu tukutwisha kwikal nich ap anch katutazukinap kwetu kuya kukumangan ku chitentam cha michid yawonsu?
2 Yitentam ya Michid: Yitentam yiney akez kuyisadil mu jingand jikemp ni mu misumb yimwing, ching kusu antu atazukinau awiy akutwisha kuya kukumangan. Kusadil kwetu kukwatijan nich ditenchik dined dikutwish kutukwash twipuka kwikal kwa runtu ra in kukumangan. (1 Kor. 14:40; Heb. 13:17) Pakwez, yitentam yivud ya distrik yikwikal mudi ya yitentam ya michid, mulong amishoner avud, yid ya majuku ma Bethel yisadidila mu jingand ja wingendj, ni atushalapol a michid yawonsu akutwish aya kukumangan chitentam cha distrik mwi ngand yau
3. Mutapu ik tukutwisha kuyimekesh antu amwing adia mu chikumangen chetu rukat ra Ukristu?
3 Yikwashany Antu Akwau Chakwel Akumangana: Ov, antu amwing a mu chikumangen chen akwet kuswir kwa ukwash chakwel ashika ku chitentam cha distrik? Piuyikwashina antu akwau chakwel akumangana, kiukatap ching kusu kusotijol ‘ku yom [yey amwiney, pakwez kand ukat kusotijol ku yom ya akwen.’—Filip. 2:4.
4-6. (a) Yom ik yimwing yikweta usey yitufanyidina kutek mu manangu anch tukwet kuswir kwa ndond ya kulal, ni mulong wak? (b) Ov, yitenchik ya mutapu ik yifanyidina kusal anch akadivar ni anambaz akuyidik mu Chot cha Want? (c) Ov, manans ik mamwing mafanyidina kushinshikin nich chitongijok cha kukumangan ku Chitentam cha Distrik? (Tal mushet udia pa paj wa 4.)
4 Jindond ja Kulal: Chisu chivud, antu ayilonga ku chitentam cha distrik aleling ku yikumbu (ya akadivar), mu Yot ya Want ap kand kwa anamakwau. List ulejena misumb mu kusadikina yitentam ya distrik akumulamik ku rubau kukatau kulamin jinsangu ja chikumangen kupwa kwa kwilej wenjil winou ku Chikumangan cha Mudimu. Tukwitinany anch antu awonsu ashinshikina ni kulembil chakwel amana kwisu kukuyau kukumangan ku chitentam cha distrik mu muvu wa 2009.
5 Anch usotil kulal ku chikumbu cha mukadivar, ap mu Chot cha Want, tuyudil anch kalam wa ujindj afunda kurutu kwa chisu list wa in kulejan asotila ndond ya kulal ni kumutum ku Departema wa Kuladikan ku musumb kukusadikina chitentam cha distrik. Ukulejan pa list winou dijin, ikundj ap mband (M ap F), mivu, kuvarikan mu dijuku kwa mwin kulejan mwawonsu pa list winou. Chom chinech chikuyinkish akadivar akweta chisend mu Departema wa Kuladikan chisu cha kukimb ndond ja kulal mulong wa antu awonsu. Komite wa Mudimu wa Chikumangen ufanyidin kushinshikin yaku ya in kulejan kurutu kwa kutum kwit kwinoku ku Departema wa Kuladikan. Anch atwinkish ndond ya kulal, chikutwishap kwikal kand chiwamp kwovijan ku ujindj mulong wa kushakam kand ni mukadivar mukwau ap ni murund. Kusal mwamu kukutwish kwayirumbangesh akadivar akweta chisend cha Departema wa Kuladikan. Pakwez, anch muntu usotin kushakam mu chirung cha chitentam mu dijuku dia mwanamakwend wakad kwikal mukadivar mu spiritu, kafanyidinap kupan dijin ni kuditumin pa list wa kwit ndond ya kulal.
