“Dipandish Didi Piswimp” Chitentam cha Distrik cha 2006 cha Atuman a Yehova
1. Mutapu ik wamekeshau antu a Nzamb musangar wau mulong wa difukwil diakin mu yisu ya pasak, ni chisu ik cha mutapu umwing tukweta cha kusal mwamu nlel unou?
1 Mwant Ezekias wa Yuda wa pasak wayituma aruu chakwel kutwal mikand yiyitina antu kwez kukumangen pamwing mu Yerusalem. (2 Jins. 30:6, 13) Mutapu wasalau antu wamekesha mwikadil wau pantaliken ni difukwil diakin. (2 Jins. 30:10-12) Angond a kurutu ay, atushalapol a Yehova nlel unou akwikal nich mutapu wa chilik chimwing wa kumekesh kujikitish kwau kwa kashinsh mulong wa chisu cha pakampwil cha kukumangan pamwing chakwel kumwifukwil Yehova. Apanin mukand ku chikumangen chen ukwitinany kukumangan ku Chitentam cha Distrik “Dipandish Didi Piswimp”. Mutapu ik ukez kwakulany ku kuladikij kwinoku?
2. Yom ik tukutwisha kusal katat chakwel tutaninamu sens ku chitentam?
2 Sambish Kamu Kwirijek Katat: Chakwel kutaninamu sens ku program wa muspiritu urijekinau nich rukat, tuswiridin kwikalaku mulong wa program mwawonsu. Sambish katat kwirijek nich manangu mulong weyey ni dijuku diey kukumangan machuku mawonsu masatu. (Jinsw. 21:5) Mu kwirijek mudi kwinoku mukutwish kwikal kwit konje kud mukurump wey wa mudimu, kwisamb ni mbay wey wa uruw wakad kwikal Kaman, ni kuyikwash in kwilej Bibil kwikal ku chikumangan dichuku ni dichuku. Kangal wachingel anch ching machuku masej piswimp. Pakwez, lembil kud Yehova pa mulong winou, chingej anch “ndiy ukez kachisal.”—Kus. 37:5.
3. Mulong wak tufanyidina kwovijan ni yitenchik yasadilau mulong wa jindond jetu ja kulal?
3 Dirijek dia Yehova diasadil nich mushiku chakwel kushinshik anch kudi jindond ja kulal jiwanyidina mu musumb ni musumb wa chitentam. Kubaz mulong wa usu wa kwipan kwa akadivar akwashina kutenchik kwinoku, kalimish mulong wa ambay etu in kukumangan ku chitentam, ni kalimish mulong wa nkand ya uteokras yifanyidin kutubachik kwovijan sens nich yany yitekinau mu mutu wa mulong winou.—1 Kor. 13:5; 1 Tes. 5:12, 13; Heb. 13:17.
4-6. (a) Manans ik ma usey tufanyidina kulam mu manangu chisu tuswiridina ndond ya kulal, ni mulong wak? (b) Yitenchik ik yifanyidina kusadik anch akadivar ni anambaz ayiladikin mu Chot cha Want? (c) Manans ik mamwing mafanyidina kushinshikin anch tutongidin kukumangan ku Chitentam cha Distrik (Tal mushet pa paj wa 4.)
4 Jindond ja Kulal: Jindond ja kulal mu musumb ukusadikina chitentam jiding chisu chivud mu yikumbu yayen (yikumbu ya akadivar), mu Yot ya Want ap nau anamakwetu mu dijuku. Dipang dia jindond jawonsu ja chitentam akudilimik ku tablo wa jinsangu ja chikumangen kupwa kwa kushinshikin wenjil winou ku Chikumangan cha Mudimu. Chiyul chidi anch awonsu ashinshikin nakash mu malembil chitentam chikuyau mu muvu wa 2006.