6 Tulejen pinap yany kanang pa mutapu wa kusadil Yot ya Want mudi jindond ja kulal. Komite wa Chitentam cha Distrik ukutond mukurump ukutakela ditenchik dined. Ukwikal ni nkwash, nakash-nakash ukwikal mukurump mukwau ap nkwash a mudimu uwanyishinau muspiritu. Chot afanyidin kuchangan mu yikunku yaad: chikunku chimwing mulong wa anambaz nau anau akemp, nau ayangadim, ni chikwau mulong wa akadivar ni an akwau amakundj. Chot cha Want chifanyidin kuchisadil mulong wa kulal kusu. Pa chisu cha muten padiau awonsu kwi ndond ya chitentam, kukwikal kutenchik chakwel kwikala atulam akuswinkanijana mulong wa kwipuk kwiy yom ya antu. Atulam akusadilau afanyidin kwikal akadivar akudila muspiritu, antu akashinsh. Chifanyidinap kwisukin yakudia mu Chot cha Want. Akutwish kutung kapish mu rupang kakusadilau mudi ndond ya kwisukin mu chirung cha chitentam kusu. Kupwa kwa chitentam, akez kukawupul. Chidi cha usey kulam chot pamwing ni rupang, yinangina ni pakad kanvundangesh. Chifanyidin kutal anch kangal ayipish chom ap chimwing. Antu ashichamu afanyidin kusal usu wau wawonsu wa kumekesh mwikadil ufanyidina wa in Kristu akin umwing ni mukwau ni pamwing kand ni amutej nau—1 Kor. 10:31.
7. Chom ik cha kusambish chitufanyidina kubangin cha kusambish pa chisu twirijekina mulong wa kukumangan ku Chitentam cha Distirik cha muvu wa 2009?
7 Midimu Yimutumbishina Nzamb: Anch twamekesh dibuj dia muspiritu mu yom yetu yawonsu, mu kubabelang kamu pakampwil mazu metu ni kwambambang nau akwetu mu musumb musadikidina chitentam, tukuwejin kamu ku mwikadil uwamp wa antu a Yehova ni tukwiyep kamu kuyipwakej akwetu. (1 Kor. 10:31; 2 Kor. 6:3, 4) El kukumangan kwey ni mwikadil wey yipana ntumb kudi Nzamb mu jinjil jawonsu ku chitentam cha distrik cha muvu wa 2009!—1 Pita 2:12.
[Box on page 3]
Program:
Diakaying (Pakampwil mulong wa Chitentam cha Michid yawonsu)
1:20 pamanch. - 4:55 kupwa kwa midi.
Diakatan ni Diampos
9:20 pamanch - 4:55 kupwa kwa midi
Diarubing
9:20 pamanch - 4:00 kupwa kwa midi
[Box on page 4]
Manans Mamwing ma Kushinshikin Nich Chitongijok cha Kukumangan ku Chitentam cha Distrik:
◼ Anch usotil kukas weny ulemp mulong wa kukumangan ku chitentam, sambish kulam nfalang jifanyidina mulong wa weny wey ni dijuku diey, ni ja kuland nich yakudia.
◼ Tongin kand kukwash yirijek ya chitentam nich milambu yey ya kwisotil. ‘Kangal muntu ap kusu umwing kwez kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
◼ Chisu cha chitentam, tukat kutumbish dijin dia Yehova kusutil ku mwikadil wetu uwamp ni ku kudjal maswin minangina ni mafanyidina.—1 Kor. 10:31.
◼ Sadil mu kovijan pamwing nau in kwakan ni akadivar akweta chisend cha kwandjik ni kushichik antu. Kangal ukwata jindond chamwamu, ching kusu mulong wa yid ya dijuku diey ap antu wezina nau pamwing.
◼ Mulong wa kwisakin sens yikunku ya kupwa kwa midi, diang yakudia yipipela kupwa kwa chikunku cha pamanch. Yakudia yivud ap yitadina nakash yikutwish kuletish tul.—Luka 8:18.
◼ Kwinang kukat kumulimish Yehova. Kwinsudiel kwa chikunku ni chikunku, muntu ni muntu ukutwish kusal usu wa kusha ndond ya chitentam yinangina mu kunonol mapaper ni yishoshot ni kuyidjibul mwi ndond yitekinau mulong wa yishoshot.—1 Pita 1:15, 16.