5 Anch ukimbin ndond ya kulal mu chikumbu chayen (cha mukadivar), ap Chot cha Want, twitin kalam wa ujindj asala dipang dia in kulejan awonsu aswiridina ndond mud yiney kurutu kwa chisu ni kuditum ku Departema wa Kuladikan ku musumb ukusadikina chitentam. Pa dipang dined, ndiy ufanyidin kulejan dijin, muntu [ikundj] (I) ap muntu [mband] (M), mivu yikwetay, ni kuvarakan kwa dijuku kwa mwin kulejan umwing ni umwing. Chinech chikuyishil akadivar akweta chisend cha Departema wa Kuladikan chisu cha kukimb jindond ja kulal mulong wa antu awonsu. Komite wa Mudimu wa chikumangen ufanyidin kushinshikin ukaliweny wa mwin kulejan kurutu kwa kutum kwit kwinoku ku Departema wa Kuladikan. Anch atwinkish kamu ndond ya kulal, chifanyidinap kand kwovijan kuns chakwel kushakam ni mukadivar mukwau ap murund. Yiney yikutwish kurumbangesh yom nakash mulong wa antu akweta chisend cha Departema wa Kuladikan Yikumbu. Pakwez, anch muntu usotil kushakam ni mwanamakwend wakad kwikal mukadivar muspiritu pa chisu cha chitentam, ndiy kakuswirikenap kumulej kalam wa ujindj kufund dijin diend pa dipang dia kwitin ndond ya kushakam.
6 Jindond mu Chot cha Want: Tukat kulejan pinap yany kanang piur pa mutapu wa kusadil Jindond ja Chot cha Want. Komite wa Chitentam cha Distrik ukutond mukurump ukutakela ditenchik dined. Ukwikal ni nkwash, nakash mukurump mukwau ap nkwash wa mudimu uwanyidina muspiritu. Chot afanyidin kuchangan mu yikunku yaad: chikunku chimwing cha anambaz nau anau akemp, ni ayangadim, ni chikunku chikwau cha akadivar ni akwau amakundj. Chifanyidin kusadil Chot cha Want mulong wa kulal kusu. Dichuku didiau awonsu ku chitentam, kukwikal kutenchik chakwel kwikala atulam akuswinkanijana mulong wa kwipuk kwiy yom ya antu. Atulam akusadilau afanyidin kwikal akadivar a muspiritu, akashinsh. Chifanyidinap kwisukin yakudia mu Chot cha Want. Akutwish kutung kapish mu rupang kakusadilau mud ndond ya kwisukin mu chirung cha chitentam kusu. Kupwa kwa chitentam, akukawupul. Chidi cha usey kulam chot, pamwing ni rupang, yinangina ni pakad kanvundangesh. Chifanyidin kutal anch kangal ayipish chom ap chimwing. Antu ashichamu afanyidin kusal usu wau wawonsu wa kumekesh mwikadil ufanyidina wa in Kristu akin umwing ni mukwau pamwing kand ni amutej nau.—1 Kor. 10:31.
7. Mutapu ik ukutwishau kuyikwash antu akweta maswir ma pakampwil?
7 Maswir ma Pakampwil: Jinswir 3:27 ulondil anch: “Sal kuwap kudi awiy aswiridina kuwap, anch chidi mu usu wey wa kuchisal.” Mutapu ik ukutwisha kusal kuwap kud akwen mu kukwatijan nich chitentam? In kulejan amapal, ayilim, adia mu mudimu wa chisu chawonsu, ni akwau akutwish kuswiriken ukwash mulong wa mitapu ya kwendil ap ndond ya kulal. Cha kusambish anamakwau awiy akwet chisend cha kuwanyish maswir ma antu mud inay. (1 Tim. 5:4) Anch katwishinap kusal mwamu, ambay akaritiy akutwish kuyikwash. (Gal. 6:10) Atulam a malejan ma buku afanyidin kutal mu chirund chau anany akweta maswir ma pakampwil chakwel kwijik anch irijekin nawamp kurutu kwa chisu mulong wa chitentam.
8. Mulong wak tufanyidin kukumangan ku chitentam chitutondidinau?
8 Kukumangan ku Chitentam Chindjing: Kushinshik anch kukwikal ndond yiwanyidina ya kushakam, mikand, tupalikany twa kulal, ni yikwau, in kulejan ayikasikeshin kuya ku chitentam chitondinau mulong wa chikumangen chau. Pakwez, anch mikadil yey yikutwishishinap kukumangan ku chitentam chitondinau mulong wa chikumangen chen, kwikil kwau amboku mulong wa kukumangan ku chitentam chindjing.
9. Mutapu ik umwing tukutwisha kukwash ku musangar wa chitentam chezina?
9 In Kusal Mudimu wa Kwisotil: Chakin kamu kukwikal musangar nakash kud awonsu akukumangana ku chitentam ni kutaninamu ku yakudia ya muspiritu ni mitapu ya urund ukasikeshina. Musangar wetu ukwikal kand ujim nakash anch twikal nich rusot ra kukwash ku mudimu ufanyidina kusadik mulong wa kutwishish chitentam. (Midimu 20:35) Komite wa Chitentam wa ndond yiniya ukuyitazuk swa akwau mulong wa kukwash mudimu winou. Ov, ukutwish kwipan amwiney?—Kus. 110:3.
10. Yom ik ukubaza piur pa chitentam cha distrik cha pa muvu, ni wisu ufanyidina kwikal mupak wey?
10 Mulong wa kukumangan ku chitentam cha distrik, nsand umwing wa mivu yitan walonda anch: “Chitentam cha distrik chidi chikunku cham nikatila nakash cha kumwifukwilang Yehova.” Kurumburil kwinoku kutukwashin etu awonsu kujingunin musangar tukata kwikal nich pa kukumangan ku chitentam chetu cha distrik cha pa muvu. Chidi kamu chakin mud mwawangay nfund-a-kuseng anch: “Kushakam dichuku dimwing mu dibur diey kupandiken machuku kanan kwindjing.” (Kus. 84:10) David wamekesha mu mwas rusot rend ra ‘kusok mu chikumbu cha Yehova machuku mawonsu ma mwom wend chakwel kutal ni kutongijok pa chikumbu chijidila cha Yehova.’ (Kus. 27:4) Kwikal pakach pa in kwifukwil a Yehova kwamusangarisha David nakash. Twimburijany amboku kubaz kwend mulong wa difukwil diakin mu kukumangan machuku mawonsu masatu ma Chitentam cha Distrik “Dipandish Didi Piswimp”.
[Caption on page 3]
Yisu ya Program
[Caption on page 3]
Diakatan ni Diampos
9:30 kurutu kwa midi - 5:05 kupwa kwa midi
Diarubing
9:30 kurutu kwa midi - 4:10 kupwa kwa midi
[Caption on page 4]
Manans mamwing ma kushinshikin nich chitongijok cha kukumangan ku Chitentam cha Distrik
1. Anch usotil kukas weny ulemp mulong wa kukumangan ku chitentam, sambish kulam nfalang jifanyidina mulong wa weny ni mulong wa yakudia yey ni dijuku diey.
2. Tongin kand kukwash yirijek ya chitentam nich milambu yey ya kwisotil. ‘Kangal muntu ap kusu umwing kwez kwimekesh kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Chisu cha chitentam, tukat kutumbish dijin dia Yehova kusutil ku mwikadil wetu uwamp ni kudjal maswin minangina ni mafanyidina.—1 Kor. 10:31.
4. Sadil mu kovijan pamwing nau in kukumangan ni akadivar akweta chisend cha kwandjik ni kushichik antu. Kangal wakwatin jindond, ching mulong wa yid ya dijuku diey ap antu wezina nau pamwing.
5. Mulong wa kwisakin sens chikunku cha kupwa kwa midi, diang yakudia yipipela kupwa kwa chikunku cha pamanch. Yakudia yivud ap yilimina yikutwish kuletish tul.—Luka 8:18.
6. Kwinang kukat kumulimish Yehova. Kwinsudiel kwa chikunku ni chikunku, muntu ni muntu ukutwish kusal usu wa kusha jindond ja chitentam jinangina mu kunonol mapaper ni yishoshot ni kuyidjibul mwi ndond yitekinau mulong wa yishoshot.—1 Pi. 1:15, 16.